يامحمد منك انريد البشاره من حسينك هسه خلصّنه الزياره وابمصاب | قصائد حسينية مكتوبه

يامحمد منك انريد البشاره
من حسينك هسه خلصّنه الزياره
وابمصابك نختم ازيارتنه اجينه
***
نخدم وكل شيعي منّه بگلبه كاتب
خدمة اهل البيت من اعلى المراتب
رافضيه وما ندوّر عالمناصب
عدنه افضل رتبه خادم بالمواكب

ماكو نفسه هالفخر لاماكو نفسه
غالي تاج الخدمه هنياله اليلبسه
يعله صيته وبالحشر ماتبچي عينه
****
عدنه يرفع راسه اليصيحوله خادم
هذا ياهو الاكرم امن اهل المآتم
احنه لو ضيف الحسين نشوفه قادم
مو فرس نذبح عمرنه شنهو حاتم

تشهد اعلينه المگابر لو خدمنه
مو فقط ماي بثوابه ننطي دمنه
كنه فدوه للحسين وأربعينه

*
عدنه للخدمه عشگ ماكو مثيله
اشما تطول ايامهه انحسهه قليله
تدري باخر ليله عدنه اشگد ثگيله
چنهه ليلة وحشه وشلون العقيله

ليله وحشه يانبينه ليله وحشه
هذا ياطير الينام ابلايه عشه
وانت تدري احنه بمواكبكم ربينه
***
كلهه تبچي الخدم بالليله الاخيره
ياحسافه خلصت ابساع المسيره
احنه حته عيوّنه مليانه غيره
تعشگ الزوار والباقي ضريره
شنهو حاله الفارگ اهله شنهو حاله
ما تجف ادموعنه اشلون الثكاله
بلكي نجبر خاطر الزهره ابچينه
**
فرگة الزوار صعبة وانت تشهد
عدنه اصعب شي نشوفه يامحمد
من نطب للموكب ومانلگه احد
حيلنه ويالموكب امن انهده ينهد

طحنه من ثگل الهجر لا ماتعبنه
الله يدري للحسين اشكبره حبنه
صعبة والفارگ حبيبه الله يعينه
**
الشاعر وليد العكيلي


https://telegram.me/aabas78
قصائد لكل ايام محرم اشترك بالقناة