#قصيدة (معرض صور) بنص عالم الجنة انفتح  معرض صور للعتره يتضم | الشاعر عبدالله الشويلي

#قصيدة (معرض صور)

بنص عالم الجنة انفتح  معرض صور للعتره
يتضمن الصار وجره عن كربله والزهره

ولوحة عباس اعله الخيل
مرسومه بريشت جبريل


انطلق معرض بالسمه..... يخص كربلاء وفاطمه...... الأول بنوعه يصير
اكثر ألوانه منِ الدمه........ والأنبياء امحزمه....... رسموا بلا اي تقصير
لوحاتهم كلها ألم..... ماخوذه من عمق الخيم..... والجابهن جبرائيل
الفرشاة سوط ام الخدر..... امطهره منِ الشمر....وماخانهم اي تعبير

ارماح السبي صارن وتد والضوء يمهن يطفه
والوان مائية صنف من الفرات وجرفه

الوان بس دم تسيل
مرسومه بريشة جبريل
.
.
.
.
اولا نوح الي بده....... إبرسم  باب الوَحَده....... يشبه الباب الزهره
يمه جنين عله الأرض.....دمه على عيونه فرض.... وِطيور بيضه تنِظره
من عينه رش عاللوحه دم...... وبسمار أبداً مَنرسم..... تِلِچِم خاف العتره
ضل يحجي وعيونه تصب..... نحت السفينه مو صعب... أسهل ابميِّت مره

حمل السفينه مو حمل الحمل هاي الوحه
بيها ضلع بيها علي گدامه طاحت روحه

وارماد من عدها يِهيل
مرسومه بريشة جبريل

.
.
.
.
ابتده جبريل برسم...عباس وبصفه حلم .....عبدالله ماي يگله
عاللوحه وزع جم سهم..... وماعنده لاجف لاعلم...... ومطفيه عينه النبله
وجَسَدْ اگباله العلگمي....... ومنهم ابد ما محتمي.... ودم صدره ساح بضِله
اسهام بالجربه اكو........ وبصفه مكسور الاخو.... والطول محني كِله

بكل دقة يرسم بالگمر وأم الحسين تشوفه
انغمى اعليه وما گدر لمن وصل لجفوفه

بس لوحته تمطر هيل
مرسومه بريشة جبريل
.
.
.
.
لوحه نرسم بيها خيم...... محترگه وبصفها علم.... بنصهن أطفال وِرِضَع
البُعد الثلاثي منْ جمر....... تركض عليه ام الخدر..... اتروح مرة وترجع
واليِنظر اللوحه بعمق ...... يلگه خناجر بالطرق..... وزينب عليهن توگع
لوحه بلا ضل بس شمس...... مطفيه شمعات العرس..... وصياح محد يسمع

دخان بيها منتشر ما واضِحه دقتها
طاحت الزهره اعله الضلع لمن اجت شافتها

اعمده وِسهام اويل
مرسومه بريشة جبريل
.
.
.
.
باخر نهايات العَرض..... جاء المسيحي للفرض.... وراس الحسين ابايده
گال اني بالدنيا شفت........ راس الحسين وفرفحت..... وگتلهم راسه أريده
للبيت أخذته ومانمت....... بنظرة عيونه تحيرت....... والفن لبس تجريده
وچي ما نحت چفي الگمر...... ياناس موتني القهر...... خلوني انحته بهيده

بس مره شفته عالرمح وما راح وجه الغالي
كل ما اباوع للگمر  العباس يترس بالي

من صورته اخذ حيل
مرسومه بصورة جبريل


الشاعر عبدالله الشويلي