زلزله یاتما طعبیم اویان آمان گؤنودور گؤرمورسن ائلیمین یامان | علی جباری(علی معللیم)
زلزله
یاتما طعبیم اویان آمان گؤنودور
گؤرمورسن ائلیمین یامان گونودور
سندن چوخ سؤزلری اومان گؤنودور
یئر کره سی بوردا گلدی اویناغا
نه قدر جانلاری قاتدی تورپاغا
زامانین الیندن دردیمیز آزدی ؟
فلک یئنی ظولمون بیزلره یازدی
عاجیزی اینجیدسین اویامان بازدی
آذربایجانیمین اؤره ک بدلری
ییخیلدی ورزیقان اهر کتلری
هریس دن وللیلی، جیغا ، قیزقاپان
ورزیقاندان ، باجاباشلا ، دیغ دیغان
اهردن آغ کندی، یئریله یکسان
اییه ده ائولردن قالمادی بیری
تک توک چیخدی آوار آلتیندان دیری
زیغ آنو، کیویده ائولر الندی
کؤرپه اوشاق داش دیوارلا بلندی
بوگوزل یوردومون نئچه یوز کندی
بیرآندا نئچه مین ائوی ییخیلدی
یازیق خالقیم چادیرلارا سیخیلدی
ویران اولدو سیرخاگولا، چای کندی
برک دئدیلر زنگ آویلا ، سرندی
میرزآلی، شیخیملی، اوچدو تللندی
دایلارین اوستونده یاتدی قیرخ بولاق
دیب اهلی ، آشاغی ، یوخاری قیشلاق
سایماقلا قورتارماز کتلرین آدی
او گؤنده ، وئردیلر الدن هرزادی
چون آغاج پالچیقلا اولموش بونیادی
بیر بئله اوچماقین باعثی کیمدیر
یوخسوللوق دئییه جک هرکیمی دیندیر
یاسا باتدی آذرباجان دونیاسی
آخی اؤلدو گلین الده خیناسی
اوچ آیلیق اوشاغین اؤلدو آناسی
بیراوشاق قایتدی کمکلیک ائتسین
دووار اوچدو اودا آنایلا گئتسین
آداخلی اؤنونده آداخلی اؤلدو
آنا قوجاغیندا بالاسی سولدو
آنا بالا دئیب ساچینی یولدو
آغلار دیرناخیلا قازدی تورپاغی
اؤره گی ، ده لیردی ، دئیلن آغی
آذربایجان نیه ؟ بو گونه قالدی
گؤرنلرین باغرین درد کدر آلدی
امداد نیرو لاری چوخ بئواخت گلدی
خنده بازار باشلارینی قاتمیشدی
مسئوللاردا باشی آتیب یاتمیشدی
ارتشین امدادی ندن گلمه دی ؟
سرباز تؤکوب نفس یولون دلمه دی
سانکی آوار آلتدا آدام قالمادی !
سونرالار گلدیلر اللرده سیلاح !
پس بئل هانی بونه ایشدی آی آللاه
امدادین الینده غذا گلمه دی !
قاب قاشیغی تورپاق باسدی وئرمه دی
اوشاقلار آج قالدی اؤزو گولمه دی
یازیقلار آج سوسوز قالدی چؤللرده
گؤزلری گزیردی گلن اللرده
اوآن مللت بیر حماسا یاراتدی
ییخیلان تورکلره تورکلر ال آتدی
گئنه تورکلر اینسانلیغی اوجالتدی
اوآن یئتدیلر قارداش دادینا
قوربان اؤلوم بئله ائلین آدینا
بیلن بیلمیینه دئیب هایلادی
وسایلی مللت گتدی تایلادی
ماشین قاطارلادیب گنده پایلادی
گؤرن دئدی بونه بیرلیک نه سسدیر
آلانلار دئدیلر، دا ، بیزه بسدیر
چوخلاری مالیندان کمک ائتدیلر
چوخلاری کمکه اوآن گئتدیلر
آداملاری تورپاق آلتدان گؤتدولر
تورک خالقینین گؤروم اوزو آغ اولسون
بیرلیک الی هرواخت بئله داغ اولسون
@alijabbarii
