عالباب ضلت عيني مشبوحه يابشر مثلي هاجرت روحـــــه انه والميت | قناة الشاعر محمد هادي الفهداوي
عالباب ضلت عيني مشبوحه
يابشر مثلي هاجرت روحـــــه
انه والميت ســــــــوه
وفارگ عيوني الضوه
،،،،،،
الهاجرت من عنده ناسـه
يموت بس عوزه جفـــــن
تفرهد بحيله المصيبـــــه
ودمعته تنزل مــــــــــحن
فارگت عافيتي كلهــــــــا
وهسه صرت بلا وطـــــن
تواردت وي الجــــــــــنازه
من ابتعد عني الظعـــــــن
ايدي اعله خدي ودمعتي تجري
ابقه انتظر لو امــــــوت ما ادري
من الدمع خدي نچوه
انه والميت ســـــــــوه
،،،،،
داري صارت من بعدهم
هواي تشبه للگبـــــــــــر
الورده تذبل من طبعهـــا
ياهلي من تنكســـــــــــــر
وانه چف وكتي لزمنــــي
وبيه ضل يعصر عصـــــر
اوي الضعن منعدني هاجر
ومارجع ليه العمـــــــــــــر
يشهد عليه اليل ونجـــومه
بحسرة الراحه ولذة النومه
تفاركت وي الهوه
انه والميت ســوه
،،،،،،،،
اه ياحسرة رقيـــــــــــــه
العنــــــــــي راحت ماترد
چنه من نگعد سويـــــــه
نسولف بطاري الـــــــــورد
فارگتنــــــي وروحي ظلت
ملوعه بنار البعـــــــــــــــــد
ودمعتي چنها يتيمـــــــــــه
من چفن عيني تهـــــــــــــد
الشوفت رقيه عيوني مشتاگه
وبيه حنين ولهفه ومــــــــلاگه
احلف براعي الوه
انه والميت ســوه
،،،،،
ياهوه سلم عليــهــــــم
وبوسلي حته الطفـــــل
وگلهم الفرگه ثگيلـــــــه
والهجر ماينحمــــــــــــل
كاتبه عيوني رسالـــــــــه
الوالدي بدمع اليهــــــــــل
تستحي بنتك تگـــــــــلك
ليش بس انه انعــــــــــزل
راحت خواتي وانه عفــــتوني
من الضرب خايف على متوني
يالمشيتو النينوه
انه والميت سـوه
،،،،،،،،،
خالي مهد الطفل خـالي
گــاعده وبچفوفي اهـــز
باقي بس اگماط ذكــــره
وظحكه ومناغه وحـــــرز
اتصوره مرات نايــــــــــم
ويبچي من ابچي ويفــــز
ياهلي عذروني كلكـــــــم
ايعاتب اطباع اليعــــــــــز
يَعزاز روحي فدوه عذروني
انتم حياتي وانتم عيــــوني
من القهر عظمي خوه
انه والميته ســــــــــوه
،،،،
لخادم الحسين ع
محمد الفهداوي
