قد قامت إلـ آه .. وِجَب فَرْض الدمعه ــــــــــــــــــــ وجهت | مهدي التقي

قد قامت إلـ آه .. وِجَب فَرْض الدمعه
ــــــــــــــــــــ
وجهت وجهي وگِمِت
للزچــيه اتوجـهت .. دمعاتي دَمْ
ما نسيت الزهره لا
إننّـي باقــي علـى .. دين الخدم

بدمعـاتي .. وآهـاتي .. متوضّــي
بچلماتي .. ولطماتي .. حل فرضي

عالنيه الأعمــال .. كَبّـَـرَتلِچ سبعه
قد قامت إلـ آه .. وِجَب فرض الدمعه
ــــــــــــــــــــ
آنه عايش عالمي
والعزاء الفاطمــي .. دين وشـرِع
غالي عندي ويا غلاه
حاله من حال الصلاه .. ما ينگطِع

سِرْ دِيني .. خليني .. بمأساتي
ما جامِل .. تسـتاهل .. مولاتـي

عالزهره يا ناس .. كيفي ألطم و أنعى
قد قامت إلـ آه .. وِجَب فرض الدمعه
ــــــــــــــــــــ
الخطّ الأول عِدْ علي
طاح وإنته تگول إلي .. بَسّك البچـي
نبع دمعــي ما يِجِـف
عالروايه إنحِـطّ ألف .. نفس الحچي

أبچيهــا .. وأگضيهـا .. وا ويــلي
ويوميه .. اللطميّه .. إتهد حيلي

الرايد يوافيــچ .. إلا يكسـر ضلعـه
قد قامت إلـ آه .. وِجَب فرض الدمعه
ــــــــــــــــــــ
حگّه شُوْفي لو عِمَه
غير ماتـت فاطمـه .. شنهي العمر
علي إبكبره وما حِمَل
مات عند المُغتَـسَل .. شاف الكسر

تنقدوني .. اتلوموني .. أخدِمها
والزهـره .. هيـّه أدره .. إبوادِمها

حَدّ گطع الأنفاس .. مجلسي ماگِطْعَه
قد قامت إلـ آه .. وِجَب فرض الدمعه
ــــــــــــــــــــ
من الگه ماتم مِنّصُب
بِشِر حافـي أنگـلُب .. و أركض ركِض
الله لا ينطـي الزمن
آنه عايش و أم حسن .. تحت الأرض

يا ربّــي .. من گلبــي .. بسّ أدعي
أُمنيتي .. إبتعزيتي .. إيطگ ضلعي

بس كونچ إبخير .. وآنه بيّه الصَفعَه
قد قامت إلـ آه .. وِجَب فرض الدمعه
ــــــــــــــــــــ

مهدي التقي