ثقتي في نفسي كانت بتخلي الناس اللي حواليا تحس إنه أنا متكبر. أنا سعيد إني اقنعتهم بده... وسعيد كمان بالناس اللي قدرت تفهمني وكملت معايا.
دلوقتي وأنا داخل على 33 سنة هل أنا إنسان مهم فعلا؟ ولا أنا كنت عايش في وهم كبير؟ 33 سنة مقدرتش لحد دلوقتي أتأكد من أي حاجة.
بحب إيه.. بكرة إيه.. هل أنا إنسان سعيد؟ هل أنا تعيس؟ إيه هي الحاجات اللي عايزها؟ هل حققت اللي حلمت بيه في الفترة دي؟
33 سنة من الأسئلة.. 33 سنة من الأجوبة المتغيرة.. 33 سنة من الاختيارات اللي مش شبه بعضها لنفس المواقف.. 33 سنة ولسه بكتشف أنا مين.
أنا شخص ببساطة محدش يقدر يقول إنه يعرفني.. لأني أنا ببساطة معرفنيش.. أحيانا بسأل نفسي إيه جدوى الحياة وأحيانا بتخانق مع حد شاور براسه بطريقة معجبتنيش.
هل أنا مؤذي؟ بالنسبة للبعض أكيد.. وبالنسبة للبعض مستحيل، بس المؤكد إن الحياة مملة لدرجة إنها بتخليك أحيانا تضحك على اللي جنبك لما يقع على وشه (بالمناسبة أنا بكره ده).
أوقات كتير كنت مستمتع وسعيد، أو حزين، وأوقات تانية كنت لا مبالي. بس طول الوقت كنت بدور على نقطة ثابتة أرجعلها. أوقات كنت بلاقيها أوقات كانت بتلاقيني.. وأوقات أخاف.. لا مش أوقات؛ كتير كنت بخاف.
30 سنة اتعلمت فيهم إن مفيش أي ثوابت.. كل شيء قابل للتغيير، إحنا نتاج تجاربنا. حطني في تجربة هطلع بنتيجة، وديني تجربة تانية هطلع بنتيجة ثانية. بعدها رجعني للتجربة الأولى هطلع بنتيجة تالتة. عشان كده أنا ابن التجربة.
هل أنا ذكي؟ أعتقد.. وذكائي وصلني لفين؟ وصلني أتعلم من أخطاء اللي حواليا.. ووصلني أتأقلم بسرعة.. وصلني كمان إن أبذل نص المجهود اللي بيبذله اللي حواليا وأعيش مرتاح أكتر منهم.. ووصلني إني أعرف إن الحياة قصيرة وطويلة في نفس الوقت.. قصيرة بالنسبة لعمر الكوكب.. وطويلة بالنسبة لشخص سريع الملل زيي.
أنا مش عارف أنا بقول الكلام ده ليه. اعتبروه فضفضة. لسه معنديش القدرة أقول ده قدام الناس على حساباتي الرسمية.. لسه. شايف إن في صورة عامة معرفش أشوهها. إحنا منعرفش بعض وده أكتر حاجة مريحة ليا.
