2022-05-21 23:28:03
في سؤال بيؤرق العُلماء دايمًا وهو اذا كان الكون بالضخامة الغير طبيعية دي ومُستمر في التضخم بينما بنتكلم، فليه لغاية دلوقتي ما صادفناش ولا أي نوع من الكائنات الاخرى خارج الكوكب مهما بلغ ذكائها او قل حتى.. ليه ماوجدناهوش! وسموا الكلام دا مفارقة فيرمي Fermi paradox.
المهم إنه في مُفكر صيني عظيم كده وكاتب روائي حائز على اكبر جوائز في المجال، طلع بإجابة للسؤال دا من وجهة نظره وعملها كتاب اسمه "نظرية الغابة المظلمة" Dark forest theory.
الراجل في النظرية بيقولك مين قالك انه لو في حضارة او كائنات تانية في الكون وصلت لقدر ضخم من التقدم انها تسافر في الكون بسرعة الضوء وتستكشفه، هيكون عندها أصلًا رغبة في مساعدة أي حضارة تانية في طور التقدم!
أي كائن بيوصل لذروته أو شعب لقمة تطوره، بيجيله حالة من البارانويا والقلق إنه حد حواليه يوصل لنفس المرحلة او القدر من التطور زيه، فيحاول يقضي عليه أو يشيله من مكانه، فليه مابنفكرش إنه الكائنات التانية الذكية دي، مش هتتصرف نفس التصرف وتتحرك في الكون تشوف أي حضارة تانية او كائنات بتتطور جامد، فتقوم قاضية عليها كلها عشان تقضي على أي احتمالية لوجود تهديد منها مستقبلًا!
دا السبب إللي عشانه عمالين نتحرك في الكون ومش قادرين نوصل أو نتواصل مع أي كائنات تانية حوالينا، ولا في حد بيحاول يتواصل معانا عالأقل على حد علمنا! عشان في حضارة متطورة عننا كلنا قدرت توصل ليهم وقضت عليهم بالفعل، وإحنا بمحاولاتنا البسيطة للبحث عن أي حياة خارجية، ممكن نكون وصلنالهم فكرة إنه إحنا في طور التقدم إللي ممكن يهددنا، وبما إنهم متقدمين كفاية، فلعلهم باعتنلنا صاروخ بسرعة الضوء بيسافر من الناحية التانية من الكون من مكانهم دلوقت لينا هنا يدمر حضارتنا في نقطة معينة في مستقبلنا! محدش عارف! لكن الاكيد تفسيره منطقي، بس بمنطق البشر.
------
ملحوظة لسؤالك الجاي طب ليه بنقول انهم اذكى مننا، مش إحنا الاذكى منهم.. إللي يقدر يسافر بسرعة الضوء ويوصل للتاني الأول، يبقى هو المتقدم والاذكى.. لو إحنا متقدمين عنهم، كان زمانا وصلنالهم من زمان لأن دا قمة تقدمنا، لكن هما ممكن يكونوا تقدموا كفاية إنهم يخفوا وجودهم.
647 viewsaliwinner100, 20:28
ك
