2022-07-30 15:07:59
قصيدة " مغرب نهرهم"
ـــــــــ
مغرب نهرهم بي غياب ايمينك
سهم العده گاعد بحضرة عينك
طلعت اسنون اعداك يم احسينك
آنه زينب يا كفيلي
ــــــــــــــــــــــــــــــــــــــــــــــــــــــــــــــــــــــــــــ.
عالشريعة يغيب نورك يابو فاضل يالحنين
والدمه التجري اعله وجهك ضَيّعَت نور الجبين
امكشّره اسنون الشماته و تضحك اگبال الحسين
خالي ظهره و يصفگ ايده حسين ما عنده معين
ضل وحده اخوي حسين يفرك بيده
بعدك يعباس العمر ما ريده
جيش ال اميه اليوم عَيّد عِيده
اغيابك ايزيّد عويلي
ــــــــــــــــــــــــــــــــــــــــــــــــــــــــــــــــــــــــــــ.١
يمشي ويه الگاع راسه حسين مو طبعه يعود
حسين ذاك الهيبه صاير چنّه خيمه بلا عمود
گَلي يختي البگه براسچ لا كفيل و لاكو جود
يختي كبّرني غيابه و شيّبت يم الزنود
هذا العجيد الحارس لـــ صيواني
وحزام ظهري بحربي و بميداني
بغيابه تطلع روسهم عدواني
شيّبيت و راح حيلي
ــــــــــــــــــــــــــــــــــــــــــــــــــــــــــــــــــــــــــــ.٢
اتمرجلت خويه علينه عكبك اشباه الرجال
واللي يطلب ماي منهم ردو اعليه بنبال
لمّن اسأل وينك انته ليش مترد السؤال
من عگب گطْع الچفوف انگطعت انفاس الدلال
خويه ابْوِجودك ما أحس بيتمي
يعْدال ابوي و كل اخُوتي و أمي
عگبك يتيمه و عايشه وي همي
و المصايب تعتنيلي
ــــــــــــــــــــــــــــــــــــــــــــــــــــــــــــــــــــــــــــ.٣
حسين عگبك صار شايب ما گدر حمل السلاح
من عگب عباس جسمه مأوى نبلات و رماح
طاح فوگ الگاع دامي چن ينابيع الجراح
بالعجل ريحوه انِزْلَوْ عمر للعدوان صاح
گام الشمر يتربع اعله صدره
يقبض لحيته و بالنحر يطبره
مثل النهر گام ايْتِجاره نحره
امْصابه ايْعَذِّب دليلي
ــــــــــــــــــــــــــــــــــــــــــــــــــــــــــــــــــــــــــــ.٤
يالكفيل الحگ علينه عتبي بغيابك يطول
والأمان اخلاف عينك كله يا خويه يزول
إگعد و عاين أخيّك صار ملعب للخيول
مْطشر و محّد يلمّه جسْم ابن بت الرسول
جور الأعادي النوب رد اعلينه
لا ضل كفيل و لا حمه ايحامينه
بسمك يعبّاس اشكثر نادينه
خويه ما تسمع عويلي
ــــــــــــــــــــــــــــــــــــــــــــــــــــــــــــــــــــــــــــ.٥
بسمك ابكل لحظه ألهج من كثر ما أنتخيك
آنه اخت عباس اگول و لو گلتها امتاز بيك
اشكبره بِوْجودك خيالي من كثر ضي ال عليك
ذره ما ضل من خيالي ساعة ال گِطعَوْ إديك
حگي امن انوح و دمعِتي مذروفه
گالو گمر ليلچ گطيعه اچفوفه
و الگَمره كلهه ابغيبتك مخسوفه
خويه ما يرحمني ليلي
ــــــــــــــــــــــــــــــــــــــــــــــــــــــــــــــــــــــــــــ.٦
يالگمر ترضاها عگبك طلعت اعيون الظلام
خويه و النيران گامت تاكل بروح الخِيام
ماكو خيمه و لا ملاذ و وين أگعد وين انام
ومن يصبّح صبح باچر عالمتن أقره السلام
من باچر اصعد عالهزيل الأعرج
يتمايل و محّد يعدله الهودج
وتنظر علينه اعداكم و تتفرّج
وراسك وياي برحيلي
ــــــــــــــــــــــــــــــــــــــــــــــــــــــــــــــــــــــــــــ.٧
خادم خدام الحسين (عليه السلام) : علي جبار الخفاجي
34 viewsedited 12:07