کیم دیر پناهی حسرت ایله زار اولانلارین؟ کیم دیر طبیبی درد ایله | یاران دکتر علی باقرپور آذریان

کیم دیر پناهی حسرت ایله زار اولانلارین؟
کیم دیر طبیبی درد ایله بیمار اولانلارین؟

کیم دیر گومان یئری بو گومانسیز قالانلارا؟
کیم دیر اومید ائوی بو گرفتار اولانلارین؟

کیم دیر آچان بو کور گئجه لردن صاباحه یول
کیم دیر توتان دوامینی بیدار اولانلارین

ای هر مرض علاجینا درمان ائدن طبیب
یوخمو دواسی دیده سی خونبار اولانلارین؟

جور زمانه دن آلیشیب یاندی باغریمیز
بیر لحظه یانمادی اوره‌یی یار اولانلارین

آه و فغانیمیز بورودو عرشی نئی کیمی
زینهاره گلمه‌دی قولاغی کار اولانلارین

یاندیق، یاخیلدیق، عالمی تیترتدی ناله میز
بیر آن یاشارمادی گوزو خونخوار اولانلارین

آغلا کونول! سیزیلدا، مگر گوز یاشین ییخا
بنیاد جور و ظولمونو، جبار اولانلارین
****
فرمان فرضی / آذر1400