بو سئچگی بازاری آچیلیب گئنه گؤره سن بو میللت نه فیکیرلشیر م | علی جباری(علی معللیم)
بو سئچگی بازاری آچیلیب گئنه
گؤره سن بو میللت نه فیکیرلشیر
میللت کی آللانسین باشلانیب حیله
گؤره سن بو میللت نه فیکیرلشیر؟
کاندیدالارین سایی گلمیر اله
چیخا بیلمییجک ، او بیله - بیله
اولار بو میللتی چکیرلر چؤله
گؤره سن بو میللت نه فیکیرلشیر؟
گئنه دوشور عم اوغلویوق داواسی
یا شرکت ائدیب دیر، خالا نوه سی
های بیدیریقلا چالیشیر هره سی
گؤره سن بو میللت نه فیکیرلشیر؟
نه قدر کاندیدا دوشوب ایشلییه
رقابتی بیر - بیریله باشلییا
گؤر نه قدر پول گتیریب خشلییه
گؤره سن بو میللت نه فیکیرلشیر؟
آیلیقلا ییغاجاق خشلنن پولو؟
یقین ایری یولدان تاپاجاق یولو
چون آزاد اولاجاق ساغی هم سولو
گؤره سن بو میللت نه فیکیرلشیر؟
دئییرلر قاباقدان توتوب نییت
یازیلیب یازیلار اولونوب قسمت
بونو بیله - بیله نه دیر رقابت
گؤره سن بو میللت نه فیکیرلشیر؟
چوخو بیلیر سئچگی اولوب اویونجاق
هانسی گوجله درده چارا قیلاجاق
اودا حتمن اؤز فیکرینده اولاجاق
گؤره سن بو میللت نه فیکیرلشیر؟
سئچیلنین باش ایمک اولوب ایشی
اؤزو بیلیر یوخ قیرانجا ارزیشی
بئله گئدیر بو اؤلکه نین گئدیشی
گؤره سن بو میللت نه فیکیرلشیر؟
سئچگی گؤزلدیر آزاد اؤلکه ده
دئمک اولماز بیزه گلدی بلکه ده
بئله سئچگی ساخلانیلا سرکه ده
گؤره سن بو میللت نه فیکیرلشیر؟
گؤر بو میللت داها ، نه گونه قالیر
چوخو واردیر بیر ناهارلا رای آلیر
هله چوخو تک خودکارا رای سالیر
گؤره سن بو میللت نه فیکیرلشیر؟
مملکتی یوخسوللوق لاپ بورویوب
اینسانلاری درد الیندن چورویوب
سئچیلنلر هانسی حاققی قورویوب
گؤره سن بو میللت نه فیکیرلشیر؟
سئچیلنین واردیر اگر قدرتی
مگر گؤرمور بیر بئله مصیبتی
قاباقکیلارین یولودور نییتی
گؤره سن بو میللت نه فیکیرلشیر؟
حایف او کاغازلارا کی گورلانیر
چوخ شکیللر هاوالاردا فیرلانیر
گئت به گئتده ،سئچگی آدی بله نیر
گؤره سن بو میللت نه فیکیرلشیر؟
میللت اومودلانیر گئنه آللانیر
چوخو گلیر بیر مقامدا ساللانیر
او مدتده یاخشی ییغیر پوللانیر
گؤره سن بو میللت نه فیکیرلشیر؟
بو میللت باشینا یاغیر مصیبت
تک سئچگیده یادا دوشور بو میللت
بومیللتده ، علی ائتمه بیر، عبرت
گؤره سن بو میللت نه فیکیرلشیر؟
گؤره سن بو میللت نه فیکیرلشیر؟
علی جباری ( علی معللیم )
@alijabbarii
