روحي أشتاگت لروحك يالبعيد رحت وتاهت اعليه المواعيد سنين مرت و | الشاعر عباس الفرطوسي الكربلائي
روحي أشتاگت لروحك يالبعيد
رحت وتاهت اعليه المواعيد
سنين مرت وأنه ما ناسيتك
بكلشي ما مقتنعه ومتانيتك
يالبعيد يالبعيد
...........
ما اقتنع كلشي انتهه واترك عتب بيبانك
وما بطل البالكت يجي واكعد واسد ديوانك
بالكي الله ياخذني النشد ويوصفولي مجانك
واتبع إثر ضعنك ركض واوصل كبل عدوانك
وتتلكه امك ويتحقق الطيف
وابوسن نحرك الما لايحه السيف
كون سالم ترجع اتمنيتك
بكلشي ما مقتنعه ومتانيتك
يالبعيد يالبعيد
..................
من اسنين رد ضعنك الي وادري الضعن رد خالي
ميت انه ادريبك لجن ما يرضه يقنع بالي
يمه وبعدها اعله الدرب لسه العيون تلالي
والكاع حفضت كعدتي ومل مني حته خيالي
كلي اشلون اقّنع روحي وانساك
واهو كلبي جفه اضلوعي ومشه وياك
من كلب ولسان انه احتاجيتك
بكلشي ما مقتنعه ومتانيتك
يالبعيد يالبعيد
..................
بشر ابن حذلم من اجه ولدج عطاشه ينادي
كال اربع أولاد وكلت ما ناشده اعله أولادي
سولفلي عن نبض الكلب اعله حسين لب افادي
كال انصلب راسه برمح وجسمه انسحك بالوادي
لو مو ميت ومرفوعلك راس
ما اصدك لون جدامي تنداس
ما اصدك تنذبح تاليتك
بكلشي ما مقتنعه ومتانيتك
يالبعيد يالبعيد
...............
بوب المدينه بكل فجر الزمها وانشد عنك
خافن غفت عيني ونمت ومن يمها عابر ضعنك
من ما تجاوب انهضم بس ما اايس منك
وابقه انتضر بالكت ترد وعيوني يشوفنك
تمنيتك تجي بكد ما تمنيت
وما اكدر اطبن يمه للبيت
الهوه لهذا اليوم ما طب بيتك
بكلشي ما مقتنعه ومتانيتك
يالبعيد يالبعيد
...........................
ليليه أرد لعتبتي واغفه اعله كسرة خاطر
ادريبه ما يرجع الي بس لسه كلبي يناطر
وليله انخه واندعي بالكي الله ويرد باجر
جم باجر وباجر اجه وحسين بعده مسافر
ما اعوف انتضارك يبني يحسين
إله بشوفتك تتكحل العين
امك وترجع الي تمنيتك
بكلشي ما مقتنعه ومتانيتك
يالبعيد يالبعيد
عباس الفرطوسي الكربلائي
