محــرم مـا إجـه موجـود عاشور الصار بيوم عاشـر بچّـه الإشهور | مهدي التقي

محــرم مـا إجـه موجـود عاشور
الصار بيوم عاشـر بچّـه الإشهور
لُطمُـو ولا تِتِعْــبون
يالله إعليه تِلِحگون
ـــــــــــــــــــــ
محرم جاي .. رايح .. (تسكت أصوات)
السنه قابل جديده إعله العـــزاءات
محرم كـل شـهر بي عـدنه چـويات
شـهر حسـين عايــش والدهــر مات

سـنه وزيـنب لخوهـا اتدوّر إفـياي
و رقيه ايديها طاحَت لازِمَه المـاي
محرم رايـد إعيـون
يالله إعليه تلحگون
ـــــــــــــــــــــ
منّ إغــروب عاشـــر لسّـه الأكوان
اتفصّل بالسـواد وتلبَـــس أحـزان
وعلى طــول السنين المـاي ذبلان
من طاح الحسـين لهسّـه عطشـان

وصوت حسين بعده ايهد إلـ جبال
(هَــلْ مِــنْ ناصِرٍ ) لليـوم تنگـال
وعابس بعده مجنون
يالله إعليه تِلِحگون
ـــــــــــــــــــــ
من ليلة الحـادي الزهـره لليــوم
مابيها الزچــيه اتطيـح و إتگوم
إتدوّر بالمجالــس ياهو ملچــوم
تِشِد حيله التعاين حيله مهدوم

فاطـــم مـــا هِدَت گِلّلـــها حيّاچ
ما يخلص محــرّم و إحــنه ويّاچ
كلشـــي ولا تِمِلّــون
يالله إعليه تِلِحگون
ـــــــــــــــــــــ
من ستّــين هِجْــري تنـوح الأعـوام
وتركــض ركضــت طويـريج الأيام
بعدهــا أم عون ما مرتاحـه بالشام
إلهَسّه إتّـاني أخييها الـ عالنهـر نام

زينب عدله ميتـه ابنص الأحــزان
وليــوم القيامــه إتتـــاني الإخوان
بيكــم لا تقصـرون
يالله إعليه تِلِحگون
ـــــــــــــــــــــ
اذا يخلــص محــرم ينسّـي الثــار
هسه إهْوَه والمهدي إبنفس الأعمار
درب السبي إطويل أعمـارنه إگصار
وچف زينب إلهسه إيشاگُف إحجار

الله إعله الحســين إيحب لونين
واذا يعبــر محرم يلغــي لسنين
بيكم حيـل تعمـون
يالله إعليه تِلِحگون
ـــــــــــــــــــــ

مهدي التقي