قناة الشاعر الحسيني علي مظلوم الجناحي

آدرس کانال:

دسته بندی ها: دستهبندی نشده

زبان: فارسی

مشترکین: 499

توضیحات از کانال

قناه عامة

▲ Vote (1)

Ratings & Reviews

3.50

2 reviews

Reviews can be left only by registered users. All reviews are moderated by admins.

5 stars

4 stars

3 stars

2 stars

1 stars

آخرین پیام ها

2022-08-02 03:16:30 كون مسلم بالطفوف ويه ابو اليمه حضر
وسوه نزلو للقتال مسلم ويمه الگمر
جان ماظلت عساكر
****

نفرض فرض مسلم عدل والسيف ماحز نحره
ولكربله وياهم اجه ويه الكمر شـــــــد ظهره
ونزلو سوه للمعركه مســــــلم وراعي الگمره

تصور منهو النازل مسلم ويه الكافل
ياهو الراح يقاتل ياعسكر
أله من يطبوها بس ساعه يصفوها
والحومه يسوها جن محشر

واحد يسكت الجيوش شلون لوطبو سوه
ينعلن يوم الحساب ونفخت الصور اللوه
يبقه ملك الموت حاير
*

مسلم والعباس الگمر بالحومه والجيش يشوف
جاه شردت اخـيول وزلم وگلوب توگع وسيوف
يلگون موته بلاطعن يلگــون موته من الخوف

حته الظل ماشارد حيله يخونه وگاعد
يابس دمه وجامد يشفونه
تغير وجه ولونه تسمع طگ سنونه
بس ادير اعيونه يلگونه

اليصد عباس اجاه يموت حيله ومايفر
ومسلم يشوفه وراه بيده يحفرله گبر
يموت مرعوب ويكابر
*

من ينذكر اسم الگمر يخوف تره الزلمه الحيد
ولودخل ميدان الگمـــر لاركضه لاشرده تفيد
ونوب طب ومــــــحتزم وي مسلم وايد بأيد

الجيش وكل اعداده يضيع عليه مشراده
وتختل روس القاده يضموها
اللحگ خلص روحه الشرده هناه مسموحه
تسمع خايف نوحه يسمعوها

عار لليشرد گبل وهسه لازلمه الشرد
واليفر من خوفه گام ليهم بجدمه يرد
الخوف شوف عيونه ساطر
****

مسلم يكض الميسره وعباس ع اليمنه يدير
ومن الصفر يبدي العدد وعزريل يرفع تقرير
باب لجهنم ينصب بالحــــومه مفتوح يصير

يصير الموت مغالب مسلم گام يعاتب
رايد حصه يطالب يشكيله
مسلم گال بهيده كضه عباس من ايده
يخلي جنود ايريده يخليله

گله موكلهم عليك خويه سبع الگنطره
جاه اظل انطر وراك بلكي واحد تعبره
اظل بالحومه اناطر
***

لونزلو الحومه ســـــــــــوه وتحزمو الها حزام
حته الگصب يفزع يــــهد وياهم يصير اسهام
ويرتفع بس صوت البجي ويسمعه حته بالشام

الكافل ياخذ حيفه حاصل حل تنضيفه
يذري الروس بسيفه يصفيها
ومسلم من ذراها طشها ورد لماها
الروس عليه دناها يعدبيها

يگله مسلم لاتعد انه لجلك ماطگ
انه لوحدي اصول اطبگ بسيفي طبگ
والاريد يصير صاير
***

يجسمون جيش المعركه يجسمونه بالطف اثنين
ويتغالبون عله الرگب ياهو اليخـــــلص السبعين
ياهو اسرع ايطيح ألف ويرجع يسولف لحسين

كون حسين يشاهد بطرف الخيمه وكاعد
ياهو اكثر ياواحد ذلاهم
سكته تصير الوسعه صوت الريج تسمعه
ياهو اسرع بالرجعه حياهم

ياهو خلص حصته بساعه سكتها ورجع
وياهو ظل صوت الونين من حملته ينسمع
ياهو رد وگال حاضر
****

يلغون مجراه النهـــــــــر وللخيمه مجراه يدير
وعبدالله يشرب لوعطش بكاروكه جواه يصير
ويتفرع بكل الخـــــــــيم ويتعذر من التقصير

اجروفه تصير الخيمه وتشبع حته الهيمه
وتاخذ منه الغيمه يوزعونه
يوصل كل شفايف امر ومنهو يخالف
محد يضمه وخايف يسگونه

يصير كل ماي الفرات بأمر عباس الگمر
ومسلم يوزع ثواب وخيمته بصف النهر
وترتوي حته الضماير

علي مظلوم الجناحي

@Ali_aLgenaih

28 viewsedited 00:16

باز کردن / نظر دهید

2022-08-02 03:05:12 حسين حس دمعاته بيده
وگالهم جيــــــبو حميده
علــيها دنگ باسها
بجفه يمسح راسها
جيبو حميده
***

يحجي وي روحه ويسولف ودمـوع تسيل منه
يرد سلام ويمه محد ومختنگ وبــصدره ونه
انحنه شفته وتتجه تغــــــــــــــــير وجناز چنه
انه زينب گتله خويه گــــــــال مسلم راح عنه

الهوه وصـــــــل سلامه
ع القــــصر وبلا عمامه
الكوفه غدرت ناسها
بجفه يمسح راسها
جيبو حميده
*

حاطها بحضنه ودمـــــــوعه نزلت بجفها الزغير
يريد يحجي وياها لاكن شـــيحجي وياه يحير
البگه براسج يگلها انــــــــــــــــه ألج والد اصير
راح ابوج ومايجينه راح مـــــــــن عدنه السفير

ختنگت ودمعتها لاحت
بويه وبحرگتها صاحت
حسين عاش احساسها
بجفه يمـــــسح راسها
جيبو حميده
**

تگله ياعمي اعرفك والله مــــــــن عندك كفو
بس يعمي انته تدري مــــــــحد يعوض الابو
اليفگد الوالد يعمي بــــــــــــعد مايلگه دفو
واليتيم اجروحه تكبر ع اليتم لــوبس حجو

ختلطن ادموعه ودمعها
وبالحجي حسره سمعها
تجرها گوه انفاسها
بجفه يمسح راسها
جيبو حميده
***

گالهم جيبو رقيه تنام يمــــــــــــــها للصبح
ولاتگلي يمها بويه خــــــاف تبچي وتنجرح
خل تواسيها وتگلها حســــــين باجر ينذبح
اليحس راسج بجفه راسه باجـــــر ع الرمح

نصير هم مثلج يتامه
ومـــــــايردنه بسلامه
الهضم روحج جاسها
بجفه يــمسح راسها
جيبو حميده
*

الجرح بحساسج اعرفه وانـــه شنهو احساسي
اليوم حس راسچ ابوي ومــــــحد يحس راسي
بحضنه والخوف بعيونچ والزمن تشكيله قاسي
باچر ابقه انه وحيده وناس وابـــــد مو ناسي

باجر الترجيـــه تنباگ
والجمر بجدامي حراگ
تهد علينه ارجاسها
بجفه يمسح راسها
جيبو حميده
**

عدله انتي ياحميده بــــــــس فگدتي الغالي
ماگولن هاي سهله مـــــــــــــــــن يروح الوالي
انته ماشفتي شجراله والدمـــــــــــع دم هالي
راس ابوي بطشت باچر انـــــه اشوفه اگبالي

مـــلگه وموادع سويه
ع الطشت تلفي المنيه
وشفته حافر داسها
بجفه يمسح راسها
جيبو حميده

علي مظلوم الجناحي

@Ali_aLgenaih

30 viewsedited 00:05

باز کردن / نظر دهید

2022-08-01 04:02:35 بجفوفي وبريجي الماي
وشعر عطش فت اجلاي
اشعر بلم چنه سهم
صايبني طاح بعيناي

انه ام وعيني رفت فجئه وظــــــــــنوني خذتني
چن شريعه ويمها رايه ودمعه طاحت بس جوتني
جفي بزنودي واحسن منگـــــطع يوجعني متني

حسيت بجود وضربت عامود
وبصفه زنود وچلمت خوه
فوگ التربان واحد عطشان
لاكن خجلان كله مروه

اول مره تگــــول اشفاه
باول خويه بــــكل دنيه
راسه انهشم چنه سهم
صايبني طاح بعيناي

يمشي واحد حيله ميت وظهــره خالي ويلتفت
ونگلت اجدامه ثگيله ولازم صـــــــفاحه شفت
واسمع بأذني انــــته ياهو يلي مــــني تگربت

واحد مطروح متروس اجروح
والثاني ينوح حس سامعته
اخر لحظات وبحظنه ومات
واخر جلمات عذره لاخته

حار الدمـــــــع مال وداع
وناحت احس حته الگاع
وصوت بخيم چنه سهم
صايبني طاح بعيناي

منكسر وعيونه حمــــــــــــــره يلملم بحيله ويكابر
واگف وطوله تـــــــــغير قوس چنه بطوله صاير
يحجي وي روحه ويسولف منولي وحسيته حاير

يتوچه وگام وگباله خيام
فاگدله حزام من خطواته
شتعذر گال تنطر اطفال
بدمعه الهمال وگض شيباته

الماعنده خوان يطيـــــح
ظهري انكشف گام يصيح
بيده علم چنه سهم
صايبني طاح بعيناي

اباب خيمه تلاكه ويه حرمه ومبيـــــــــن تعبها
كض عمود الخيمه بيده وطيح الخيمه وسحبها
چلمه صاحت بس احـسها تگطع الچلمه بگلبها

راح الكفال وصياح اطفال
وگماط انشال يبجي وضامي
صاحت عباس جرحك بحساس
شيبت الراس حامي اخيامي

هناه وگفـــــت وفزيت
عباس معــــــناه الميت
گلبي علم چنه سهم
صايبني طاح بعيناي

رحت للقاروره اركــــــــض تراب مودم شاهدته
احجي ويه روحي وگــــلها هاه يروحي چذبته
ساعه بس كلــــشي تغير دم غدت وانه عرفته

ام واعلم الكون مغيم
مطرت من دم وصارت دخان
من فكري حتار وحسيت بنار
تراوالي شصار طايح عطشان

من وگف مامر المــــاي
يعني العطش مر مولاي
يقضه وحلم چنه سهم
صايبني طاح بعيناي

علي مظلوم الجناحي
@Ali_aLgenaih

54 viewsedited 01:02

باز کردن / نظر دهید

2022-07-31 13:14:41 بس صده الصوت وحشه البيوت
وانه ودمعتي وحسرتي
كلها غياب ودگت الباب
صارت عزيزه ومنيتي
حته الـــــــهوه لوحرك الباب
اركضله اگولن جوني الاحباب
بس صده الصوت
*
يحملون وانه بس اون
وكلمن مـجانه بالضعن
لورحتـو اظل بلاوطن ألمن بعدكم
اخذوني وياكم صحت
الخيل اســــرجه گلت
اخذوني من علتي طبت خدامه الكم

امشي ع رجلي وماهم وتحزم حزام
والـكم امد افراش انه مابين الخيام
كاروك عبــــــدالله اهز لوليله مانام
ورقيه انــسيها التعب لوحست ألام

علتي اتروح اطيب الجروح
انتم دواي وطيبتي
من تروحون ابقه وشلون
چاه شنهو ظلتي بدنيتي
السكته صـــارت ردي وجواب
****
من حمل حسين وطلع
صوت الالم ماينــسمع
حســيت دلالي انگطع ويه الضعن راح
كل خــــطوه عني يبتعد
چن سيف بضلوعي يحد
حزن الله بعـــــيوني لبد وبداخلي انياح

شگد سولفت عيني بگفه ضعن الجفوني
وگالت اموتن من اظـــــل بس ماخذوني
لميت كل حيلي ووگــــفت من ودعوني
ومن ابعد عليه الضـــعن طاحن عيوني

الباب خطوات حيلي من مات
مااگدر اوصل عتبته
ثگلت الروح وصوت الجروح
اذن بروحي وسمعته
حـــــسيت روحي بديرت اغراب
*
الليل عسعـــــــس وحدي
وضنوني كل لحظه تحدي
هموم المفـــــارگ تبتدي يلتمن عليه
وبأوله صـــــــــــبري نفذ
ويانوم انـــــــامه وستلذ
ماخله كلشي وكلشي اخذ بس خله طاريه

ليل الله خلصته مـــشه وبدمع جاري
چن مگبره بلايه هلي ماچــــنها داري
سكته ولا تسمع صده بس كبره ناري
ساعات مرن بس عمر چان انتظاري

الموت شفته بليله ضگته
وشلون لوطال السفر
يعني مكتوب ويه الغروب
چم مره اموتن بالعمر
ضاغطني هجــــرك ضغط التراب
****
لوعت مفارگ لوعـــــتي
لحيطان اسولف وحدتي
وضيگ احــــسن غرفتي مثل اللحد حيل
الصبح يتنــــفس گبل
بحسين والظـــلمه تفل
وحسين عافاني ورحل مايخلص الليل

صبح الله يتنفـس گبل من وجه ويطش
خيط الشـمس من وجنته ع الناس يغبش
صبح الله عافاني ورحل والـــليل موحش
وهمـــــــــــومي ماترحم ابد وبروح تركش

لومشه النور تصبح گبور
ومايطلع يطر الصبح
تروح الالوان نصير عميان
ومايبره ويطيب الجرح
مايـــــــــشفه لايرهمله عطاب
****
اتحــــزمت جرح بجرح
والليل خلـص والصبح
شچ گلبي شـچاه برمح وحدي وحزينه
لابويه لايــــــــمه وهله
لاصوت عبـدالله اعتله
صـــــوت بأذني اتخيله هاه صرتي زينه

اليبقــه وحده بعلـــــــــــته ومفارگ ايام
اگباله بس صورت محـــــب يتخيل اوهام
گاعد ويـــــــــــحلم بالمشو وعيونه متنام
وتفضحه عينه المنجرح تحجي شألم ظام

بلايه تفسير الفارگ يصير
محد يسمعه ويفهمه
يدامن النوح دمعه مفضوح
والنسمه تاذي وتلجمه
وحته الحـــــلم يطلعله چذاب
**
الينــــتظر غايب يمر
كل لحــــظه تنعد بعمر
ماينفــــع وياه الصبر شماطول البال
الموت والله اهون الي
ولابـقه وحدي بلاهلي
لاجاني عــمي ولا علي بيه الهجر طال

وديت مرسالي لچـــــــن ماجاني مرسال
گلتلهم اصبي النـــــــظر ويه الدمع سال
العايش غريب بديرته هم يـشرح الحال
بياساعه اموت من الهضم وجنازه انشال

لحالي ينگال بكل الحوال
فرگاكم وظلتي اجل
لتمن اثنين فراگ الحسين
والعله صارتلي علل
مشــــتعله كلي وكل كتر شاب

علي مظلوم الجناحي
@Ali_aLgenaih

64 viewsedited 10:14

باز کردن / نظر دهید

2022-07-30 10:48:16 من اين لي
الخير وادري الخير منك
من اين لي
دليتني وصرت انه اخدمنك
عبدك انه وبسمك مـــــلك
كل خيري من عندك والك
من اين لي

ادري كلشي ••••• مسلم امري ••••• بيده الله
تريد واحد  •••••   يسعه گاعد   •••• نعمت الله

ادري الله ومــــــقتنع الارزاق بيده
وكلمن ونيته العبــــد والله يزيده
وانه نيتي ومقــــتنع گلبي اليريده
عبد عــــد حسين اريد ومن عبيده

عمري انه
من خدمت هـــــذا الذي ادري
عمري انه
وگبله المظه ماينحسب عمري
محسوب بــــس بمنزلك
كل خيري من عندك والك

ادعي اطلب  ••••• ليك اگرب   ••••• خذني يمك
خيرك انته   ••••• انه ضگته   ••••• وخيري منك

انه منيلي ومــــــاعندي كــــــل خير
وانه لومو انته ضـــــايع تايه ازغير
گمت احس طعم لحياتي والها تقدير
حيل مبخوت بحياته الخــادم يصير

حته من ازل
ماتبخل وتنطيني من فضلك
حته من ازل
مـــــن فضلك ادليني وصلك

تنطيني لمـــــــــن اسألك
كل خيري من عندك والك

بسمك امشي  ••••• والك كلشي  •••• اليوم باچر
نفس ريتي  ••••• ياهــــويتي   •••• انته صاير

جنت ضايع سـيدي وسويتني انسان
وگبل ماخدمك گـــبل ماعندي عنوان
بـــــس اندبك بالشدد تفتحلي بيبان
كله مـــــــــن عندك بخيرك انه غرگان

منك الك
عايش انه وماعندي بس خيرك
منك الك
ماريد ابد كل خير مـــــن غيرك

بـــس انته انته اتوسلك
كل خيري من عندك والك

العشگ واحد  •••• بگلبه گاعد    •••• بيه يسري
عشگي ياناس  •••• وحگ عباس   ••••   عشگ عذري

كل عشگ چذاب عـندي وتالي الغياب
وين يتساوه النجم وي ذاري التـراب
وانه محبوبي اختلف عن كل الاحباب
ابد ماسد مـــــن اجيته بوجهي الباب

ويه النفس
اتنفسه ويدور احس بيه
ويه النفس
وبيه النفس متفظل عليه

بالدنيه كلـــــــها اتخيلك
كل خيري من عندك والك

ذنوب بيه  •••••    من اديه    •••••    اهواي اقصر
روحي اجتك  •••• عليك اختك ••••• نضره انضر

اقبلني جيتك ســيدي يالقابل الحر
انه غرگان بذنوبي وبيـــــــــك اعبر
الدنيه مـــــااگدر عليها وخاف انجر
من تدير الوجه عـــني كلشي اخسر

خذني اليك
يــــاسيدي ياتقبل المذنب
خذني اليك
ابابك اظل ولعطفك مچلب

خذني خــــــــمار لمحملك
كل خيري من عندك والك

رزقني جويه   •••••   دوم بيه    •••••     وحزن لابس
رزقني حرگه  •••• رزقني سحگه  •••• وعشگ عابس

خليني اهيم بعالمـثــــــك شعليه بالناس
عيشني دمعات ولطم وجروح الاحساس
خليني لومرلك ذكر الطـــــــــم ع الراس
ولدير وجــــــهك انتهي بداعت العباس

ركضني الك
ركضت رقيه وهيه مرعوبه
ركضني الك
عاشگ انه والمات محبوبه

اسبيني چن سبيت هلك
كل خيري من عندك والك

علي مظلوم الجناحي
@Ali_aLgenaih

76 viewsedited 07:48

باز کردن / نظر دهید

2022-07-29 15:46:39 شلون بالله يطيب ياگلبي الجرح
ودوم وياك الوكت يرفــض صلح
شما يطيب ويلتحم
يفرگه دهري ويلجم
ينثر ملح

انه ياگــــــــلبي عرف ويه الجروح
ماعرف اضحك لچــــن اعرف انوح
الفرح سد بابه عني وحزني مفتوح
وانه زين ولسه ظـــــــلت بيه روح

انته زين وباقي ياگلبـــــي صدگ
وانته تتنـــــــفس جرح لمن تدگ
عايش وعـــمرك ألم
يفرگه دهري ويلجم

جرحك المرهم يلچــمه وكل طبيب
يشفه جرحك لوردت گرب الحبيب
مايهود بالدوه يهـــــــــوده النحيب
وانته جرحك من زغر حد المشيب

الرافگ الونه وعـــمر عاشو سوه
يدور ويتعب فلا يلگه دواه دوه
يموت بعيونه الحلم
يفرگه دهري ويلجم

انته لوتحسب حــــياتك من وعيت
ويه كل دگه جرح انـــــــته جنيت
الفرح ماضــــگت طعمه ولا لگيت
گلي هاي دنيه منــــها شحصليت

حصتك من الدنـــيه نوح وفاجعه
وجفـني من زغري ولاكف مدمعه
ثغري مامره بتـــسم
يفرگه جرحي ويلچم

تلوم المن گلي وتســـــولف عتاب
انته عدمن صاير وتـشكي العذاب
گلب زيــنب انته وجروحك كتاب
من غلافك حد غلافك بس مصاب

من مصيبه تخــــلص اطيح بمصيبه
ومنهو مثلي من زغر وماخوي شيبه
باب مـحراب وخيم
يفرگه دهري ويلجم

انته زين وباقي ياگلبــــي تدگ
وانته يوميه بمصـــــيبه تختنگ
بيك نار من الطـــفوله ومحترگ
وشيبت والنار بـيك وهم سحگ

الصار وياك بگـــــلب لاما يصير
زغير من تنقاس والعــاشر چبير
شفت انـــوع الهضم
يفرگه جرحي ويلچم

انته فوگ التله لونبــــضك وگف
من وگع من مهره ع الرمله وزحف
من اجاه الشمـــــــــر وعياه النزف
من نزف فوگ الرمــح حد مانشف

ماوكفت شبيـــك من جابو هزل
شكثر صبـرك ياگلب وشتحتمل
واطب ديوان وزلم
يفرگه دهري ويلچم

ياگلب ألــــمن تدگ باقي شتريد
كافي بـيك اجروح لورايد جديد
جروحك من الشـام ماضنن تهيد
انته تنزف والخلـگ فرحانه عيد

وهسه تعتب من شفت قوس الهلال
تدگ ألمن ياگلب شــــــــسوي ظال
لموتي ياگلبي افتهم
يفرگه دهري ويلچم

علي مظلوم الجناحي
@Ali_aLgenaih

85 viewsedited 12:46

باز کردن / نظر دهید

2022-07-29 13:54:59 ألمن راجع شفت وسامع
الصار وياي
هلالك مرني بس شيبني
وفت اچلاي
الموت اهون من الصار
لهسه بگــــبي منك نار
ألمن راجع

كون مامر بيه شهـــــرك لا اجاني
بيه چم سـهم الزمن حط ورماني
ماشفت بعيـوني ريت هلال موتي
وگبله اتمنــــــــيت يرجعلي زماني

يرجع بيه مومسبيه
وعندي اخوان
گبل العاشر گبل الحافر
گبل الچان
وچني بطيف ومر خطار
لهــــــسه بگلبي منك نار

انته من هليت يهــــــــلال المنايه
جايب وياك الحزن جـبت الرزايه
بيك شفت مــصاب مامر ع واحد
والبدايه بــــــيك صارتلي النهايه

منك كلشي شيب رمشي
وشفت مصاب
ماظل واحد لهمي يساعد
بس اصواب
ماعندي غيري وتختار
لهسه بـگلبي منك نار

صور ظــــــلت من هلالك بيه تاكل
بكل كتر جرح ومصــيبه بيه شاتل
موت بس موت مـــن گلب ذكرياتي
ودار وحشه والفرح من عدها شايل

باگ احلامي وكل ايامي
وجاب الموت
ماخلالي بيت وخالي
چن تابوت
صوره هناه وهناه تذكار
لهسه بگلـــبي منك نار

گبل مهيوبه چــــــنت عزي ودلالي
بين اخوتي ومــحد يشاهد خيالي
موكبي الكرار والــــكافل يحرسه
والحسن وحسين ببميني وشمالي

اول تالي دمعي يلالي
بهزل نوگ
عمري اميره تالي اسيره
ودخل سوگ
مچتوفه وشمروني حجار
لهسه بگلبــــــي منك نار

انته ماخليت بس نوح ومـــصايب
وهسه هليت وانشدك شنهو جايب
تردلي ذاك الراح وتجدد مـــصابي
لوترد وياك كل ذيـــــــچ الحبايب

راجع بيمن بس عليمن
يرد الراح
دمع اليوگع لاما يرجع
دمع الطاح
عدله شلون ويومك دار
لهسه بگلـــبي منك نار

علي مظلوم الجناحي
@Ali_aLgenaih

87 viewsedited 10:54

باز کردن / نظر دهید

2022-07-29 02:49:52 دوريت ومالگيت بالدنيه مثلك رايد
تأكديت تيقنيت ماالگه نفسك واحد
انته بس انته الصدگ
بس الك يحله العشگ
مالگه مثلك

دوريت الدنيه كلها اســــــم من بين الحروف
ردت واحد كونك مثلـــك ع اليضده هم رؤف
كون شايل طيب گلــــبك مايرد حته السيوف
الدنيه هاي تموت كلها وتبقه بس گاع الطفوف

ياجبير من احير وصعبت وضاگت عليه
من اجيك واعتنيك بسرعه تگضيها اليه
بس اصل بابك ودگ
بس الك يحله العشگ

انه ماشايفلي واحـــــــــــــــد باب گلبه منفتح
يطيـــب اجروح ويداوي وهوه بيه چم جرح
يسكنك ابيته ويـــضيفك وهوه گاعدله برمح
مايشيل بگلبه تــــــغلط دوم ابو گلب السمح

مايدير ع الفقير وجه ويغض النضر
المعتنيه يدري بيه يرد وجه مبتشر
گبل لاچفه انطبگ
بس الك يحله العشگ

ساتر الوادم دخيـــــلك وانته ماعندك هدم
توزع الماي بضريحك وانــــــته منه منحرم
احترگن اخيامك لچـنها الدنيه صارتلك خيم
تنطي من گلبك عطيـتك وبالگلب نايم سهم

الطيور بلاشعور تبني عشها بالصحن
الحمام يرد ينام حضرتك صارت وطن
والشمس منك تشگ
بس الك يحله العشگ

بحضرتك يغفه ويأمن چنه يـــم امه الطفل
وانته عبدالله ع صـدرك غافي لاچن منچتل
تجتمع كلها وتجيــــــــــــلك بابك يلم الشمل
وانته ايتامك سبــــــوها مچتفه حيل بحبل

الدنيه هاي يارجاي تلوذ بيك بكربله
الجنان والامان وانته باء البسلمه
كلشي بعدك يختنگ
بس الك يحله العشگ

اليدگ بابك يســـــــــــألك دوم تنطي وجاوبيت
وانته حته الراد محبس محــــبس وخنصر نطيت
العنده مثلك هـــــــــــــم يدور وگال حيره تحيرت
رحمت الباري اخـــــــــــــتصرها بيك وانته تنزليت

للخليل للجليل رحمته انته الواسعه
والدعاء بكربلاء الله يسمع هل دعه
واليضدك يحترگ
بس الك يحله العشگ

خلني يم بابك دخـــــــيل كون اموت بعتبتك
احسبني حر واعـتنيك وحاشه تطرد حضرتك
انته جيش الراد كتـــــلك عليه نزلت دمعتك
لهيني عن الدنيه كلـــها كون اعيش لخدمتك

كربلاه وعمري اه وعيش بروحي الضعن
بيه كون هالجنون مثل عابس هم اجن
ودوم عيشني الطبگ
بس الك يحله العشگ

علي مظلوم الجناحي
@Ali_aLgenaih

99 viewsedited 23:49

باز کردن / نظر دهید

2022-07-29 02:09:59 هل الهلال ..مرت سنه ع اجروحي والشام
هل الهلال.. ولسه انجوي من نار الخيام
چم موت عيوني شفت
چم مره مت ومامتت
هل الهلال

هل الهلال والعمر طال
سنه مرتني وگول شلون عدله
المات محضوض وانه مفروض
متت بالعاشر ولا اصعد الهزله

المثل حالي هواي اهون من يموت
من زغر دهري رسم بعيوني تابوت
سلوتي دمعي بحياتي وابچي بسكوت

العمره لوعات والفرح ماغلط مره وصل بابه
العمره لوعات ينطر المن ماترد راحت احبابه
فرح مامرني وشفت
چم مره مت ومامتت

العمره ماخاف ولاحزن شاف
هذا يسحب عمره ماشايف جروح
العاش بالاه وكته راواه
بس جسد يمشي تشوفه بلايه روح

انه اخلص من مصيبه وگعلي مصيبه
من عمر خمس وغزاني الوكت شيبه
وانه ذاك اليختلف حته بنحيبه

منهو مثلي حته بيام الفرح تنزل دمعته
منهو مثلي من زغير لليوم مابردت جمرته
من الظيم طفله وشيبت
چم مره مت ومامتت

گلت دهري تالي عمري
اكتفه والصار بيه انتهه وصار
وكتي خوان بجرحي فنان
كربله ضمالي بيها اجروحي الاكبار

اخذ مني كل اخوتي وكل هلي
وحدي ظليت بهضم ماينجلي
وكتي يكره هم مثلهم كل علي

الصار بيه ماسده لواحد ولاصار بمره
الصار بيه حافي اركض وانه عمري مخدره
خمسين عمري وركضت
چم مره مت ومامتت

منهو مثلي راحو اهلي
وحرگو خيامي عليه فوگ الايتام
فكري محتار خيل والنار
وكلها عمه تصيح وانه ابين ظلام

اكض واحد خايفه يفر ثاني مني
هذا نار بثوبه ذيج تصيح اذني
وذاگه اشگف عنه بالسوط ع متني

جلجل الليل وروس اخوتي ع رماح يمي
جلجل الليل وباچر سبي ينادون بسمي
بروس اخوتي انضر بتت
چم مره مت ومامتت

كلها شمات والخدر مات
الچلمه اقوه من السهم تاذي الدليل
الفاگد اخوان يبقه حيران
وانه كل اخوني ع غبره مچاتيل

وحدي ظليت وشماته كلها وياي
الماي بعنادي يجيبه وطشره احذي
وانه ماتو كل خوتي بحسره الماي

الشمر صار زلمه يتهدد عليه وعنده حراس
الشمر صار يوگف اگبالي برمح بيه راس عباس
راداني اصيح وماصحت
چم مره مت ومامتت

اذكر وچان يمي جيران
سنين مايدري علي عدهم ابنيه
تالي للسوگ دخلت بنوگ
وناس ملتمه الضحه وصاحو سبيه

صعبه ترجع ديره بت شيخ العشيره
وزينب ع الكوفه رجعت بس اسيره
بداري مروني الگبل بيها اميره

العمر چانت تطلع بموكب واثر ماالها ينشاف
العمر چانت دخلت الكوفه اسيره وبيها ينطاف
ديوان بالكوفه ادخلت
چم مره مت وماتت

تالي للشام واه يالشام
معيده بيه الناس وتلگونه بدفوف
شتم وحجار زغار وكبار
لتمت الوادم علينه واليجي يشوف

من يزيد ومجلسه بتنه بخرابه
ونامت الليل اليتامه ع الترابه
رقيه گعدت من حلم وتصيح بابه

الها جابو راس ابوها وحضنته مذهوله هيه
الها جابو حضنته وماتت بحسرتها رقيه
رقيه بجفوفي ادفنت
چم مره مت ومامتت

علي مظلوم الجناحي

@Ali_aLgenaih

96 viewsedited 23:09

باز کردن / نظر دهید

2022-07-28 20:30:10 شلون بلوه بلوتي سوده باچر صفحتي
شلون باچر بالگبر منهو اليه بوحشتي
بس بالحسين نجاتي بس بالحسين
***
شلون بيه شلون باچر الموت باچر لو وصل
بغير دگت باب يلفي يلفي لبــــــنادم غفل
يجيني ملچ المـــوت باچر وانه لازاد وعمل
ونطرح بفراش موتي بــين اخوتي والاهل

تشاهدو بذني استمع بهذا حالي والوضع
وانه بس عيني تصد وامي تذرف بالدمع
ساعت البين اجتني ساعت البين

لو اروح اشــــــلون باچر بـــــهذا حالي للگبر
وحطني دفاني ع خدي وعمري چن لحظه وعبر
وهالو ترابه علـــــــــــيه ومــــــــحد عليه نضر
والگبر كــــسر اعظامي وضغط صدري ع الظهر

شلون لومنكر يجي وضاع من عندي الحچي
عليه يشهد كل عضو غاد ماينــــــــفع بچي
المفر وين يروحي المفر وين

شلون بيه بگبري وانه لگبــري ماحسب چنت
وماخذت وياي كلشي غير بـــس ذنبي خذت
شلون لومنكر سألني للحـــــــــــساب شقدمت
وگام يمليلي كتابي برگبـــــــتي ذنوبي شلت

صفحتي سوده انملت چفت اذنوبي اثگلت
يبقه بس حب الحسين هوه يشفعلي گلت
بدمعت العين انادي بدمعت العين

بالحشر كلمن كتابه وتــــــــــنعرض غادي الكتب
فاز كلمن في يمــــــينه بنار ابد مايـــــــــــنصلب
وانه بكـــــــــتابي اشـــــــــوفن كله زلات وذنب
عندي بس حب الحسين وخدمته ودمعي اليصب

هيه بس هيه ألي وحبي لحيدر علي
بيهم انه انجه فقط حسين صوتي يعتلي
بكل السنين خدمته بكل السنين

شلون تحرگني جهــــــــــــنم وانه حبه شايله
بگلبي من الزغر سـاكن روحي وتعشگ كربله
النار ماتحرگ عـــــــــيوني لجله چانت سايله
تبچي لحسين ومــــــصابه تبچي لجل العايله

حاشه يتركني ابد بالحشر يوگف وعد
حسين مايترك دخيل هوه يوگفله سند
انته المعين دخيلك انته المعين

توگف الزهره بحسابه حسين من زاره ويجيه
بالحشر تشفعله هــــــــــــيه الزار ابنه وتعتنيه
وانه بالمحــــــــشر احلفه بداعت الزهره عليه
كون ماتنــــساني امه وخادم اسمي مسجليه

الخادم بيوم الحشر ذنوبه توگع تنغفر
علي يعبره ع السراط وع الكوثر ينتضر
ويالموالين يسجله ويالموالين

علي مظلوم الجناحي
@Ali_aLgenaih

96 viewsedited 17:30

باز کردن / نظر دهید