محرم الحرام #1445هـ ( أحساس حميده ) …………………………………………………………… | قناة قصائد والحان منبريه
محرم الحرام #1445هـ ( أحساس حميده )
……………………………………………………………
يلهج ابهذا السؤال احساسي
ليش يابو سكينه تمسح راسي
عمي يمكنها العلامه • چني صرت امن اليتامه
بويه مسلم •••• بويه مسلم
…………………………………………………………
عمي اشوفك منكسر
اشبيهن عيونك حمر . او وجهك تغيّر
حيل اظن شابع بچي
ويصعب اعليك الحچي . فكرك تحيّر
دوم تشگبني وترد روحي ابشبگتك
لچن هاي المره شو مامش ضحكتك
عمي ليش امحنب ولازم لحيتك
ومثل كطرات النده اعل الخد دمعتك
گلبي الزغيرون كلش حاير
عمي خبرني اعل ابوي شصاير
عمي احسن بالظلامه • چني صرت امن اليتامه
بويه مسلم ••• بويه مسلم
……………………………………………………………
عمي شو كل الضعن
وگف وبنظرة شجن . ايصد اليه
ودارت اعليه الحرم
يبچن ابحرگه والم . سكنه و رقيه
عمي ليش امدنگه عمتنا الحنينه
ما شفتها ومن گبل هلگد حزينه
ويمها عمي الگمر شو غرگانه عينه
ابلا عمامه امفرع ويصفج بدينه
بالمهد عبدالله هل يوميلي
هم مثلكم بالدمع يبچيلي
ابوجه ماكو الابتسامه • چني صرت امن اليتامه
بويه مسلم •••• بويه مسلم
……………………………………………………………
حسين ما يگدر بعد
اعليها دلاله انمرد . ولا زمها بيده
اعظم الله الاجر
وما الج بس الصبر . ابنيتي حميده
عمي بالكوفه ابوج انطاج عمره
واصگطاها الطاغيه من فوگ قصره
عمي بحبال الخلگ كامت تجره
ابغربه مات ولا العشيره الي تحضره
امنيته جانت گبل گطع انفاسه
حسين حاضر يمه وي عباسه
وكل بني هاشم عمامه • چني صرت امن اليتامه
بويه مسلم •••• بويه مسلم
……………………………………………………………
عمي ابوچ المنولي
ريح جابت صوته الي . يسلم عليه
اعليج وصاني شكثر
ايگول تنطيني العذر . هاي المنيه
گله عاذرتك يمن كطعوا وريده
يلي ما شبعيت نومات اعل ايده
جثتك بدروبهم ظلت وحيده
وياها سحبوا روحها ابنيتك حميده
عمي فدوه انا وابوي العينك
من عمرنه الله وايطوّل اسنينك
المهم تبقه انت بسلامه •چني صرت امن اليتامه
بويه مسلم •••• بويه مسلم
……………………………………………………………
ابنيتي بس هذا الشهر
اعليه هم يجري القدر . تخلص حياتي
يذبحني عطشان العدو
و هم مثلج ابلايه ابو . يصيرن بناتي
عمي راح ايطول بالعاشر بچيچن
والسياط اخطوط مرسومه ابعبيچن
موته كل هاشم و لا سيد يجيچن
مثل شدة جود يا شدة اديچن
امن الشمس حمره العبي ومحرگه
الشمر بالشام و يفرچن سوگه
ماكو لا نخوه وشهامه • چني صرت امن اليتامه
بويه مسلم •••• بويه مسلم
……………………………………………………………
ابموت ابوهم هم درو
ابراهيم ومحمد اجو . شبگوا حميده
ازغرهم يحاچي الاخت
من حضن ابوي اشلحگت . مسلم اريده
ولله اولادك يسلم هظمه هظمه
ارگاب ترفه وسيف ابد ماعنده رحمه
طلب كل واحد على ابن امه يقدمه
ماله گلب ايشوف اخيّه يسيل دمه
مثل ابوهم للقصر جابوهم
لچن مفصوله الجثث عن روسهم
المسلم و ولده الزعامه •چني صرت امن اليتامه
بويه مسلم •••• بويه مسلم
……………………………………………………………
( سيد خضر الزاملي )
