وانتي بتوطي صوتك علشان تكلميه ومحدش ياخد باله، أو بتصوري نفسك | عباقرة الثانوية فرنساوي
وانتي بتوطي صوتك علشان تكلميه ومحدش ياخد باله، أو بتصوري نفسك بالليل وأهلك نايمين وتبعثي له الصور، وانتي بتديله تقرير يومي عن كل حركاتك وسكناتك..
دقيقة لو سمحتي ، هقولك كلمتين ويا ريت تفهميهم وتفكري فيهم كويس جدًا!
ما تنسيش إن كل وقفة وقفتيها معاه مش هتعدي كده عند ربنا.. الأرض اللي وقفتي عليها هتشهد عليكي، أعضاءك هتشهد عليكي، قال تعالى: {يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُم بِمَا كَانُوا يَعْمَلُونَ}.
عاوز أقولك إنك دخلتي نفسك في علاقة أنتي الخسران الأول والأخير فيها!
الشاب اللي بيكلمك ده لما ييجي يتزوج مش هيفكر فيكي ، وهيقول زي ما كلمتني أكيد كلمت غيري، وهيبحث عن زوجة عفيفة مالهاش ماضي علشان تصونه.
وحتى لو تزوجك هيفضل الشك مالي قلبه من ناحيتك، وخايف إنك بسهولة تتكلمي مع أي حد زي ما كنتي بتكلميه.
أنا عاوزك تفوقي وتصوني نفسك، وتخرجي من أي علاقة محرمة، وافتكري يا بنتي إن أي علاقة بدايتها لا ترضي الله هتكون نهاياتها مأساوية ولن ترضيكِ.
افتكري أن ليكي أب تعب علشان يربيكي، ووضع كل ثقته فيكي، فإوعي تكوني سبب في كسرة ظهره!
بنتنا الغالية، لا تجعلي الله أهون الناظرين إليكِ، وخليكي مع ربنا، وارجعي لطهرك وعفافك وبراءتك؛ لأنك غالية يا بنت الإسلام، والغالية اللي عاوز يرتبط بيها يدخل من الباب مش ينط من الشباك.
ربنا يرضى عنك ويراضيك
