إمام الما يشّور محد يشتريه بفلسين .. أن تصل درجة الاستهتار وال | اياد السماوي
إمام الما يشّور محد يشتريه بفلسين .. أن تصل درجة الاستهتار والتحدّي لقرارات المحكمة الاتحادية العليا لهذا المستوى الي تدفع جرد موظف مثل رائد جوحي الي متعيّن بالوكالة حتى مو بالأصالة ، أن يصدر أمر ديواني ينهي بيه تكليف مدير عام ويكلّف بمكانه واحد ثاني مع العلم أنّ رئيس الوزراء مسؤوله المباشر نفسه ما يملك صلاحية تكليف واحد وإنهاء تكليف واحد بموجب قرار المحكمة الاتحادية العليا رقم ( ١٢١ / اتحادية / ٢٠٢٢ ) الي صدر قبل بضعة أيام وبعده تازة ويلبط .. طبعا رائد جوحي مو ما يعرف أنّ تحدي قرارات القضاء وعدم الامتثال إلها هي جريمة يعاقب عليها القانون بالسجن ، لا لا وشرفكم يعرف هاي كلش زين ، بس هو يدري أيضا أن قرارات هذا القضاء حبر على ورق والحكومة ما تشتريها بفلسين حمر ، ما أگول ما تشتريها بطگاگية خاف هاي العبارة شوية ثگيلة ، ولو كان يعرف الطاوة حارة وهذا الأمر الديواني الي انهى بيه تكليف ( علي ناصر بنيان ) وكلّف بمكانه ( ياسين العزاوي) راح يوديه للسجن لانه تحدي لقرار أعلى سلطة قضائية بالبلد ، والله ثم والله ما جرأ لا هو ولا رئيسه الي ضرب كل قرارات المحكمة عرض الحائط ولا داير بال الها ، والدليل على ذلك لو كان رئيس الوزراء يحترم قرارات القضاء لكان التزم بقرار المحكمة الاتحادية العليا الخاص بكردستان وامتنع عن إرسال الأموال لحكومة الإقليم .. لكن وللأسف الشديد أن قضائنا خوش قضاء وقراراته خوش قرارات لكن الحكومة ما تحترمها .. وهذا يذكرني بالمثل الي يگول إمام الما يشّور محد يشتريه بفلسين أو ما ينزار ..
