للأمام_المهدي_عج تتهنه لو تبچيله دم من تشرب الماي ياجرح كاسرل | الشاعر عبدالله الشويلي

للأمام_المهدي_عج

تتهنه لو تبچيله دم من تشرب الماي
ياجرح كاسرلك ضهر واجروحك هواي

الخلصوا اهله ذبح
عوجيته نلگاها رمح


يا لحيتك   مثل گلبك   اتربع الشيب وخذاها
عالسبيه   محني كلك   لسه تتبع خطاها
عيون عندك   تبچي لسه   عَجَب ما خلصت دِماها

الخِلصوا بس كتل اهله يحط عكازه بجفوفه
الرايح اله بشر بالخيل الحافر يترس اطيوفه

شايل گلب شايل وجع ماشالته اجبال
يا راحه الك؟ عندك ضعن مشدود بحبال

الما شاف بالدنيا صبح
عوجيته نلگاها رمح
.
.
.
.
شلون يمشي؟ العنده بالطف  شيخ ملموم بحصيره
يا ابو صالح  كلشي كسره  والسبي الكسره الجبيره
ترس اذنك  يا ابو فاضل  زينبك راحت أسيره

الركبت عالهزل عمته على اجناح الحزن يركب
الرايحله گمر بالماي من يعطش شنو شرب


من كربله لباب الضلع أصغر جرح بيك
بس جرح سَلب اعمامِته أهوايه ياذيك

الكل عمره بالدمعه يلح
عوجيته نلگاها رمح
.
.
.
.
غُربت الدم  والمناحر  وي غربتك لون واحد
المثلك انت  انگاب اسود  على وجهه دوم صاعد
المنذبحله  طفل ضامي  بريجه ما مر ماي بارد

بتجاعيدك دمع للطف امتداده من نحر عينك
أبيا مرقد أبيا هيمه وين مخلص اسنينك

بين البقيع وكربله گاضيها مشاي
الغيم من عينك اخذ غيث ونزل ماي

الروحه بالطف تنجرح
عوجيته نلگاها رمح

.
.
.
.
تگضي ليلك  حسره حسره  وحسرتك ماكو مثلها
وعلى گلبك  احبال تلتف  بشوغت المغرب تحلها
العيونه   تبچي من دم  بعد شيضل بشكلها

بين الباب والحايط أحلامك كلها منعصره
وبين الكاع والحافر قرآن انمرد صدره

منحور بالطف الطفل يالناحِرَك شام
محروگ گلبك سيدي چن حرگ الخيام

الگلبه چن جف الفلح
عوجيته نلگاها رمح
.
.
.
.
الشام حزنك  خله ضهرك  مثل ضهر حسين عالشط
بي مواقف  گبال زينب    رأس اخوها بطشت ينحط
بي ثكالى  گوه تمشي   ودمها ضل عالكاع ينحط

على بوابة الساعات  گعدت حتى ذيج النوگ
بنات العفه والغيره ما لايگ  عليها السوگ

مشيّت ثكالى مشيتك  گالولي متعوب
خنگت المحسن تختنگ لو مر الغروب

الماله  بالراحه صلح
عوجيته نلگاها رمح


الشاعر عبدالله الشويلي