نعي الى مولاتي ام البنين عليها السلام ** اجت ام البنين ودكت ال | نعي ابو ذيات هوسات

نعي الى مولاتي ام البنين عليها السلام
**
اجت ام البنين ودكت الباب
وزينب واجفه والدمع سجاب
صاحت كومن الها اهنا يالاحباب
وخل تتعاون ويانه اعله المصاب

عن عباس صاحت سولفيلي
وفه لو ما وفه وياكم احجيلي
امنين النوم يايمه يجيلي
وضلت تسعر النار بدليلي

اذا عباس قصر بالطف انساه
وضل طول العمر زعلانه وياه
هذا ابني الجبير الحلو ملكاه
ربيته وتعبت اهواي برباه

لنها تصيح يايمه شتكولين
تره العباس ضحه بروحه لحسين
عفته اعله النهر والراس نصين
اجفوفه امكطعه والسهم بالعين


اخوتي امعدلين وخوش خوان
اهل فزعه ييمه وكلهم احنان
عفتهم نومه كلهم عله التربان
لو يمي الضهر ما ينكسر جان

صاحت فدوه اله يمه اربعتهم
وانه اعله الموقف علمتهم
اذا ينسون ما جان ارضعتهم
بس انه الولد للطف ردتهم

*
الشاعر
تحسين الخفاجي


https://t.me/joinchat/AAAAAEN4vuuUfDbAramBIQ