آغلا آی خوزستان سنی قانیرام منده ایللردیر سن تک آغلاییرام بی | علی جباری(علی معللیم)

آغلا آی خوزستان سنی قانیرام
منده ایللردیر سن تک آغلاییرام
بیلیرم گوز یاشین ندن اله نیر
چون یارامی گؤز یاشلا باغلاییرام

گؤرنده سوسوز چؤللرین فیلیمده
اورمو گؤلو سؤزه گلیر دیلیمده
سن تک چوخ دردلیدیر منیم ائلیمده
من های وئریب هاینی حاخلاییرام

گؤر سنین سویونو هایان آپاریر
منیمده میسیمی کرمان آپاریر
قیزیلیمی روس فیلان آپاریر
چالا یاراسینی من ساخلاییرام

سن نفتین اوستونده آجسان گؤرورم
بوگونه قالیبسان ندن بیلیرم
منده مین معدنله آجام اؤلورم
گئدن ثروتیمه یاس ساخلاییرام

منده سن تک او تهرانا ایشلیرم
اؤلمه دیریل بیر پول وئریر خشلیرم
گلیشمک یئرینه گئری باشلیرام
گور زامانی ترسینه چاغلاییرام

بئله نقشه چکیب او دشمن دنی
هدف بوشالتماقدیر سنی ایله منی
اؤز خالقیلا دولدورا بو بؤلگه نی
چوخداندیر بودردن من دیغلاییرام

قوجاقلا بالانی یانان خوزستان
منده چوخ بالامی ساخلیرام بوآن
سنینله دردلشدیم من آذربایجان
چارانین یوللارین دؤز یوخلاییرام


دردلشدیردی بیزی بو علی بالام
بئله بالام چوخدور اونا خوشحالام
بالالاریم قویماز بوحالدا قالام
دوشونن بالامی سوراخلاییرام

علی جباری ( علی معللیم )

@alijabbarii