قصة تحفة ....هتحبب الاطفال في اللبن حدوتة النهاردة ..( حمزة | تربيه جيل الأمه
قصة تحفة ....هتحبب الاطفال في اللبن
حدوتة النهاردة ..( حمزة و اللبن )
تأليف و كتابة : شيماء عبدالعال
كان ياما كان ....كان في زمان ولد اسمه حمزة .....حمزة كان ولد شاطر و مؤدب .....لكن مشكلته الوحيدة انه مش بيحب اللبن .....لكن كان بيحب يشرب البيبسي بس .و كان دايما بيتهرب من مامته لما تقوله يلا يا حمزة اشرب اللبن ....... بليل يعمل نفسه نام و نسيه ......و الصبح يقول مش بحبه طعمه وحش .
باباه كان دايما بيقوله : يا حمزة انت لسه صغير و جسمك بيتبني .... ...و عشان جسمك يبقي قوي لما تكبر و اسنانك كمان تبقي قوية و متتكسرش .... لازم تشرب اللبن . ......لان اللبن مليان فيتامينات و كالسيوم و الحاجات دي هي اللي بتقوي جسم الانسان ....مش البيبسي .
لكن برضه حمزة مكنش بيشرب اللبن و كانت حجته انه طعمه وحش ........ و في يوم من الايام مامه حمزة جابتلوا كوباية لبن عشان يشربها قبل النوم ...... . .حط حمزة الكوباية جمبه و بعد ما مامته نامت ..... اخدها و حطها في التلاجه ... و راح نام علي سريره.
و هو نايم حس انه عطشان اوووي فقرر انه يقوم يشرب مايه من التلاجة ..... .و اول ما قرب من التلاجة سمع صوت كأن حد بيعيط .......فضل حمزة يقرب من التلاجة و صوت العياط يقرب و يزيد ... . . و لما فتح حمزة التلاجة اكتشف ان كوباية اللبن الي مشربهاش هي اللي بتعيط . .
اول ما شافها حمزة بسرعه مسكها و اخدها و قفل التلاجة و سألها مالك انتي بتعيطي ليه ..... ردت كوباية اللبن و قالتلوا ....يعني مش عارف انا بعيط ليه .......رد حمزة و هو مكسوف منها ...... هو انتي بتعيطي عشان انا مشربتكيش و حطيتك في الثلاجة ....... .
ردت كوباية اللبن و قالتلوا ....يعني هو انت مشربتنيش النهاردة بس .......انت مش بتحبني و مبتشربش مني خالص .و علي طول بتحب تشرب من المشروبات الساقعه دي البيبسي و البرتقال و السفن .......
مع اني و الله مفيدة جدا للاطفال ......و فيا فيتامينات كتير اللي بتغذي الجسم و بتكبره و بتخليه قوي .........
و كمان فيا الكالسيوم اللي بيقوي العظام و الاسنان ...... لكن السبب بقي اللي خلاني اعيط هو ان ازازة البيبسي بتاعتك اللي في التلاجة عمالة تغيظني .........
و تقولي انا حمزة بيحبني اكتر منك .......و كل شوية يجي يفتح التلاجة و يشرب مني .........
انا نفسي اعرف بس يا حمزة انت ليه مش بتحبني ........ رد حمزة و قالها اقولك السبب بس متزعليش .....قالتلوا كوباية اللبن ... قول و مش هزعل .... قالها اصل انتي طعمك وحش لكن البيبسي طعمه جميل و مسكر ......و يا سلام بقي لما يبقي ساقع بيبقي لذيذ اوووي
اضايقت كوباية اللبن جدا من حمزة و قالتلوا ....بس علي فكرة البيبسي اللي بتقول طعمه حلو اوي دة ضار جدا للاطفال ...... ..
. بيضعف عظمهم و بيخلي جسمهم كله ضعيف و كمان بيخلي اسنانك تبقي ضعيفة و تتكسر بسهولة ...... و لما جسمهم يبقي ضعيف .... ....بيبقي سهل اوي تدخل فيه الامراض . .
اتخض حمزة اوي لما سمع كلام كوباية اللبن و قالها انتي بتتكلمي بجد ..... .ردت و قالتلوا ..... و الله بجد و لو مش مصدقني اسال باباك و مامتك و اتاكد منهم
كملت كوباية اللبن كلامها و قالتلوا طيب انت جربت تحط عليا كاكاو و سكر و تدوقني .. ....قالها حمزة ...لا .....قالتلوا طيب جربت طعمي و انا معايا فاكهة ....... و معمولة عصير في الخلاط .. رد حمزة و قالها برضه لا ........ قالتلوا كوباية اللبن دانا بيبقي طعمي لذيذ اوي ...مع الموز و الجوافه و كمان الفراولة ....... . .
قالتلوا طيب جرب و صدقني طعمي هيعجبك . ابتسم حمزة و قالها اوعدك اني هجرب ......فرحت كوباية اللبن و قالتلوا يلا بقي رجعني التلاجة و اشرب ماية و ارجع لسريرك .......... .
ضحك حمزة و قالها لا انا مش هشرب ماية انا هشربك انت ......... . و فجأه صحي حمزة من النوم علي صوت مامته و هي بتقوله يلا يا حمزة هتتأخر علي المدرسة .......قام حمزة من النوم و اكتشف انه كان بيحلم ........
بس كان حلم جميييييل ....و راح لمامته و طلب منها تعملوا كوباية لبن بالكاكاو دافية يشربها قبل ما يروح مدرسته .
