حدوتة النهاردة ....( كندة و العصافير ) كتابة و تأليف : شيماء | تربيه جيل الأمه
حدوتة النهاردة ....( كندة و العصافير )
كتابة و تأليف : شيماء عبدالعال
الهدف منها توعية الاطفال بان الله هو الرزاق
كان يا ما كان .....كان في زمان .. ..بنوتة جميلة و رقيقة اسمها كندة.. ...كانت كندة بتحب الطيور جدا .....و في يوم من الايام صحيت كندة علي صوت صوصوة عصافير عالي جاي من ناحية البلكونة .... ...جريت بسرعه ناحيتها .... بس مش شايفة حاجه .....
ندهت علي مامتها علشان تفتح لها البلكونة و يدخلوا يشوفوا الصوت دة جاي منين .. ..
و لما دخلوا اكتشفوا ان صوت الصوصوة طالع من كارتونة قديمة مامتها كانت حطاها في البلكونة فيها حاجات مش بتستخدمها ..
و اكتشفوا ان عصفورتين عاملين عش صغير جوة الكرتونة القديمة دي .....و كان فيها بيضتين فقست و طلع منها عصفورتين صغيرين ......
فرحت كندة جدا بيهم ....و بقت بتصحي علي صوتهم كل يوم و بتبابعهم من بعيد ....و بتتفرج عليهم و باباهم و مامتهم بيطيروا يجيبولهم الاكل و يجوا يأكلوهم في بوقهم ......
لانهم لسه صغيرين و كمان مش بيعرفوا يطيروا .....
و في يوم من الايام صحيت كندة علي صوت مطر شديد .. ..و صوت الرياح كان مخيف .....جريت بسرعه علي العصافير علشان تتطمن عليهم ...
لكن للاسف لاقيت العصفورتين الكبار ... واقعين في الارض و ميتين ....
و اولادهم الصغيرين في العش بيصوصوا و شكلهم جعانين ....قعدت تعيط و ندهت لمامتها ....و فضلت تقول و هي مضايقة ليه حصل كدة يا ماما .. ..ليه ماتت العصافير الكييرة و سابوا اولادهم الصغيرين .
مين اللي هيأكلهم ؟؟؟ .....كدة هيموتوا هما كمان ....مامتها طمنتها و قالتلها ان ربنا هو اللي بيرزقنا.....باكلنا و شربنا و كل حاجه ....فمتقلقيش ...ربنا قادر انه يرزقهم هما كمان....لان ربنا قادر علي كل شئ.
لكن كندة برضه فضلت تعيط و زعلانة و متضايقة و تقولها ازاي بس يا ماما ...ازاي ... رن جرس الباب ...كانت جارتهم اللي ساكنة تحتهم جاية تطمن عليهم .....و لما عرفت السبب اللي مخلي كندة حزينة اوي كدة ..،،
قالتلهم...انا كمان عندي عصافير عاملين عش في البلكونة تحت و عندهم عصفورتين صغيرين ولادهم ...،و فجأة جاتلها فكرة جميلة جدا ...
قالتلهم طيب ايه رايكم لو اخدت العصفورتين الصغيرين دول و حطيتهم في العش بتاع العصفورتين اللي عندي.... . و كدة ممكن العصافير الكبيرة يأكلوهم مع ولادهم ..،،
فرحت كندة جدا و قالتلها يا ريت يا طنط ..،،و راحت مع جارتهم تساعدها في نقل العصافير الصغيرين ....و استنوا لما العصافير الكبار طاروا و راحوا يدوروا علي اكل لاولادهم ... .
و راحوا حاطين العصفورتين الصغيرين جمب التانين و دخلوا بسرعة ووقفوا وراء باب البلكونة يتابعوا هيحصل ايه ... ..
و لما رجع العصافير الكبار الام و الاب بالاكل .... ..بدأوا يأكلوا العصافير الاربعة في بوقهم ......فرحت كندة و مامتها و جارتهم جدا ان الفكرة بتاعتهم نجحت ....
ووقفوا يتفرجوا علي العصافير الصغيرين الاربعة و هما بيأكلوا لحد ما شبعوا ....
و ساعتها بس كندة حضنت مامتها و قالتلها كان عندك حق يا ماما لما قولتي ان ربنا قادر يرزقهم بالاكل و الشرب زي ما بيرزقنا احنا كمان ....
وتوتة توتة خلصت ملحوظة : حدوتة النهاردة مستوحاة من قصة حقيقية .
خلوا اولادكم يجاوبوا علي الاسئلة دي : 1-صحيت كندة في يوم من نومها علي صوت ( قطة بتنونو -كلب بيهوهو -عصافير بتصوصو ) 2-العصافير طلعوا عاملين العش بتاعهم ( في كرتونة قديمة -علي الشجرة - في السقف) 3-بسبب المطرة الشديد و البرد ( ماتت العصافير كلها - ماتت العصفورتين الكبار -ماتت العصافير الصغيرة ) 4-كانت كندة حزينة علشان العصافير الصغيرة ( ماتت -طارت -جعانين ) 5-الخطة اللي فكرت فيها جارة كندة (فشلت و لا نجحت )
