2022-06-10 21:34:22
نـــصــيــحـة لامــتـحــان اســـــــطنبول غداً
امـتــحــان اســـــــطنبول
كلنا منعرف مدى أهمية هالامتحان ، و بكون هو الامتحان المفصلي للطلاب القديمين
لذلك حابب اذكر كم نصيحة عسى ولعلى تفيدكم
___
الأمـر الأول : موضوع لوزام الامتحان
لاتنسوا تاخدوا قلمين رصاص ومحاية وبراية والأهــم القلم يلي انت بترتاح بالكتابة فيه لانه بعض الأحيان الكتابة بقلم الرصاص بكون غير مريح وممكن ياخد وقت لذلك برأيي عيفون للتظليل فقط ولا تنسى ورقة دخول الامتحان والكملك + مي وبعض الطلاب ما بتفوت معها مي وهالشي برأيي خطأ + قبل الامتحان لا تّقل بالأكل وخلي أكلك خفيف (هالشي مهم وممكن يأثر عليك من دون ماتحس )
الأمــر الـثـانـي : للطلاب يلي بتدرس قبل الامتحان
وقفوا الدراسة من هلا ولاتخربطوا حالكن وتتعبوا مخكن زيادة هالساعتين تلاتة مارح تخليكن تاخدوا تامة بالعكس رح فيه ضرر اكتر من الفائدة + ناموا بكير .
الأمـر الـثـالــث : موضوع التوتر الزائد والخوف من الامتحان والحركات هي
اعتقد صعب اشيل هالافكار من عند الأغلب ولكن صدقاً مافي داعي يعني مارح تتغير الأسئلة ولا رح تنزل الأجوبة عليك اذا توترت وعبطت حالك بالامتحان و حط ببالك انه التوتر والخوف بهيك امتحان رح يخلي عندك أخطاء كتير ممكن توصل لأكثر من 10 أسئلة ، لذلك اول ما تاخد الورقة سمي باسم الله وحافظ على هدوئك وتوكل على الله ( هالشي مهم جداً )
الأمــر الـثـالـث : داخل قاعة الامتحان
أول شي فوت عالقاعة قبل بوقت مشان تهدى اعصابك لأنه بالقاعة بكون الجو هادي مو تجي تفوت آخر خمس دقايق لأنه مخك رح يضل مع الشي يلي كنت عم تعمله برا ورح تكون مشوش + انت وعم تحل لاتعيف التظليل للآخر وبرأي الأفضل تظلل كل صفحة وقت تخلصها وإذا كل سؤال بسؤاله أفضل والأهم انتبه للتظليل الصح ( تعيف التظليل للآخر خطأ كبير) + رح يعدي عليك أسئلة ممكن ما تنحل لذلك اعطي السؤال وقته فقط وإذا شفته ما رح ينحل حط عليه إشارة وكمل وبس تخلص بترجع عليهن ( بعض الأسئلة يلي ما بتنحل بس ترجع عليهن بتنحل من نظرة وحدة ) + بس تخلص الماث وقف خود استراحة ثواني شراب فيها مي وتابع ونفس الأمر للهندسة والايكيو + لاتطلع لحتى المراقب يقلك انتهى الوقت حتى لو كنت متاكد انه رح تاخد 100 + ابدا بحل بالمادة الصعبة بالنسبة الك لأنه بداية الامتحان رح يكون تركيزك عالي + لاتشلف لأنه الغلط بروح الصح
الأمــر الأخـيـر و برأيي الشخصي هالأمر أهم شي سواءً للامتحان أو لأي عمل آخر ويلي هو :
الـتـوكـل عـلـى ﷲ
صدقاً هالأمر أهم شي للامتحان و لأي عمل كان .
إذا توكلت على ﷲ بكل عمل وبكل خطوة حاشى لله يخيب أملك ، إذا توكلت على الله رح تنجح وتحقق حلمك .
والرضا بكل حال حتى لو دخلت الامتحان وطلعت اخد علامة ما عجبتك أبداً << قول الحمد لله وابتسم >> وبكل عمل سواء فشل أو نجح عمول هيك و تكون من القلب وليس فقط كلام و صدقاً رح تكون شخص ناجح بكل تفصيل من حياتك ( ناجح مع عمل وتوكل ) .
عفكرة من جمال التوفيق انه ممكن ما تتوفق بالامتحان ولكن تتوفق بالقبول وهالشي عن تجربة
لذلك خلي ثقتكم بربنا أكتر من أي شي
خلوا ثقتكم بنفسكم عالية كتير
الله يوفقكم جميعاً وان شاء الله امتحان بكرا بكون بداية قبولات وعلامات مميزة
https://t.me/asctyos2
____
بالتـــــوفيـــق للجمـــــيع
2.4K viewsHUSSEİN Eed, 18:34