الشاعر محمد منير المياحي✍️

2022-07-06 10:21:57 #محرم_الحرام
ليلة العاشر


يحسيني من خيماتك
ركضتلك بنياتك
تركض تطيح وتعثر
شافت أثر طيحاتك

لوعولي حرم
كسرولي علم
شافوني غصب
ماعندي خيم

ركضوني من اخيامي
وبان اثر لجدامي
متلوعة ايتامي
ابا عبدالله

صعبة من شتموني
بنص هيمه وشافوني
بلا والي يدروني
ابا عبدالله

ياعقيلة ياعقيلة ياعقيلة مدد
.....
يبن امي ذن دمعاتي
من ركضوها ابناتي
شحجي وأجت خيالة
كبال الفرس طيحاتي

حركولي خدر
دايسته جمر
ماعندي كفيل
رايحلي ذخر

ماعندي ولا والي
ياهو يعاين حالي
نام بدمه الغالي
ابا عبدالله

لا في الغطاني
صاير خشبة الساني
متهدم صيواني
ابا عبدالله

ياعقيلة ياعقيلة ياعقيلة مدد
.....
جيتك اريد احجيلك
شافوني جيت اشكيلك
لا انته لا عباسي
المن اصيح ادخيلك

متورمه جدم
تنظرلي زلم
بلحومه طحت
ماضنه حلم

لا مو هيج احلامي
تامرني خدامي
من عكبك يلضامي
ابا عبدالله

بتك خوية الحارت
اعليهه اخيول الدارت
بيه النار الغارت
ابا عبدالله

ياعقيلة ياعقيلة ياعقيلة مدد
......
ترضه بحبل شدوني
انه وبنات ضعوني
ماعدهه غيرة الوادم
تالي الوكت يسبوني

جابولي هزل
حضرولي حبل
خشن بملمسه
يجرحلي طفل

احبال التجرح بيه
ينادولي المسبيه
وجفوفي مدميه
ابا عبدالله

طيحاتي من الهززل
ليلي اعليه جلجل
براسك كمت اتوسل
ابا عبدالله

ياعقيلة ياعقيلة ياعقيلة مدد
.....
شام الحزن من تالي
ادخلها بيدي احبالي
بلحومه عفت الكافل
مجفية خوية ادلالي

ماعندي اخو
ينشدني شكو
شيسوي الدلال
وبصفا عدو

لا كافل لا راية
طبينه الشام ضماية
ويسمونه اسبايه
ابا عبدالله

يكلولة بت حيدر
هسه اعليهه اتأمر
وانه بجدمي اتعثر
أبا عبدالله

ياعقيلة ياعقيلة ياعقيلة مدد
.......
خادم الحسين محمد منير المياحي باز کردن / نظر دهید

2022-07-06 10:21:22 #محرم_الحرام_١٤٤٤هـ
#قصائد_ليلة_العاشر
باز کردن / نظر دهید

2022-07-04 00:06:09 #محرم_الحرام
ليلة التاسع

ليلة مولاي علي الاكبر ص

حاولت أن اتكلم عن الآلآم مولاي الحسين ص
عندما وقع ولده علي الاكبر ص
_______
ضيعّت الدرب لمن طحت يبني
ياالاكبر فـرگـتك حـيـل كسرتني
جابوني الك گوه امشي يوليدي
اجدامي انشلت وبالگوه شالتني

اكسرتني.....يغالي
شني اللي...بقالي
رحيلك........اذيـه
عجيبه.......الليالي

يوليدي لـيـش بغربة اهضمتنه
يـأكبر حبيبي شـمـسـرع عفتنه
جيتك وعمك حطني اعله متنه

يالاكبر يبويه يالاكبر يبويه
_______
ماصدگت تشوفك عالترب عيني
حسرة تجيبني و حسرة التوديني
اتمنيت انه ميت ماشفت طولك
بگاع الطف يبويه تبدت سنيني

حسافه.....بحسافه
تطيح........الترافه
جمالك..........تبده
هضيمه......وسافه

ضليت اناشغ جن روحي تطلع
لـلـخـيـمـة گـوم وخلينه نرجع
مات ابنه صاحو كلساعه اسمع

يالاكبر يبويه يالاكبر يبويه
_______
بعد المن اعيش وانته مـو يمي
راح الشوف وأنه بروحتك معمي
حلات الوالد اگباله يشوف ابنه
مهضوم وعليك انه احترك دمي

وداعك........مصيبه
يروحي.........غريبه
جنتلي...بويه كلشي
حبيب..........وحبيبه

هسه انـه وحـدي واصفج بديه
يـولـيـدي مـيـت عـايـن عـلـيـه
واجـدامـي گـوه يـتـجـن الـيـه

يالاكبر يبويه يالاكبر يبويه
_______
بـعد هـاهيه واتمنى يجي موتي
مابيه احجي بفراگك خرس صوتي
شسوي بدنيه طولك ماهو گدامي
تجي الحسرة واگلهه للگلب فوتي

جوتني........حسرتي
تطشرت........دمعتي
يظهري...........حنيته
تبين..............كسرتي

حسينك يـبـويه امبين مصابه
امشي واطيحن فـوك الـترابه
شمحلاهه جانت بحلكك يبابه

يالاكبر يبويه يالاكبر يبويه
_______
خادم الحسين محمد منير المياحي باز کردن / نظر دهید

2022-07-03 14:08:27 #محرم_الحرام
ليلة التاسع

#شجاعة_وجمال_مولاي_الاكبر_ص
_______
اجمل وسامه واجمل عين
الاكبر مـثـيـلـه مـاكـو اثنين
اشرس مقاتل وأشجع روح
عمه أبو فاضل وابن حسين

اجمل وسامة__ من كلشي متكامل
رب الشـهامـة__ شـكّـل لـلـدم نـازل
يجدح حسامة__ وعيونه أمن يقاتل

عليهه__شـاد أحـزامـه دخل
عليهه__عرجه من جده فحل
صطرها__نخسفت ظهور الزلم
بجيهه__للسمه السبعه وصل
_______
شعره أعله متنه مغطي جتاف
و زلوفه ورگه أمن الصفصاف
تـيـهـت دربـها ازلام و خـيـل
خاطف وجـهّـم مــا يـنـشـاف

تيهت عگلها__من طب اعله المهره
بيده يخضها__والما لاحه يهطره
رجله نگلها__ويبّس وجه الشگره

دخيله__گاطع اعليهه النفس
دخيله__كلمن الشافه انخلس
دخلها__وانجفت يمه الخلگ
يشيله__ماكو اخضر مايبس
_______
مـن ظهره يطلع بـس دخان
الاكبر عجيب وموش انسان
عالمهرة رجـلـه تـلـوح الگاع
يجويهه غـيـرة امـن البركان

قادر قدير __وحار شما سـولـفـتـه
الاكبر امير __ومـا أوصـل معرفته
بئس المصير__الله يستر طـگـتـه

ضربته__مثل جفين الگمر
ضربته__تگلب اشكال البشر
شهامة__تنحجي بس للشهم
خزرته__ركن لـلـمـوت وقـدر
_______
صارت عجاجه من الناس
واليبقى يمّه فوگا انداس
هيه المراجل هيج تصير
زلمه اليلحّگ يكض الراس

ركضو و لاكن__محد لحگ يشرد
بجفوفه طاحن__فوك الرگبه يگعد
واگف يعاين__بلطاحو گام يعد

يعدهم__جم الف جوه الجدم
يعدهم__خبطت و بيهه يلم
عجيبه__ما رحم كائن يكون
يعدهم__امجومه اگباله الزلم
_______
خادم الحسين محمد منير المياحي باز کردن / نظر دهید

2022-07-02 17:52:13 #قصائد_محرم_الحرام
#ليلة_مولاي_علي_الاكبر_ص_

لسان حال مولاي الحسين(ص) مع ولده الاكبر(ص)
————————————————
يالطايح بطيحتك حيلي
يالاكبر اتگطع دليلي
الحسين انه موش الحسين
جيتك عمامك تتجيلي

اسمعتك—لمن صحت بويه تعال
جيتك—اركض واطيح اعله الرمال
الكيتك—متگطعه كل الوصال
—اكبر محال

من طيحتك ظهري انخسف
مات الجفن حدمااا نزف
گوااااااا يبويه اوصلت الك
جرحي عله الغربه انكشف

واعليا يوليدي واعليا يوليدي
————————————————
اكبري كبّرته نوحي
يالفاتح بدمك جروحي
دربي اجيتك مااشوفه
امشي جسد ماهيه روحي

عكبك—بويه انكطع كل الغرام
دمك—من شفته عالدنيه السلام
يمك—اتمدد بطولي و انام
—ابلا كلام

طولي بعد مو مال امس
طولك سهم جاسه وشمس
جرحي عليك اكبر جرح
مالي عله الدنيه نفس

واعليا يوليدي واعليا يوليدي
————————————————
يمبدي يمك كل سنيني
يالچاوي عالتربان عيني
ماچني قائد بويه ضليت
نص غربه يتعالى ونيني

هدت—عيني دمه وشفت الرماح
كبرت—جروحي شيسد كل الجراح
كلبي—بويه وكف گد النياح
—بعيني لاح

ردت المنيه بس تجي
جفني احترك من البجي
لا يهنه بعدك كلشي صار
مالي ظهر حته انتجي

واعليا يوليدي واعليا يوليدي
————————————————
مرجعني للخيمات معمي
گوا انگله بويه جدمي
تذبحني كطره ماكو بيه
وشتلگا ناشف صبح دمي

راجع—اصفج اديه امن الهضم
طابع—جفي اعله خدي باللطم
جبيره—فركتك منهه اشظم
—كسرة عظم

كاسرلي غصني من رحت
امشي عله الكاع و طحت
طاح الگلب عكبك ترا
نشغت گبر من ناشغت

واعليا يوليدي واعليا يوليدي
————————————————
خادم الحسين محمد منير المياحي باز کردن / نظر دهید

2022-07-02 01:36:09 #محرم_الحرام
ليلة التاسع
#نزال_شجاعة_مولاي_الاكبر_ص
_________
حيهم_طلع والشاره
بـــوجـــه بـــتـــاره__تطيّح سلف
الاكبر_اليشوف ارسومه
يـــذب اهـــدومـــه__دخيل ارتجف
_________
الحرب قامت مدري القيامة_الناس مدري شبيهه
كلهه ركعت يم الشهامة_ نصت يم عاليهه

علي الاكبر نازل_من كل جهة يلاگيهه
الزلم كد ماخافت_ذبت اخواچيهه
كفو زلمت هاشم_والعگل داس اعليهه

كلشي_رجف من عينه
وعـــلـــت جــفــيــنه__اعله ذيج الرگب
الأكبر_وكف والهوسه
غــدت مـخـلـوســـه__اجاها الغضب
________
الزلم تركض واهوا وراها_يجيب منهه ارواحهه
لزم بيده اظهورها ولواها_وسحك فوك اصفاحهه

المات من سطراته_اهون بموت عيونه
الشرد من گدامه_بس اوگف يصيحونه
يركض ويعثر وحده_واشمالك يسئلونه

جاوب_من يلاگيكم
وعـلـي يــسـويـكــم__درب لــلـخيم
إلحگو_وسلمو بريشكم
تـرى أمــن يـقـيـسكم__اعله گد الجدم
________
السمه رادت تطبك عليهم_وكضها طرف اردانه
زلمه گابل زلمه وبجيهم_ وصــل يــم صـيوانه

عمته زينب صاحت_تگوا يالاكبر يبني
لــفــهــم بجفيتـك_فرّح خواتك ذني
فوك ظهر اجيوشهم_ اصعد ولــَ تثني

واكف_ويطخ بسماها
إن صـعــد فـوگــاهـا__يطخ بالعرش
الاكبر _يدخن جتفه
ابـــو لـلـكلـــفـــــه_هـرشـهم هـرش
________
يكفي هذا شخله لعمامه_جا شنهي ظل للكافل
خلّص الطف كله بحسامه_و رجـع هم ما قابل

علــي نار بسيفه_تاكل خضّر واليابس
الصار جوا اجفوفه_مخنوك ظل يرافس
مثل الحطب جومهم_فارس اعله الفارس

ناره_تفور بسيفه
يـجــول بـكـيفه__اليشوفه ارتعد
حَيــهَ_ودخيل اذراعه
الشهامة اطباعه__شسولف بعد
________
خادم الحسين محمد منير المياحي باز کردن / نظر دهید

2022-07-02 01:35:58 #محرم_الحرام_١٤٤٤هـ
#قصائد_الليلة_التاسعة
ليلة مولاي علي الاكبر
(صلوات الله عليه)
باز کردن / نظر دهید

2022-06-29 14:57:18 #محرم_الحرام_١٤٤٤هـ
#ليلة_الثامن
#شجاعة_مولاي_القاسم_بن_الحسن_ص
__

(هوه شيخ الساحة)
من ظهر الهواشم
لو طبها قاسم
ما يبقى صارم__كلهه حدر ريوله
(لو رخت شداها)
لـوحـة مراجل
وجـفـه زلازل
ومن ابو فاضل__ماخذ الهيبة وطوله

طباها وعالذبح وازها
خلاها إبلا هدم خلاها

يتلاهب السعير
وبالموزمه امير
محد گدر عليه
ابن الحسن خطير

من طب..گامت تنردم الوجوه..من طب
ضهضب..ابن معزب الديوان..ضهضب
يشرب..سيفه من دمه الفرسان..يشرب

__

(طالع يزف ارگابها)
وروسهم شوباشه
ويمنته بطاشه
وصطرته هرّاشه__امسرفن عليهه اردانه
(ابن الحسن محلاته)
بسيفه صلبها
يلم برگبها
وجوم حطبها__بالطف فتح ديوانه

والقاده هيه صارت زاده
صياده كل شرس صياده

بمرادم الجحيم
خله البشر تهيم
صاحو تره الحسن
خَلّف ابن كريم

ماهم..معزب لو تمدحه الناس..ماهم
بالدم..خله ادلال أبوه تفور..بالدم
للعم..يعزب روسهه ورجليهه..للعم

__

(بجفيت ابو متحزم)
وازنوده سمره
راكبله شگره
وعيونه خضره__جنهه جفيت الساده
(يطك الضوه بخدوده)
يلوح اكتماله
وحته بخياله
ينضح جماله__خارق جماله العاده

محلاته وهلهن عماته
صولاته مثل ابو صولاته

شبل الحسن يحوم
عن صيده مايصوم
كاسر بالانقضاض
مايخطي بالهجوم

جَسور..اسد كاسر على الميدان..جَسور
وكّـر..يصيد الزلم بالخزرات..وَكٌـر
تسحر..ارموش العين مثل الريش..تسحر

__

(حته انبياء أمعزب)
شيخ المضايف
وبطوله واگف
عـزب طوايف__بزاده عرفنه الحوبه
(العزوبيه تبطل يمه)
وامعلمه عمه
ينطيهه هدمه
ماشفنه زلمه__لو تطفه يشعل ثوبه

أمن لسانه تشبع الجوعانه
بيبانه ما يسد بيبانه

مابيهه اي جدال
والرايد الوصال
مو من زاده شبع
يشبع من الجمال

يشبع..عيونه الزاد كلمن صدهه..يشبع
يركع..عبد للحسن يوسف لأبنه..يركع
منبع..الدخان الـمـراجـل صدره..منبع

__
خادم الحسين محمد منير المياحي باز کردن / نظر دهید

2022-06-29 02:12:27 #محرم_الحرام_١٤٤٤هـ
#ليلة_الثامن
#شجاعة_مولاي_القاسم_بن_الحسن_ص
___
لبس ثوب الحرب قاسم
أشد فارس واشد صارم
على عيونه الغضب بيّن
نـزل لـيهه وجفه الوادم

كسّر اجدام الخيل و داس اعليهه برجله
شـاب و كلمن طگى ظـل يفتر مثل النبله
طگت السيد توجع بمجانه الزلمه يشله

ماخله سالم بشر__واللاحه ظهره انكسر
كول وفعل والنعم__ گالبها بيده القدر
القاسم غلام الحسن__جم زلمه جفه طحن
واليغلط اويه السبع__ تصبح رگبته ثمن

هوه القاسم هوه القاسم
___
عرس عنده درع لابس
على العركه الـه واهس
خبط بيده الزلم والخيل
يـطـك الخيلة بـالفارس

عاف اثياب الزفه و سرفن ثوبه العركه
واللاحه اعله عيونه بسرج الخيل يطبگه
والشارد كض راسه خايف مـنّـه يحرگه

زلمة وجواهم صدك__كلمن بقى ينسحك
لـو يهوى جوه اديه__لو بالخزر يحترك
بالگاع مـال الحمل__اگباله الزلم تنسحل
لو يكسر ايد اليجي__لو رگبه منه ورجل

هوه القاسم هوه القاسمم
___
عـلـي جده وابـو قـائـد
العمى عين الجمل واحد
الحسن خلّف كلف مثله
على ارگاب الزلم گاعد

بيت و كـله اسباع امجمع الغيرة بكتره
زلمتهم مـن يدخل جيب الزلمة ايعبره
ايسد دروب الحومه لا فوگه و لا حدره

خانك نفسهه الزلم__امن الهاشمي والنعم
طالع لَـعمه الگمر__ لو طگ يعيب الجدم
واكـف ولا ينطلع__والخوف طب للضلع
صدو عيونه ويصد__الثوب ظل يـنّـزع

هوه القاسم هوه القاسم
___
الوگع بيده بـقـى ينازع
شتكثر سيفه رگب قالع
دخيل ايده الكلت كلشي
الـمهر مـن الـزلم شـابع

مهره مشبعه أمن الدم حدما گايل كافي
شگد وادم تتراكض بين العاري وحافي
حـگ تتشارد مـنـه هـذا العمه الساقي

تارسهه من الدمه__تلال الرگب ملحمه
صوت الزلم والبجي__واصل لسابع سمه
زلمه خلسهم خلس__القاسم شجاع وشرس
كاسر اخشوم ورگب__كسّار حته الضرس

هوه القاسم هوه القاسم
___
خادم الحسين محمد منير المياحي باز کردن / نظر دهید

2022-06-29 02:10:56 #محرم_الحرام_١٤٤٤هـ
#قصائد_الليلة_الثامنة
ليلة مولاي القاسم بن الحسن
(صلوات الله عليه)
باز کردن / نظر دهید