یاز قلم یازقلم بیلسین هامی، باخ نئجه اوضا یارانیر . ایش ایشه | علی جباری(علی معللیم)

یاز قلم

یازقلم بیلسین هامی، باخ نئجه اوضا یارانیر .
ایش ایشه باغلی اولور، بیرائله فضا یارانیر .
چوخ ایشلر دوزن لنیر، سن دئمه قضا یارانیر .
بیر اولای تک گؤرونور، میللته بو چوخ یئرده .
چوخ شئیلرآشکار اولار، چکیلسه اوزدن پرده .

یازقلم قدرت اوچون، باخ اینسان اینسانی قیریر.
روسیه ندن گئدیب ، سوریه، افغانی قیریر .
ایندیده گلیب هله ، او آزاد اوکراینی قیریر .
آمریکا ویتنامین ، ساواشین سالگینان یادا .
کیم اوددو ،کیم اودوزدو، دئه، نه لر اولدو آرادا .

یازقلم نییه اینسان ، هئچ بیرزادا رحم ائلمیر ،
هرکسین الینده اولور ، قدرت آدلی بیر دمیر .
ازیر ضعیف باشینی ،وار یوخون قانیندا امیر .
یازبوقدرت نه دیرکی،وحشیلیک ائیله ییر بئله.
یاز بیلینسینکی اولار ، نه ایشلر گؤرورلر هله .


یازقلم اورتادوغودا ، گئدیلن چوخ ساواشی .
یازکی بو ساواشلارین، هایانا باغلیدیر باشی .
یاز نییه ساواشانلار، هرزامان ناشیدیر ناشی .
یازکی کیملر بولارا ، سیلاحلاری ندن ساتیر .
نییه قانمیرلار بولار ، اورتالیغی کیملر قاتیر .


یازقلم بوقدرتلر، سیلاحلارین ساتماق اوچون.
بوللو منفعت لری ، اؤز جیبینه آتماق اوچون .
چالیشیرلار هریئرده، بو بازارا چاتماق اوچون .
باخ گؤر نئجه کیمینی، سالیرلار کیمین جانینا .
ظاهیرده هربیریسی، بیرینی چکیر یانینا .

یازقلم ایلک اینسانی، آختارانلار بئله دئمیش.
ایلک سیلاح دفاع اوچون، ییرتیجیلاردان یارانمیش،
ایندیکی یاشاییشا، سیلاحلار اولوبلار قمیش.
ییرتیجی حیوان یوخ کی، اوندان قورویا جانینی.
ایندی سیلاحلار دؤنوب ، توکورلر اینسان قانینی.

یازقلم بو قدرتلر ، هریانا یییه دورورلار
اونا قارشی دورانا، جوربه جور مارکلار وورورلار.
او مارکلارین آدیلا، باشلایب خالقی قیریرلار .
دئییرلر تئروریست دیر، مزدوردو، پاندیر، اوباشدی.
دیین یوخ بو اینساندیر، فیکری وار سانمایین داشدی.

یازقلم بیر-بیرینه ، یالاندان دوشمن دئییرلر .
بو اویونلا چوخلارین، حاقلارین ناحاق یئییرلر.
هر ظولمه قارشی گلن، مخالیفلری اییرلر .
بیر ایدده نی آلدادیب، گوجلرین ییغار باشینا .
بئله سینه آرتارلار ، حوکومتی نین یاشینا.

یازقلم جانا گتدی ، ایدولوژولارین جنگی .
راضیلاشماق یئرینه،بیر- بیرینه وورور انگی.
ایدولوژو فیکیردیر، نه اینکی ساواش تفنگی.
لیبرال دئموکراسی، آزاد بیانلا پوز ساتیر .
دیکتاتوردا دوزنمیر، تئز سیلاحینا ال آتیر .

یازقلم کاش اینسانلار، هرجوره فیکری آراسین.
کیملر ندن سالیرلار ، بو قدر دینلر داواسین .
نییه هردین تعریفلیر، تکجه فقط اؤز بالاسین.
نییه دینلر بیرلشمیر، دوز اینسانلیغا چاتماغا .
بیر-بیرینی ییخماغین، فیکرینی باشدان آتماغا.


یازقلم هله نئچه ، اتحادیه یارانیب .
تک قورخودان اوترودو، بیرلشمه فیکری آرانیب.
قونشو-قونشویا قارشی، تئز باشقاسیندا یئرآلیب.
ناتو هله گوج آلیر ، ورشونون گئتدی دیرلیگی .
واراورپا، واراسلامی ، بیرده تورکلر بیرلیگی .

یازقلم اؤز ایشلرین ، گؤرورلر میللت آدینا .
میللتین منفعتی ، دوشمز اولارین یادینا .
یازیق میللتلر یانیر ، بئله فیکرلر اودونا .
ائله سؤزلر دیینلر ، خطردن گیزلین قالیرلار.
اولارا هئچزاد اولماز ، میللتی درده سالیرلار.


یازقلم ساواشلاردا، اؤلمز باشجی نین بالاسی .
ائله یئرده یوخسولون، قالخار بالا وای نالاسی.
پوللاری بؤلوشنده، یوخسولون چیخسا صداسی.
ائله گونه سالارلار ، گلر دونیادان بئزر .
یا علی تک دانیشسا ، گئدر زنداندا گزر .


@alijabbarii