2022-07-27 18:45:28
شيخلّص الليل .. شيجيب الصبح
واتخيلك جاي .. بس ما منذبح
يحسين أتاني تجيني .. وللكافل اشتد حنيني
شيجيب الصبح
....
گاعده بلا خيمه اتاني .. يخلص الليل وظلامه
وانتظر شمس الله تطلع .. واحظه منك ببتسامه
بلكي وتمر بيه خويه .. خاطر اتفرح اليتامه
وكلشي ما بيك واكلك .. حمدُ لله عالسلامه
خويه انتظر صبحية الله الحلوه
وترجعلي ما مذبوح ما تتلوه
وعباس كونه وياك يرجع فدوه
متصبره خويه وداعتك بالگوه
ودموعي التسيل .. عالخد من جمر
تمسحهن وريت .. بيدك انتظر
واعليك انادي بونيني .. وللكافل اشتد حنيني
شيجيب الصبح
.......
يا نسيم الله الاشمه .. ويطفي نار بريتي تلهب
تدري اتنفس وجودك .. ميته دونك يعني زينب
لو حلم باليقضه مُرني .. لا تمرني بنومي اتعب
شيبِت كلي بمغيبك .. خويه مو بس گلبي شيب
ماانام يا نوم التشوفه عيوني
من تعمه كون بوحشة العافوني
وشلونه حالك هسه وانه شلوني
يحسين والعباس شيبتوني
متعوّده اعليك .. يا ضي النظر
ومتلهفه لعيون .. عباس الگمر
اصفگ يساري بيميني .. وللكافل اشتد حنيني
شيجيب الصبح
.......
يا كلام الله المينمل .. يا حلاة الجنه كلهه
يا صبح مرني واريدك .. تگضي هاي الليله گِلهه
نامت عيون اليتامه .. وبالمنام عيوني شلهه
كربله انشدّت بديه .. وشوفتك إنته تحلهه
يا رحمة الله ونعمته مر بيه
رد راسك لجسمك يخويه شويه
ارجع عدل يحسين حن اعليه
اي حتى لو ترجعلي بس صبحيه
خليني اصد ليك .. لو مره ردت
وتطيب الجروح .. بعدك ما هدِت
مشتاگه الك تدري عيني .. وللكافل اشتد حنيني
شيجيب الصبح
.....
يا حسين الليل طوّل .. وانه صبري اعليك گوّض
ماكو حيل ايعين گلبي .. فاگده اني الميتعوّض
إرجع انتظرك واعدلك .. ساعه ساعه يمته تنهض؟
والصبح بلله شيجيبه .. ويمته هذا الليل ينفض؟
ايدي اعله خدي وحسبه تتبع حسبه
واحچي ويه روحي بنارهه الملتهبه
هم يرجع حسين الدليلي يحبه
ولساني يابس من كثر ما اندبه
بسمك يالحسين .. من گد ما صحت
گلبي تعب حيل . وشگد فرفحت
وجهك رسمته اعله عيني .. وللكافل اشتد حنيني
شيجيب الصبح
......
هذا آخر ليل يمك .. وشيخلصه الليل گلي
ظلمه ما اشوفن بياضك .. يالبياضك تارس اهلي
روحك اترد خويه بلكي .. عيشه بعدك بيهه شلّي
والصبح وجهك اشوفه .. وانه هم ينشاف ظلّي
والليل طوّل خويه وانه شعندي
لا خيمه لا والي وبنات بسدي
ورماح وخيول العساكر ضدي
هذا الوضع ميغيره الا المهدي
متخضبه ويّاك .. من دم النحر
ومنتظره ظليت .. مهدي المنتظر
أكتبله شكوى بيميني .. وللكافل اشتد حنيني
شيجيب الصبح
..........
علي عبدالله المفرجي
137 views15:45
ق
