أوّل مَـنْ صِعَـد هــاي المنــابر ومِن عدها انخِلَق خط الشعائر | مهدي التقي

أوّل مَـنْ صِعَـد هــاي المنــابر
ومِن عدها انخِلَق خط الشعائر
بدت من علي السَجّاد
رَغُم ما چـانت أعـواد ..صِعَد هاي المنابر
ــــــــــــــــــــــــ
چــان البث إلهــي ومـامش إعلام
قره المقتل الأصلي بمنبر الشام
من ذيـچ الاعواد انحفَظ لِـ إسلام
وچـانت هيئـة اللّطـامه الايتام

حچي اثگيل ويْذِبَه من المشاعر
أنه ابن الـ منقتِل تحت الحوافـر
حچاها وثبّـت أوتـاد
رَغُم ما چـانت أعـواد ..صِعَد هاي المنابر
ــــــــــــــــــــــــ
أول مجـلس إشگد بي جزع چـان
بحيث ينوح حتّـه الچان شـمتان
من هـاي العبــاره وثبتَـتْ أركـان
أنه إبن الـ منذبح ياناس عطشان

أنه إبن المات وحده وماله ناصر
ولهسّه المجلس إبـّ بثّه المباشر
وتِضَل چلماته تِنعاد
رَغُم ما چـانت أعـواد ..صِعَد هاي المنابر
ــــــــــــــــــــــــ
أعرِّفْكُم إبنفسـي وصـار إلِـ صْياح
أنه ابـن الراس ذاك الفـوگ الإرماح
أنه ابن الراح لاچـن ذكـره ما راح
أنه ابن الطاح لاچن باقي ما طاح

طَشْرُوا إبجسم ابوي وذكره باقي
بهــذا المنبــر إيصير إنطلاقي
وخشبهن باچر إضماد
رَغُم ما چـانت أعـواد ..صِعَد هاي المنابر
ــــــــــــــــــــــــ
إبن مكّــه ومناهـا وسمعـو بهــداي
إبن زمزم وأبوي الما شــرب المـاي
أنه ابن الـ بالشمس ما حصّل افياي
إبن نِعمَتْكُـم آنـه وتنــزف إدمــاي

بأول بايه صاعد سمعوا هــايه
باچر عدنه مـنبر بألـف بايه
انقرضتوا وهيّه تزداد
رَغُم ما چـانت أعـواد ..صِعَد هاي المنابر
ــــــــــــــــــــــــ
أنه ابن الوِصَل زاده اخمسطعش جار
علينه الوادم إلمن تگطُـف إحجـار
الرساله إحنه أهلـها ويشـهد الـ غار
يـ أهل الشام سمعوا ابكربله إشصار

طُفَوا شمعـة محمـد آل أميّـه
اسمعوني اعله منبر هالدعيه
شنو ايزيد وشنو إزياد ؟
رَغُم ما چـانت أعـواد ..صِعَد هاي المنابر
ــــــــــــــــــــــــ

مهدي التقي