من طحت يحسين والعسكر هجم حرگو علينه يبو اليمه الخيم | الشاعر ابو اسحاق الفحام

من طحت يحسين والعسكر هجم
حرگو علينه يبو اليمه الخيم
وحنه بس ايتام ضلينه وحرم
والمرض نحل جسم والينه
ــــــــــــــــــــــــــ
خويه خيل عداك وصلت للخدر
فرت النسوان كل وحده بكتر
وانه احشم يبو الغيره وانتظر
انت لو عباس تفزع لينه
ـــــــــــــــــــــــــــــ
من صهيل الخيل طشن بالفله
حرم چانت بالخدور مدلله
هسه لنهن بالبراري بكربله
خدر ماضل والعده مسلبينه
ـــــــــــــــــــــــــــــــ
ارده اخبرك عن سكينه وعن رباب
من لهيب الخيم لسموم التراب
فرن وهمهن يبواليمه الحجاب
عالحجاب انت الذي موصينه
ـــــــــــــــــــــــــــ.
الهجمو عله الدار والحرگو الدار
چنهم يطلبون من حيدر الثار
بخيمة السجاد من شبت النار
وحالت النيران بيني وبينه
ـــــــــــــــــــــــــــــــ
والرباب الحالهه اعظم واشد
شابچات اثنين اديهه عله المهد
تگلي خاف النار توصل للولد
نست لنهم بالسهم رامينه
ـــــــــــــــــــــــــــــــــــ
رمله تنشدني عله جسام بذهول
وين خيمة عرسه يازينب تگول
مبين عله خدوده ياعمته الذبول
مو بحنه بالدمه محنينه
ــــــــــــــــــــــــــــ
طفله تنشدني على درب النهر
تريد توصل خويه يم عمهه الگمر
تگله ياعمي الگلب مني انفطر
واعدتنه من الضمه تروينه
____
من الخيم فرينه ما ندري لوين
وين ننطي الوجه من طاح الحسين
والكفلنه لايسار ولايمين
لينه يفزع لون عنده يمينه
___
خويه اجانه الليل وايتامك تره
كلهه بالبر يبو اليمه مطشره
صدگ يقبل بيهه سبع الگنطره
آل اميه خلافكم تحمينه
___
الشاعر أبو إسحاق الفحام