من عندي كسروا چم جِنِح .. فاطم فـوگ الجـرِح حطـوا جـرِح .. فا | مهدي التقي

من عندي كسروا چم جِنِح .. فاطم
فـوگ الجـرِح حطـوا جـرِح .. فاطم
كلشي إندِفَن .. چنتي الوَطَن .. فاطم
ــــــــــــــــــــ
مو زينه هسّه اخباري
عايش غـريب إبداري ..كل لحظه اشم حرگ
شمسوّي يومچ بيّه
دفعوا الدنيا إعليّه .. وكلسـا . ضلع يطـگ
خلافچ علي مو طيّب
حاسب سـويّه انشيّب .. ما گِلنـا نفتـرگ
بعيوني أضمچ حالف
ضلت ابروحي إسوالف .. ولا جفني ينطبگ

ضل يركض إركاض العمُر .. فاطم
بابي انطفه وضل الجمُر .. فاطم
سنيني إنتهن .. چنتي الوطن .. فاطم
ــــــــــــــــــــ
صبري بغيابچ وشّل
مـو ذاك حيلي الأول .. گوه انگل الجِدَم
قرآنچ من أنظــرله
فاگدلي مُصحف مثله .. وآياته كلها دَم
ليهسه صوتچ بِذْنِي
امسح دمعتي إبـرِدنِي ..وترس الگلـب ألم
اقره السِوَر واتحسّــر
بصوتچ جميله الكوثر .. والكرسي والقلم

قُرآنچ الضـل ينتحــب .. فاطم
وآياته تصرخ آنـه أحب .. فاطم
وسمعته وَنْ .. چنتي الوطن .. فاطم
ــــــــــــــــــــ
گاضيها بس اتحسّر
والرحّى چي ماتفتر .. كتلتني رحِّتِچ
كلساع أصيحن بسمچ
باقي بغرفتچ رسمچ ..يالعـازه عـازِتِچ
يـا رودة الله التـرفه
يالزهره كلشي إبكفّه .. وبكفّه سطرِتِچ
محّد يسـد إمچانــچ
بس الله يعرف شانچ .. ما أنسه وگفِتِچ

من بعدچ إثگيل الحمِل .. فاطم
حيـدر ولا يشْبَـه قَبِل .. فاطم
ميّت لأن .. چنتي الوطن .. فاطم
ــــــــــــــــــــ
ما رحتي چن موجوده
وسـجادِتِـچ ممـدوده .. والتربه ما غُفَتْ
تسأل السِبحَه تريدچ
يالما تطيح من إيـدچ .. مو سبحتچ بِچَتْ
چبير الجرح ما ينْضَم
محرابچ الصـار أظلَـم .. والشمعه شو طفَتْ
كلشـي بغايبـچ خَنگه
يالرحتي عينچ زرگه .. من السطره ورّمَتْ

كون الله لا ينطي الوكِت .. فاطم
وحـدچ خَـذاچ و ما متِت .. فاطم
عيونچ غُفَن .. چنتي الوطن .. فاطم
ــــــــــــــــــــ
يم الحسين وهسّـه
حته الهوه مو نفسه .. چا شنهي عِيْشِتِي
كلشي اختِلَف من بعدچ
محّـد يزهزه يعوّضِـچ .. ويردلِي وحْشتي
خَصم الكلام العنـدي
عايش الدنيا الوحدي .. ومتاني دَفنِتِـي
بس الگبر يجمعنه
والمُلتَقَـى بالجنّـه .. وترجعلـي وَردِتِي

وين الله هيـچ ونلتقي .. فاطم
والفرگه باچـر تنتهي .. فاطم
بجنّة عَدَن .. چنتي الوطن .. فاطم
ــــــــــــــــــــ

مهدي التقي