2021-07-07 20:25:18
بتاريخ 10/7/2019
طلعت نتائج البكالوريا بس مو متل مو معروف عنا بسوريا
بأنو لازم يطلع الوزير قبل بيوم ويقول أنو بكرا عالساعة 12 الضهر رح تكون النتائج عالموقع
على حظي أنا وبعد 3 سنين تقديم ويأس كتير كبير من النتيجة
عدا عن حكي العالم يلي حفظتو على مدار ال 3 سنين
قرر الوزير بوقتا يغيّر الروتين يلي اتعودنا عليه وحب يعمل النتائج مفاجأة
طلع بلقاء عالقنوات الرسمية والنتائج طلعت أثناء اللقاء
يعني طجت لعبت
خبرت بتلفون من أمي وماعدت أعرف شو اعمل
حتى الرابط تبع النتائج نسيتو
اتوترت كتير والحمدلله ربنا ماخجلني وعوضني عن تعبي بفرحة النجاح
وعلى قولة العالم المحيطة فيني يلي شغلتها بس تشلف حكي:
بعد 3 سنين رفعت راسنا وبيضت وشنا
اي رفعت راسكن وماعدت هداك الفاشل يلي بتنظرولوا نظرات دونية غريبة !
وبتاريخ 9/9/2019
انقبلت بكلية الآداب والعلوم الإنسانية قسم علم الإجتماع
الفرع مابعرف عنو شي غير اسمو
بوقتها طلعلي بالمفاضلة:
تاريخ
شريعة
فلسفة
علم إجتماع
شفت الاسم وشدني بطريقة غريبة
وكوني بحب جرّب كلشي جديد ومو معروف
قررت فوت هالفرع بدون تردد
وبتاريخ 28/9/2020
صرت سنة تانية بفرعي يلي صرت سمّيه بيتي التاني
والمكان يلي لقيت حالي فيه
بعد سنة دراسة بهالفرع
كانت تعريفية نوعاً ما
قدرت رفّع أغلب موادي وبعلامات مقبولة كوني ملتزم بشغل مع الدراسة
وهلأ بعد شهرين وشوي رح كون بالسنة التالتة بإذن الله
وكفي هالمشوار يلي بلشتوا بتفاؤل كبير
واعتبرتوا العوض عن كلشي بشع مرق !
الفكرة من الحكي فوق بتتلخص بكم جملة :
نجاحك بالحياة مانو مبني ع شهادة البكالوريا !
ومافيه حدا يقيّمك بالنسبة لحصولك عالشهادة من أول سنة أو بعد سنتين مثلاً
ويوصفك بالفاشل !
لو فشلت بالحصول عليها بأول سنة
ماتستسلم وماتعطي أهمية لحكي العالم
دير ضهرك وكفي مشوارك
رح توصل لهدفك وتكون بالمكان يلي بتلاقي حالك فيه مهما طال الوقت !
مبروك لكل حدا نجح اليوم وبالتوفيق لكل حدا ماحالفوا الحظ هالسنة
لـ عبدالرزاق سيد عمر
https://t.me/AbdSaidOmar
تعليقاتكن عالنص
@Aleppo_Abd_bot
646 viewsعبدالرزاق سيد عمر, edited 17:25
ل
