قصيدة عنوانها (اجيتك يالحسن ) سيدي يا كريم اهل البيت ع ارجوا منك المسامحة عن تقصيري بحقك __ إجيتك يالحسن ومقدم أعذاري ظلمتك بالذكر وبذاتي وشعاري ____ ابدي بيمن ابدي بهل وضع جاني شكَولن لو اشوفك يخرس لساني وا تعذب قهر لو لحظة تنساني وحس حامل ذنوب وثكَلت اوزاري ___ كلامي واضح وشهدتلي اذنوبي عجيبة شلون نسيتك وانت محبوبي بقيت بصحرة وحدي متيه ادروبي طفل ضايع احس بليلي ونهاري ___ كريم الجود بية باقي تفكيرك والك مديت جفي ما ردت غيرك عشت منك نبات وينمو من خيرك ونة الناسي الفضل واتعذب بناري ___ أتئنب ضمير ويخجل احساسي واتمنَّة العذاب اليكَطع انفاسي حتى اذكرك ما ابقة الك ناسي فريضة بكل ثواني أنوي تذكاري __ نسيتك صح ولاكن راجي تعذرني مصاب امك سمعتة بلوعة دمرني كَمت كل ما اشوفن باب ِ يجرحني وهيس فاطمة دكَول احترك داري _ و حسين من اذكرة يندهش بالي علة طول الوكت ما ادري بفعالي وآيات النحر تشرحلك احوالي ودمَّة يالحسن مثل النهر جاري ____ راسم كربلة من غصة إجروحي لوحة بكَلبي مرسومة بئلم روحي واذا ارسم حديد آنة اكتبة بنوحي واتخيل مرة مجتوفة بفكاري ____ وحكَك يالحسن هذا اليشاغلني عبد وبابك امناطُر تسامحني عليك اقسم ضلع امك تواعدني باجر لو متت خير اسمع اخباري ____ كتبت بكرم الحسن #الشاعر_حسين_النوري سنة / ٢٠١٥ / بغداد الوزن / تجليبة لا يجوز استعمالها ب D J 96 views#الشاعر_حسين_النوري (ابو_إيليا), 07:20