الشاعر علي نجاح الكناني

2021-08-24 17:07:06 لو عابس قميصه اعليك ينزع
من مهدي احل أگماطي و أفزع
خلني ابعسكرك اخر مقاتل
يوگع وانتفض ثاني ابو فاضل
...........................................
من عالم وجودي من العدم من موطن الروح
من حيلي التبده من نضرتك تنكث أجروح
من كلمة (ألا من ناصرٍ) عن بالي متروح
خذني وبين أدينك يا حبيبي ردني مذبوح
الكاروك أحسن مو مكاني
أطمح أصبح أسماعيل ثاني
ما ريد الكبش من البدائل
يوگع وانتفض ثاني ابو فاضل
...........................................
چم أگماط عمري و ما خفت من عجة الناس
صح راح انذبح بس كون مثلك صدري ينداس
لا أگدر السيف و لا رمح لا درع لا طاس
لا اصعد مهر بس الضروري براسي عباس
حيلي راح أشده و ربي أنخاه
و أتلگه السهم و أصرخ حسيناه
صرخه أتفزز الشالن محامل
يوگع وانتفض ثاني ابو فاضل
...........................................
شگد ما يصفه گلبك تلگه بس الموت عنوان
هاي الدنيه صعبه البيها رايد يصبح انسان
راسي اعله الرمح ينشال بس مو راس قران
خل تتباها أمي تگول عني هواي كبران
أبراسك فيي عالحره السبيه
وانه أبراسي أفيي عن رقيه
نحمي من الشمس روس الثواكل
يوگع وانتفض ثاني ابو فاضل
...........................................
كونك ما خذتني للحرب و أتلگه الأسهام
أبكاروكي أضل تحرگني ترجع نار الاخيام
ست أشهور عمري بس وحقك بيه الف عام
رايدها الشهاده مثل الاكبر مثل جسام
أتخيل هيچ أريد الموت اشمه
لو مال السهم دنيني يمه
واسيت بجهادي و أجري واصل
يوگع وانتفض ثاني ابو فاضل
...........................................
صابوني بسهم و أتفاخروا گطعوا وريدين
ذبحة عافيه شمحلاها من حسين لحسين
تلگيته وتلگتني الحبيبه التضوي السنين
هاي أمي الزچيه حضرت بلجنه مهدين
وي المحسن و نحچي بضلمهم
البسمار أقسى لو سهمهم
من فلان وفلان المشاكل
يوگع وانتفض ثاني ابو فاضل
...........................................
اني كربله والملحمه واني عمدها
واني متون زينب والسبي و سطرات خدها
للعالم أوضح هالمصيبه بكل بُعدها
بيد المهدي باچر اروي قصتها وسندها
يحچي والسؤال يوگف عقول
ليش بيا ذنب عبد الله مچتول
يتلگه الجواب بدمع هامل
يوگع وانتفض ثاني ابو فاضل
...........................................
علي نجاح الكناني باز کردن / نظر دهید

2021-01-26 17:12:17 خلّص موسم كسر الخاطر ... بس ما يخلص جرح العاشر
أبساعة موتچ تبتسمين ... راح أتلاگة أويه أبني حسين
...........................................................................
العمر ما يسوه من يخلص بچي و حسرة
والمفارگ جروحة أيصيرن أبكُبرة
واليشتاگ شيجيب الذي أيصبرة
(ييمه حسين ) بس هاي البقت ذكرة
أبيا آخ من أنجرت روحچ ؟ ... عزرائيل أمقدر أجروحچ
بلكي أبموتچ ترتاحين ... راح أتلاگة أويه أبني حسين
...........................................................................
عليچ الموت سيّر بآخر الأنفاس
والتابوت حيل أستوحش العباس
غريبة جنازتچ يا طيبة الأحساس
هضيمة و ماكو ولدچ بين هاي الناس
يأم الكافل وين أعزازچ ... المفروض حسينچ جنازچ
خلصتي أسنين أتانين ... راح أتلاگة أويه أبني حسين
...........................................................................
هاي الهاضمتني و زادت اللچمة
ورة التابوت محد صاح يا يمه
عمت عين الوكت من قسوتة و ضُلمة
وحيدة أجنازتچ هاي وعلي زحمة
أبسكتت موتچ صوت أينادي .... أبتشييعي وين أولادي
عن تششيعچ صاروا وين ... راح أتلاگة أويه أبني حسين
...........................................................................
يأم ذاك المضيف الشامخ العامر
تاليها النعش ضل يكسر الخاطر
سنين أبغربتچ وأجروحچ أتكابر
الساعة موتچ أشخلالچ العاشر ؟
و أشگد أتمناها أحساسچ ... لو يحضر يمچ عباسچ
والنعشچ رايد چفين ... راح أتلاگة أويه أبني حسين
...........................................................................
يا قصة حزن ما شبهتچ قصة
أيامچ مآسي ومدمع و غُصة
بالفرگة العمر راح و خلص نصة
عسه بالموت للملگة تصح فرصة
خمسة أولادچ والله الشاهد ... ضل شاغل بالچ بس واحد
گلتيها وراح أتگولين ... راح أتلاگة أويه أبني حسين
...........................................................................
الشاعر علي نجاح الكناني باز کردن / نظر دهید

2020-08-03 23:13:41 لا تعدهم عدد ... صيح يمهم مدد
سبعين ألف ينصاغ من السبعين
و حسين واحد عمرة ما صار ثنين
...............................................
مثل طحن الرحة تطحن صوارمهم
أعلة طاري الشيلة تتحرك شواربهم
وعيد أيصير اذا رفت بيارغهم
فلح عالسنبل تخوزر مناجلهم

أستولوا أعله الهوه ... و حاصروا نينوى
الضاهر بقت شمرة علي من أسنين
و حسين واحد عمره ما صار ثنين
...............................................
لونة الموت ينعاد بألف كرة
عليم الله فلا واحدهم أتبرة
شحال الموتة أذا يحسين بس مرة
تعال و صول بيها سيوفها الحرة

أنولد بيهم عصر ..... سيوف وقعة بدر
أي والجمل والنهروان و صفين
و حسين واحد عمره ما صار ثنين
............................................
العشگ كلش صعب نوصل لمفهومة
حگة ألي تسودن مزگ هدومة
عرس و أهل العرس وليان مهمومة
هلاهل بالسيوف بزفة الحومة

أصدور تهوى الجرح ... يغفه بيها الرمح
يترنمون بجية سيوف البين
و حسين واحد عمرة ما صار ثنين
...........................................
حسين بكل حجيهم دووم متواجد
وي النفس عدهم نازل و صاعد
فكرهم عن يزيد الصنم متباعد
ما سجدوا ابد بس للعلي الواحد

لا يزيد و صنم .... و النزاع أنخصم
هذا الحسين اليوصل حدوده وين
و حسين واحد عمرة ما صار ثنين
.......................................
أبد بعقولهم ما سير الوهواس
خضرة گلوبهم تشبه خضار الياس
حجوها و من حجوها أمتزجت بأحساس
بضهرك والله كلنة أنصيرلك عباس

لون ترضى العفو ... نصيرلك چم أخو
آمرنة كلنة نصيرلك خد و عين
و حسين واحد عمرة ما صار ثنين
........................................
يسئلون الحسين بفرح متناثر
يمته أنموت يا روح النبي الطاهر
فرحوا حيل من گال الوعد باچر
الله يا حلاوة ليلة العاشر

للحچيهم صدگ ... الموت فرحة عشگ
هو أحنه عدنه بالعمر چم حسين
حسين واحد عمره ما صار ثنين
..........................................
الشاعر علي نجاح الكناني باز کردن / نظر دهید

2020-08-03 23:12:21 من وحي الأحزان ..... حسين أبالي أعرَض عاشورة
ليلية حلمان............. و الطف عشتة بصوت و صورة
أدري ....شبعده العاشر
لكن......... گلبي مسافر
من وحي الأحزان
..........................................
نمت ليلية ... سير أعلية
حلم لكن يمتزج وي ذاك الأحساس
كربلة و حالي ... صاروا گبالي
شو أشوفن رحمة الله بخيل تنداس
الضحاية هاي كلها أوجوه أهلنة
والوطن غربة ولا يشبه وطنه
العلگمي يم الجرف حاضن علمنة
احمر ليش الغيم ... بدم عبد الله وجها مبلل
كالوا سهم الضيم ... مفتح عينة و صاير يندل
راس ... المدلل ناحر
لكن....... گلبي مسافر
من وحي الأحزان
............................
أنتخي أبحيلي ... أبلا گمر ليلي
ما أميزه هوه من لون العبي
أتگربت يمهن ...ردت أشاركهن
نسوه يتراين على رحلة سبي
كل سبية گاعدة توصي بسبية
و ركزن عن نقطة حيل بهالقضية
كل شي لا لتضيع من عدنه رقية
حچاية و بيها الشام .نوگ و خوف و غربة و مسرة
موكب مال أيتام ........ حسين جروحة لسا خضرة
تكتل.. غربة باچر
لكن .گلبي مسافر
من وحي الأحزان
.......................................
الدنية ما خجلت ... الروح مل طلعت
أحسلة ما شاف الوضع بدر العشيرة
الناگة جابوها ... و يالله صعدوها
و الأميرة على النسه صارت أسيرة
ناگة ناگة أتحاچن أتفقن على راي
ذولة أهل بيت النبي أمشن على أهداي
و بالأخص زينب تراهي مورمة هواي
فشلة من العباس ..كل شي ولا يزعل كافلها
مشيتچن بحساس .. لو مال شيعدل محملها
شوفن ...بيها شصاير
لكن....... گلبي مسافر
من وحي الأحزان
............................
الشام والعلة ... و ناس محتفلة
دگ الأدفوف و طبل و الناس فرحة
وين تاج الدين ... و هذا راس حسين
طه بيهم ما نفع يا وسفة نصحة
ناس ردت للأسف تعبد هبلها
بيها من سنين ضل نابت جهلها
بس بعد بيتي حجت أخت الكفلها
وگفتها الكرار... و عرش الضالم ركنة أتهدم
كلمة تعادل ثار .. وراس حسين بطشتة أتبسم
هزت .. عرش الكافر
لكن .... كلبي مسافر
من وحي الأحزان
...................................................
المشاهد خوف ... سيوف فوگ سيوف
من الحلم فزيت وي صوت أبن حذلم
يا بشر مهلك ...خلي أخبرنك
السولفتهن ذني بيهن كلهن أعلم
قصة أدري بضيمها و أدري بمحنها
يا بشر بس العقيلة أحچيلي عنها
للمدينة عاد لو لسا ضعنها
ردت و بيا حال ...شنهو الضل بيها و ما شيب
من بعد الكفال .... يا ما ماتت أدري بزينب
يجرح ..كسر الخاطر
لكن ... كلبي مسافر
من وحي الأحزان
..............................
الشاعر علي نجاح الكناني باز کردن / نظر دهید

2020-08-03 23:06:55 يا حبيب أبنَ مضاهر ... گوم شيل العلم و أظهر
...................................................................
يالله يا ليث الحرايــــب ..... خل ترف الراية بيـدك
صيح بس حسين أميري .. والشهادة هلال عــــيدك
شبيتك من لون گلبـك ... حب علي يجري أبوريـدك
نادتك سوح المعــــــارة ... عطشت الحومة تريـدك
أبرز و راوي العساكـــر ....... إنته عزمك عزم حيدر
...................................................................
عهدك البيت الرســـالة .... حاشة والله ما تبــــــدل
وگفتك لبن الزچيــــة .... مثل وگفة وصي المُرسَل
يا حبيب أنصر حبيبك .... صيح فنه اليمه يوصـــل
سجل أسطورة ملاحم .... بالعشگ كون أنتـــه أول
أنته أول بالمفاخر ... أكشخ أبعشگك تبختر
...................................................................
أشكبر جاهك عد مـحمد ... بالسمة و أعليك سَلَـــم
حلوة من حلگ أبو اليمة . من تسمعة أيصيح يا عَم
الهوه ما يعني عــــــندك ... انته بس حسين تشتــم
أشما گرب موعد العاشـر ... ثغرك الطاهر تبسَـــــــم
صاحوا الميعاد باچر ... صحت هذا الفوز الأكبر
...................................................................
الحومة صارت تحت طوعك..طشهم أبكيفك ولمهم
أسد من تحمل عليــــــهم ... سيفك أيفرق شملـــهم
طيح الأصنام حيــــــــدر ... و أنته الأتطيح صنمهم
من تغيم يبن ضاهـــــــر ... بعد يا گاع التلـــــــمهم
ما تهمك كل مخاطــــــــر .. من تطب الموت الأحمر
...................................................................
المات وي حسين عايش ... الگاع من يوگع تقَبـــله
واليضده الدنيه گبــــرة ... يذب روحه أعله المذلة
اليرتفع باچر أسمـــــكم ... لا سنان ولا خولــــــــــة
بلغ الأنصار گلهــــــــــم ... الموته وي حسين تحله
أيعيش بس صوت الضماير . واليضد حسين يخسر
...................................................................
يالصحت للضلم كـــــلا ... بس إبن حيدر إمامي
الماتردة أحچاية الحگ ... أوياه يتفاهم حسامي
نقسم عليك أبحبـــيبك ... البقة عالغبرة دامـــي
دفتر الخدام بــــــيدك ... نريد تكتب هالأسـامي
كل عمرنه أنعيشه عاشر ... والمشه بهالخدمه يكبر
...................................................................
إلى خادم الحسين (عليه السلام ) :علي نجاح الكناني باز کردن / نظر دهید

2020-08-03 23:04:16 النايم أعلة الترب .... يدري لو ما درة
أمة صعدت هزل . أويه العدة أميسرة
....................................................
بروحي ديرة من الحزن يعلمها ربي
و وين ما أرسم حلم ينكسر گلبي
عيوني تتعب واني أگلها أرجوچ صبي
ذاك الاتشوفينة طايح ذاك تعبي
أبعيني ذاك البچي .... الشالتة المگبرة
النايم أعلة الترب .... يدري لو ما درة
.....................................................
النودعة أنگول بلكي أتجيبة صدفة
و هاي يا صدفة الترد اللاگة حتفة
گلبي وي فرگاك مدري شلون يصفه ؟
بحضني راسك خله مو بتراب تغفه
يمه هاي الشمس ... تچوي راسك ترة
النايم أعلة الترب .... يدري لو ما درة
.....................................................
الحادي عالأجساد قرر يمر بينه
و طلعت الناگة ييمه أشگد حنينة
گصرت خطواتها بممشة الضعينة
حته گلبي أبراحته أيودع وتينه
الناگة منها الدمع .... شفته عالخد جرة
النايم أعلة الترب .... يدري لو ما درة
.....................................................
مودع الله يا ضوه أحسين و مُهجته
والسبية من توادع تبچي سكته
شغيرك يبني وصرت مو أنته أنته
لازگ الدم أعله وجهك ما عرفته
من الترب والدمه ... جبهته أمعفرة
النايم أعلة الترب .... يدري لو ما درة
.....................................................
عمري يخلص من يسوگ الضعن جدمه
والمدلل بده أيغيب أبعيني جسمه
هاي آخر نظرة خلها عيوني تعمة
الناگة حنت من صحت ويلاه ييمه
النسمة الأبريتي ... تنزل أمكسرة
النايم أعلة الترب .... يدري لو ما درة
.....................................................
آنه ليلى وليلي غايب عنه نجمي
و عيني ما بيها بعد واهس الحلمي
داري عگب أبني أصبحتلي دار همي
الچان كلما يطب يسأل وينها أمي
منك أشينسي ؟ ........ و أرجع أتذكرة
النايم أعلة الترب .... يدري لو ما درة
.....................................................
إلى خادم الحسين ( عليه السلام ) :علي نجاح الكناني باز کردن / نظر دهید

2020-08-03 23:03:12 تدريني عليلة عليلة .. كل لحظة أحتام
والسفرة طويلة طويلة .. أشهور و أيام
.....................................................
بالسلامة و غاب عن داري السلام
دموعي طاحت غافية أبحضرة إمام
گتلي أبقي و آنه طعتك بأحترام
لچن طاري الفرگة يرميني أبسهام
درب البي تمشي أضعونك ... ما أدري شضام ؟
والسفرة طويلة طويلة .......... أشهور و أيام
....................................................
لا تجرح خاطري أبچلمة وداع
و فرح گليبي اليحس كل عمره ضاع
گلي وي أرچابنه شدي المتاع
فرحة منها ما تشيل أجدامي گاع
دربك أمشيه بگلبي ........ موش إعله أجدام
والسفرة طويلة طويلة .......... أشهور و أيام
....................................................
هاك عيني هاي أخذها گبل هاي
شلي بيهن كونك أنته مو أوياي
بيّه داي وفرگتك داي إعله داي
وشوفتك عندي تعادلي دواي
والتغفة أبضل والدها ............... لا ما تنضام
والسفرة طويلة طويلة .......... أشهور و أيام
....................................................
يا فرح عمري و ضوه عيوني الثنين
أرد أسألك و أنته أعلم يا حسين
أبحيلة راح أوياك زين العابدين
ليش عوچية خذتلة يالحنين ؟
يمكن يفهمها شعوري ......معناها الشام
والسفرة طويلة طويلة .. أشهور و أيام
....................................................
الأفراگ أيريد حيل وسهر ليل
و آنه بمصلايتي ظهري يميل
منين أجيب الحيل وآنه أبلاية حيل ؟
يا چبير الفَي تره أفراگك ثجيل
گلب المكسورة خاطر ... حايط من جام
والسفرة طويلة طويلة .. أشهور و أيام
....................................................
التفاته وخطوة خطوة حسين راح
الساني ساكت لچن كل شي بروحي صاح
رحل عن أرض النبي وجه الصباح
تالي راسه و راس أخوتي إعله الرماح
بعدك لا گلب اليهجع .............. لا جفن أينام
والسفرة طويلة طويلة .......... أشهور و أيام
....................................................
إلى خادم الحسين (عليه السلام ) : علي نجاح الكناني باز کردن / نظر دهید

2020-08-03 23:02:10 كل عام هاي الراية تتبدل
تكشخ نهر والعلگمي ينذل
يالذابح الموت أبدمه نحرك
عايش ملك والدنيه تتوسل
...................................................................
بسم الجرح ... يالمنذبح
خدنه نفرشة أدموع لحزانك
ضل يرتفع....صوت الدمع
نعلن حزنه أبراية أشجانك
لا ما متت ... بينه عشت
هذا أنته شامخ وين عدوانك ؟
صاحب فضل ... يالمنچتل
عالدنيه من أدموم شريانك

والله قليلة نطبر الهامة
و مولاي منك سلبوا أعمامة
حبك صبح مقياس للغيرة
انته اليحبك بس الأمعدل
...................................................................
عام اليمر ... يخلص صبر
انموت و يرد عاشور يحيينه
إعله أهل الأرض ..شهرك فرض
الما عاش حزنك ما كمل دينة
آية جَزَع ... والكل سمع
بيها الموالي رتلت عينة
أنكف الحچي .. أنخلي البچي
أيسولف مصايب والد أسكينه

عاين عليها گلوب خدامك
مچوية كلها أبجمرة أخيامك
عالفطرة بينه أنولدت اللوعه
لا حاشة كون أبيوم نتبدل
...................................................................
شنهو الهوه ؟ .. إنته الهوه
أشتسوه الحياة و أنته ما بيها ؟
الما خدم ....... عمره عدم
دنياته مدري شلون گاضيها ؟
گلبي يدگ.. خفگة عشگ
الراية محرم من أصد ليها ؟
ما تندثر ........ لو بالگبر
هاي الشعاير نرد نحييها

طول السنة و كل ما يجي باچر
أنعيشه چنه ليلة العاشر
فوگ الگصص منقوش بس أسمك
والعمر كله بأسمك أمسجل
...................................................................
عن معرفة ...... مو عاطفة
شفنة الحسين العَبرة والعِبرة
شع الضوه ...... من نينوى
يسطع ضياء الدنيه من نحرة
الشيعي إله ..... هالمنزلة
الجنة يطب مرتين مو مرة
شيعي الهوى ........ يدخل سوة
أبجنة الله وجنة الحضرة

لمن خلقها صاحب المِنه
من يم ضريحة أنصاغت الجنة
بيد الحُسين الله جعل كل شي
من صاح ربي هالقليل إقبَل
...................................................................
وي كل عزاء ... هذا الدعاء
يا ربي ديم علينة هالنعمه
كل ما يمر ... بينه العمر
نكبر و تكبر بينه هالخدمه
الدنيه ألم ... يتبع ألم
هَمْ و قهر و أجروح ملتمه
أيضيگ الصدر . من كل عسر
و يفرجها تالي حسين أبو اليمه

أمسح على گلوب اليحبونك
أهموم عدنه وداعت عيونك
باب الله انته بعد كل حيرة
من ندگ بابك كل صعب يسهل
...................................................................
لخادم الحسين (عليه السلام ) : علي نجاح الكناني باز کردن / نظر دهید

2020-08-03 22:57:03 قصائد محرم ١٤٤٢ باز کردن / نظر دهید

2018-09-22 16:25:05 بالبــــراري عاريـــاتْ هالجـــسوم الزاكـــــياتْ
يا علي السجاد ألحكَ مرمي جسم حسين باتْ
.......................................................
كفى كفى كفى الصبر.. متى المضاجع تنحفر
كل جسم رايدله كَبر... وبحفرته ينـــــــــــــام
( ها ) يالعليل المحتضَر.. يلي حنه عوده القدَر
عالغبرة نايم جم كَمر...ومترس سهــــــــــــام

صار هسه تلث ليال ...... أترك الكوفه وتعال
بكربله عدك ضحايه موزعه بالطف شتات







شد العنان المهرتك ... أجسوم أهلك رادتـــك
الله يساعد حيرتك ... يا روحي محـــــــــــــتار
أحفر حفيره الجم جسد .. وسعها والأكثر عدد
الصفوة الرب الصمد.. وسد هالأنصـــــــــــــــار
جاسم وياهم ينام ... بلغه من أمه السلام
كله رمله تون بعدها وحلم أمك ذاك مات
..............................................................
أحفر كبر خله قريب .. واري بي شيبة حبيب
يرتاح خل ذاك المشيب ...... والزهره تجزيه
حاجب حسين على اليمين ..... بيدة سجل الزائرين
باجر نرد دنية أوية دين ... كل أحنة نرجيه

غداً خدام الحسين ... أولين و آخرين
كلها مكتوبة بسجلة .. والأعمال مسجلات



مهلك علي حمله بحذر .. جسم الأبو مكطع وذر
و دور أصبعة ألي نبتر ................ خلي بلحدة
أحزام ظهرك والسند ........ وي الأبو وسده بعد
عبد الله شيلة من المهد ...........وياه وسدة

كبل لتهيل التراب ... كون ماهيه الرباب
أحذر أحذر عالثواكل ... بالدفن ما حاظرات
........................................................
للمشرعة صد النظر ....شد الظهر شد الظهر
كلش صعب شيل الكمر ... كوه الله حيلك
بنص النحر أهمس همس .. كلة أختك بولية رجس
ارجع مثل جية أمس .. رد أضوي ليلك

أحذر و بالك تعوف ... أله على الشاطي جفوف
ذني بيهن عطر زينب ... جانن ألها مخيمات
#علي_نجاح_الكناني باز کردن / نظر دهید