2019-09-30 01:15:19
كربله او مشايه اشعظمهه الآيه
المايشوف احسين عايش بـ الوجود
اهوه والميت سوه عوفه اللدود
هل ملايين التشد للـ طف رحال
تطوي ابهمّه مسافات الطوال
ناشره ابـممشاهه عنوان المقال
يـ التحب احسين ويانه تعال
نحضر ابن الزهره انطوف كلنه ابگبره
الما يلبّي الفطرته ابوكت العهود
اهوه والميت سوه عوفه اللدود
رايه رايه وره رايه تستدير
بـربعين احسين واگلوب التطير
عله اجناح الشوگ ارباب الضمير
والمواكب عامره ابطول المسير
هله بل زاير هله هله ابگاصد كربله
ياهو الينكرهه كل هاي الحشود
اهوه والميت سوه عوفه اللدود
من الاهواز الحبيبه الكربله
للمحمره والشلمچه المرجله
ولخفاجيه لحد السابّله
منفذ الچذابه كلهه امهلهله
هله زاير مرحبه الك كلشي التطلبه
لايهمك حچي اي واحد حقود
اهوه والميت سوه عوفه اللدود
واهل العراق الحمل يمهه ينوخ
كظهه من البصره حد سوگ الشيوخ
والعماره او ناصريتهه الشموخ
امسابگ ايعزبون والعالم يدوخ
شنهي هاي الوادم تچرم الكل قادم
رغم انف العدو اتنادي ابصمود
اهوه والميت سوه عوفه اللدود
اتشوف اهل النجف تفرشهه الجفون
طالعه تتلگه زوار اليجون
تحرِم المشايه عدهه او يگصدون
الطواف احسين رغم المغرضون
ترفع الهه رايه ساعيه المشايه
عمه المايگدر يشوف الهل وفود
اهوه والميت سوه عوفه اللدود
من عمود الاول الحد الگمر
يعني من حيدره العباس السفر
تزكيه او عرفان ايثار او فخر
والسفينه احسين منجاة الخطر
ربنه گل الطاهه والنبي علناهه
متم نوره الله او كلمن جحود
اهوه والميت سوه عوفه اللدود
عادل الصخراوي القريشي
عله انغام المحبه والخداميه
الك يحسين شاع الشوگ طاريه
گلبي ابكل نبض يرفعلك الرايه
روحي الكربله مولاي مشايه
يه معشوگ الضمير المستنير ابگلب عشاقه
حكاية معرفه متشرفه للنفس إشراقه
مداد امنل غرام ايدث هيام الروح اوراقه
يوقّع ياهو خدماني احضرنه
وأنه البيدي اوسده وآنه اجبلنه
شايع خادمك للناس طروايه
روحي الكربله مولاي مشايه
يمن گطر النده منك بده وكتسب تبجيله
واخذ من گبّتك ومحبتك عتبار تقبيله
معه وكت الفجر حين اليطر بـآذان تنزيله
ينادي امنل طفوف او معتني قادم
لرواح التحب احسين متوالم
وآنه امنل شجون امسابگ اهوايه
روحي الكربله مولاي مشايه
بعذوبة حنانك والتفاتك اصبحت والي
علانيه اوهمس هاي النفس تفداك يل غالي
متعرّش دليلي يا خليلي او بيرقك عالي
عله اجناح الموده اويه الدمه تسري
وتلالي ابعيني دمعي من يجري
نار الفرگه تدري حيل چوّايه
روحي الكربله مولاي مشايه
يبوطبع الشجه والمرتجه ابكل كرب وآلامه
العادل بين اخوته لو ضنوته او بين خدامه
عطر ريح المريح المنتشر للباري بـآنامه
يلمغازل هواجس شاعر ايوصفك
يبو چلمة علي لل لاطم ابلطمك
يامن بل محبه منعرف آيه
روحي الكربله مولاي مشايه
الي ابليل الذنوب اشما اتوب اتكون گمرايه
اطوفك يللي اشوفك نفس تجري او صاير الغايه
اعشگك عله بختك لا تهدني رجه مولايه
اظلن دوم بسمك افتتح يومي
وبذچرك اسامر حد مجي نومي
اكابر عل بُعد يا عشگ دنيايه
روحي الكربله مولاي مشايه
عادل الصخراوي القريشي
https://t.me/adelsakhravighoreshi
1.0K views22:15