كلشي غربه ياعلي صار ابرحيلك كلشي غربه بويه بس ارجع دخي | قصائد حسينيه للشاعر ابو اسد البزوني

كلشي غربه ياعلي صار ابرحيلك
كلشي غربه بويه بس ارجع دخيلك
چاشلي بحياتي ماتت امنياتي
----()()()()------

بالريه احس ضاگ النفس وفترت احوالي
حال المره يتعب تره لودعت غالي

ضگت طعم الهجر ماينجرع شفته
الابو لو مات شيضل ابگلب بنته
وابوي انه علي بيديني غمضته

بچف اديه غمضت اغلى الحبايب
بچف اديه استقبلت چف النوايب
اتمنه مماتي ....ماتت امنياتي
----()()()()------

ديره غرب صار الدرب من جثته شلناها
كلشي انكسر حتى الضهر هالحضه عشناها

اول مره احسن ينكسر ضهري
تره التابوت شالو بي احس عمري
ابوي بهالسهوله يروح وين ادري

ما حسبنه توگع الخيمه التلمنه
ما حسبنه ندفن ابلحضه وطنه
كثرن نايباتي ....ماتت امنياتي
----()()()()------

درب الگبر بدرب اليسر اتصوره اهوايه
نفس الكسر بس الشمر ماماشي سبايه

نفس الحاله جنها انعرضت اگبالي
وابن ملجم صبح مو شمر كتالي
ابوي وداعة الله اشگد احس غالي

غالي ابونه وفرهده الموت امندينه
غالي ابونه وغمضت بچفوفي عينه
طفوها ضواتي ....ماتت امنياتي
----()()()()------

الفاگد وطن عاش الزمن متخوصر اصفاحه
صف حالته المن چبدته مگطوعه سباحه

ما يعرف صباحه يگوم من ليله
اليفگد مدري ليش يروح كل حيله
راح الچان يعدل لو حچه الميله

خله بانت حتى بعروش الظلاله
خله بانت بالارض موبس عياله
يالبسمك نجاتي ....ماتت امنياتي
----()()()()------

لثگه اصبحت من اكتبت فعل المراجل
ساس الغدر جوه الصفر للوسفه نازل

مو كل الزلم لو اعدها رجاله
الزين التلگه كون امخضره افعاله
ربع النبي اشسوو بعده بعياله

بعده گامو حرگو الدار اعلى بنته
بعده گامو من علي نزعو رتبته
اتمنه وفاتي ....ماتت امنياتي
----()()()()------

ابو اسد البزوني