يم الأحزان .. موعدچ حان خل نسولف عالخيام بابي أسـهل ذاكَ شـام | مهدي التقي

يم الأحزان .. موعدچ حان
خل نسولف عالخيام
بابي أسـهل ذاكَ شـام
ــــــــــــــــــــ
يمه گعدي وخل نسولف نِقسِم الهَم
العتبه سهله النـار الأكبر للمُخـيّم
الدخنه باچر يمه أضن بالكوفه تنشم
محسن أهون باچر الطف ينترس دم

هناك طولچ ينعرف .. هناك تَلّ ما ينوصف
بي تصعدين
هنا زغير الـ ينعصُر .. هناك هيبه الينّحُر
ما تلحگيـن

موقفچ وين .. ذاك إلحْسين
خيل البصدره إزدحام
بابي أسـهل ذاكَ شـام
ــــــــــــــــــــ
يمّه حصتچ باچر أكثر منّه كلنه
حزنچ أكثر وانتي گلبـچ مو مثلنه
إنتي آخر وحده تبقـين إبشـملنه
ثگل حملچ خمس مرات إبـ حملنه

ضلعي يمچ شي سهِل .. نحچي لولا عالهزِل ؟
من يِصَعْدوچ
الشام خنگه ودربه مُر .. بگده رايدلچ صبُر
من يــودّوچ

الهودج إنشــال .. ولاكـو كفــاّل
وماكو إخوه ولا عمام
بابي أسهل ذاكَ شـام
ــــــــــــــــــــ
يمه آنه أنضرب أهون يمي حيدر
عدنه مالك عدنه عمّــار و أبو ذر
يمه بفراش آنه أنامن وانتي بالبر
إنتي حصتچ يمه ناگه بسوگ تفتر

قنفذ أسهل من شمر .. بابي أهون وإنستِر
بابي خشبات
إنتي كسرچ مو ضلع .. بشامچ إنتي اليندفع
باب سـاعات

إبنص الأجناب .. وخلفچ الباب
ونظرت الشامت سهام
بابي أسـهل ذاكَ شـام
ــــــــــــــــــــ
يمه آنه لبيتي هجمَوا و إعْصِرُوني
ولا أمُـر ذيــچ الخـرابه ويآخِـذوني
ولا دواويــن الشــماته إيدخّلـوني
وياي فضّـه وإنتي وحـدچ يا عُيوني

هناك لونچ ينخطُف..الحچِي إحجار وينگطُف
موش چلمـات
بيش مَتْنِچ يستِنِد .. فضّه مامش بس هِنِـد
والخَجَـل مات

نِسوَه أعداء .. ماكـو (أسماء)
كلهن يشـبهن قِطـام
بابي أسـهل ذاكَ شـام
ــــــــــــــــــــ
يمه صبري وآنه يمچ عنـدي جيّه
آنه أبچي لمحسن وإنتي اعله أخيّه
إحنه كلمن دوره بس وحده القضيّه
و دوري بالباب أنعصر وانتي السبيّه

الله شاء إبحكمته .. وهاذي كلمن حصِّتَه
مــن البـلاءات
باچر اتذكرين أمس .. بيوم طفچ ينترس
إختبـــارات

وعالـ يِمُر بيچ .. گــدها أدريـچ
إنتي زينـب والسلام
بابي أسهل ذاكَ شـام
ــــــــــــــــــــ

مهدي التقي