حي الاكبر من گصد عدوانهه الخيل هجت شاهت بفرسانهه ،،،،،، | قناة الشاعر ابو عمار الدراجي🇮🇶🇮🇶
حي الاكبر من گصد عدوانهه
الخيل هجت شاهت بفرسانهه
،،،،،،،،،،،،،،،،،،،
الخيل هجت والزلم تردم زلم
تلاوي چف الموت ماعدهه حزم
تشوف سيفه گام يلهمهم لهم
وما يهمه الجيش رج اكوانهه
،،،،،،،،،،،،،،،،،،
ما يهمه الجيش عده ولا عدد
هذا شبل حسين يا نعم الولد
هاشمي والسيف وياه انولد
علي الاكبر كل حرب ريسانهه
،،،،،،،،،،،،،،،،،،
علي الاكبر لو نزل تخرس رجال
مثل حيدرمن يطب سوح القتال
يعتني الابطال ما يعرف محال
وفنهه تثبت ما تظل بمچانهه
،،،،،،،،،،،،،،،،،
فنهه تثبت هل كتايب من يغير
تختنگ بل خوف بل شرده تحير
والبگه مذهول مايدري اشيصير
الشمس كسفت وختلف دورانهه
،،،،،،،،،،،،،،،،،،
الشمس غابت ضيهه ابداً مابقه
بس برق سيفه ويضوي للفظه
صار امر الموت بيده والقضه
ومنه صاحت غوث كل جيمانهه
،،،،،،،،،،،،،،،،،،
منه صاحت غوث افرغ للسروج
خله ذيچ الگوم بدماهه تفوج
حير الفرسان من عزمه تلوج
وبكر تشهد جثته وكوفانهه
،،،،،،،،،،،،،،،،،،
جندله والراس جابه الوالده
وبل صبر الحسين الله ايساعده
ايگله عفيه اعليك يمروع العده
وعل الارض سويت تل ابدانهه
،،،،،،،،،،،،،،،،،،
لصدره ضمه گام يجذب حسرته
والدموع انهار بلة لحيته
يبني گلبي عليك تدري شصابته
الف نبله وما خطت نيشانهه
،،،،،،،،،،،،،،،،،،،
لخادم خدمة الحسين ع
ابو عمار الدراجي
https://t.me/adoamar
