2021-12-01 16:05:42
خليك عارف إنو ما ف زول حيحبك م لم انت تحب نفسك، واعرف كمان انو حُب الناس م بالضرورة يكون غايه، أهم شي نظرتك لنفسك وقبل م تفتش التقدير ف عيون الناس فتشو جواك، واعرف كمان انو المثالية م موجوده أبداً وم ف زول كامل بدون عيوب بس الفرق كيف كل واحد بيتعامل معاها، اعترف بأغلاطك وحاول صلحها بدل م تفتش ليها مبررات، واعرف انو ما دايماً انت الضحيه احياناً بتكون الجاني، وخليك متأكد انو الدنيا دي مستحيل تقيف ع زول مهما كان غالي، ومهما كان الليل طويل برضو الصباح بجي .
حِب نفسك ودللها وم تنتظر اهتمام من زول وخليك ماسك قوي ف الشعرة البتفصل بين حب الذات والغرور، وكون دايماً انت الكتف البتميل عليهو لانو الجرح م بيوجع الا سيدو .
وكمان اعرف انو خيبه واحده ما معناه انو الجاي كلو خيبات عشان كده ادي كل زول فرصتو بس قبل ده اتعلم كيف تكون مرن واتعامل مع الناس ع اساس انهم محطات بس، وخلي حياتك بسيطه وم تخربها بالدراما لانو الحياة دي أبسط من ما انت بتتخيل.
أدي الحزن حقو وأدي الفرح حقو واعرف انو م ف حال بدوم للأبد.
خلي صلاتك وقرآنك هم سلاحك واتذكر انو الخير في ما اختاره الله لك، وإتذكر انك م جيت الدنيا دي من فراغ ولو مره حسيت نفسك فاشل وم مفيد واقنعت نفسك بالفكره دي إتذكر انو ده هو بدايه الفشل ، عشان كده حاول لحد م تصل لأنو حتى المحاوله تحتسب انتصار.
ومهما حصل وحتى لو م ف أي زول اتقبّلك وحسيت انو الناس كلها عندها ملاحظات عليك وعلى شخصيتك أبداً أبداً أبداً م تحاول تغير حاجه فيك عشان كلام الناس واوعك تنافق عشان تنال اعجاب زول، خليك انت وم تتغير الا عشانك انت لانو م ف زول بيستاهل غيرك.
وأخيراً ف تلاته حاجات خليها دايماً قدام عينك:
*You can
*You deserve
*You are what you want to be
#shamshoom
1.2K viewsshamshoom , 13:05