من يوم الطفوف وذيچ وگفتهه لحد هذا الوكت مفروشه سفرتهه هاي ام | قصائد حسينية مكتوبه

من يوم الطفوف وذيچ وگفتهه
لحد هذا الوكت مفروشه سفرتهه

هاي ام البنين الضحَّت ابأربع
گضاية حوائج بالشدد تفزع
اشما جال الوكت سفرتهه تتوسَّع
وجيهه ام الوفه ومسموعه دعوتهه

ربنه عوضاهه ابجاه يرفع راس
وگفتهه صفت معروفه بين الناس
من اتحير بس حلفهه بالعباس
جَرّب يالتريد وشوف فزعتهه

أدَلِّيِك ابطريج الياخذك ليهه
ابكسرة خاطر ام عباس حاچيهه
اذا مهموم مَشِّي زينب اعليهه
واحسب حاجتك ياصاح گظَّتهه

گلهه ادخيل اجيتچ حاير ابدنياي
مهموم اعتنيت ومِنِّي تاه الراي
أحلفچ بالغريب الراد گطرة ماي
وبزينب الحره وذيچ غُربتهه

إنخه ام البنين ابدمعك السچَّاب
گلهه الينتخيكم والله ماينعاب
اذا ماأدگ بابچ بلله ادگ ياباب
يباب الله الأبد مايوم سَدَّتهه

من تنخاهه منك حاشه تتعذر
إدعي وبيقين احسب إلك تحظر
يم عباس گلهه منچ اتشكر
وكون ابكل وكت تنعه المصيبتهه

سيد علي الموسوي


https://telegram.me/aabas78
قصائد لكل ايام محرم اشترك بالقناة