زامانسیز شاعیرین ائلسیز اوزانین دنیاسی سیر گلدی،سیر گئتدی،گئتد | 🎸دنیای کلیپ آهنگ آذربایجان وترکیه🎻
زامانسیز شاعیرین ائلسیز اوزانین
دنیاسی سیر گلدی،سیر گئتدی،گئتدی
منیم تاریخیمی ساختا یازانین
گوزونده تیر گلدی ،تیر گئتدی ،گئتدی
واخت اولوب دنیانین چات ها چاتیندا
یولو بنده دوشوب کوهلن آتیندا
عالیم ده نادانین کتاباتیندا
جاهیله بیر گلدی،بیر گئتدی، گئتدی
آغالار کئف چکدی،یاشادی خومار
یاغیش تک باشینا یاغدی موفته وار
مجنون اینسانلارین الینده قابار
آلنیندا تر گلدی،تر گئتدی ،گئتدی
ازلدن قدرتی ایلک محبتین
عشقینه جان وئردی بشریتین
اصیل صنعتکارین،اصیل صنعتین
قیمتی زر گلدی،زر گئتدی ،گئتدی
قوی منی دینله سین ائللر اوبالار
طرلان سیز داغلارین باشین سار آلار
زامان زامان بیزیم اولو بابالار
نر اوغلو نر گلدی،نر گئتدی ،گئتدی
هر کیم حقیقتی تاپدی اوزونده
وارلیقی گول آچدی عشقین دوزونده
قانان اینسانلارین گوره ن گوزونده
"ستار " اوجاق گلدی،پیر گئتدی گئتدی
ستتار گلمحمدی
