Glasgow coma scale ( GCS ) (For adult) الـ GCS يستخدموا علم | ادوية طبية عامة 💊💉💕❤
Glasgow coma scale ( GCS ) (For adult)
الـ GCS يستخدموا علمود يقيسون مدى وعي الانسان سواء بعد التخدير العام GA او بالمرضى الي يعانون من traumatic brain injury وغيرها من الحالات الـ GCS نحسبه من خلال جمع 3 مراحل وهي :- فتح العين eye opening وعليها 4 الاستجابة اللفظية verbal response وعليها 5 الاستجابة الحركية motor response وعليها 6 فيصير المجموع 15 طبعاً اعلى درجة ممكن نحصلها هي 15 من 15 واقل درجة ممكن نحصلها هي 3 من 15 لان في حال ماكو اي استجابة بمرحلة معينة ننطي درجة وحدة فقط وليس صفر وهسه راح توضح اكثر بالشرح ادناه :-
فتح العين Eye opening :- اذا المريض فاتح عينه بشكل تلقائي Spontaneously هذا ننطي 4 من 4 اما اذا كان المريض مغمض ويفتح عينه بعد ما طلبنه منه بالايعاز الصوتي وليس بشكل تلقائي منه يعني الا احنه نصيحله وليس مبادرة منه وطبعاً من نسكت راح يسد عيونه فهذا ننطي 3 من 4 اما اذا المريض ما يفتح عينه الا تسويله pain معين يعني مثلاً تكرصه او تضغط على اصبعه يعني هيج شي فهذا تنطي 2 من 4 اذا سويتله كل ذني وما فتح عينه يعني ماكو استجابة فهذا تنطي 1 من 4
الاستجابة اللفظية Verbal response :- اذا المريض واعي ومن تحجي ويا يجاوبك بشكل طبيعي وبشكل واقعي واجابات صحيحة فهنا تنطي 5 من 5 اذا المريض مو كلش واعي ومجاي يعرف يوصل للجواب الصحيح يعني يسمعك ويحس بيك بس من تسأله ياخذله صفنه يعني مو كلش واعي فهنا ننطي 4 من 5 اما اذا المريض يجاوب بشي بعيد عن السؤال يعني تسأله انت شسمك يجاوبك ويكلك بيتي بالبصرة يعني جوابه مو يم السؤال فهنا ننطي 3 من 5 اما اذا المريض يطلع فقط اصوات غير مفهومة يعني ما تكدر تفهم منه كلمة فهنا تنطي 2 من 5 اذا سويتله كل ذني وماكو استجابة فهنا ننطي 1من5
الاستجابة الحركية Motor response :- نطلب من المريض انو يحرك ايده او رجله او يشيل راسه فاذا يطيع الامر Obeys وينفذ بشكل جيد فهذا ننطي 6 من 6 اذا ما استجاب نحاول نسويله pain مثلاً نكرصه فهنا اذا مد ايده على مكان القرص ننطي 5 من 6 اما اذا كرصته بأيده مثلاً وسحب ايده يعني ما يمد ايده على مكان القرصه مجرد فقط جر ايده فهنا ننطي 4 من 6 اذا سويتله pain وسوه Flexion بشكل غير طبيعي فهذا ننطي 3 من 6 اما اذا سويتله pain وسوه Extension فراح ننطي 2 من 6 اذا سويتله كل ذني وماكو استجابة حركية فهنا ننطي 1من6
