أويلاه أعله زينب . اويلاه أعله زينب .......................... | قصائد حسينية مكتوبه

أويلاه أعله زينب . اويلاه أعله زينب
.....................................
قصتهه نوح وفاجعه من أبديهه
زينب أسيره والشمر يحديهه
أزرك متنهه والحبل بيديهه
تمشي بدرب للشامت يوديهه
أويلاه أعله زينب . أويلاه أعله زينب
....................................
ندري يقين الموت كلمن يومه
بس زينب بلايه أخو ومهضومه
شافت أخوهه مسلبات هدومه
مذبوح عاري عالترب بالحومه
أويلاه أعله زينب . أويلاه أعله زينب
..................................
يبجي الموالي كل نهاره وليله
عالوارثه منمهه حجاب وشيله
كل شيعي بمصابج تهدم حيله
والظلم حقج بت علي ياويله
أويلاه أعله زينب . أويلاه أعله زينب
................................
مرفوع دوم وما يدنك راسهه
محبوس ظل كل الحزن بنفاسهه
ياجبل ثابت والصبر مقياسهه
ظلت أبيه وعالرمح عباسهه
أويلاه أعله زينب . أويلاه أعله زينب
.................................
هالليله زينب والحزن موضوعنه
خل نشعل بهذا العزاء أشموعنه
كلش قليله من تسيل أدموعنه
بمصاب زينب خل نهشم أضلوعنه
أويلاه أعله زينب . أويلاه أعله زينب
..................................
هاي العقيله بالخدر معروفه
تشهد عليهه كربله والكوفه
فخر النساء مكيده ومجتوفه
لحسين تتعنه الرمح وتطوفه
اويلاه أعله زينب . أويلاه أعله زينب
................................
صرختنه دوم الزينب نعليهه
هاي المجالس كل رجب نحييهه
المهدي ندري ويانه حاضر بيهه
والهامه من كثر اللطم يدميهه
أويلاه أعله زينب . أويلاه أعله زينب
..................................
الليله حتمن حاضره وموجوده
الزهره الزجيه والجبد ممروده
تبجي على زينب والكمر وزنوده
تدري الكفيل وياهه وفّه أعهوده
أويلاه أعله زينب . أويلاه أعله زينب
....................................
حيدر مطر العبادي


https://telegram.me/aabas78
قصائد لكل ايام محرم اشترك بالقناة