2021-07-28 14:53:02
السلام عليكم ورحمة الله وبركاته يا عظمة الثانوي العامه
طبعا عارفة إن النتيجة والتنسيق شاغل بالكم جدا وبتفكروا فيها، وهل انا هوصل لحلمي اللي بتعب عشانه ولا مش هوصل
خليني أقول أولا كده مفيش حاجه اسمها كلية قمة،، مستغربين ليه!
بتكلم جد فعلا، انت اللي بتخلي الكلية اللي تدخلها قمة بالنسبالك، أو العكس
لازم النقطه دي تكون ف دماغكم كويس جداً عارفه ان الكل عارف كدا بس مش قادر يغير فكر المجتمع وعشان كدا لازم تعرفوا إن ربنا عمره ما بيضيع تعب حد لأنه هو العدل سبحانه وتعالى
يبقى احنا نعمل ايه يا كتاكيت،، احنا نذاكر ونعمل اللي يرضي ضميرنا ومنفكرش ف اي حاجه، ولا نفكر ف النتيجه ولا نفكر ف الكلية ولا اي حاجه خالص،،
هتقولوا طب ازاي منفكرش دي واخدة حيز كبير من دماغنا وتقريبا بنحلم بيها
انا كنت ف يوم من الأيام مكانكم والشعور ده كان مسيطر عليا بس أنا لقيت اللي يقولي سيبيها على الله، ما عند الله لا يضيع وتعبك عمره ما هيضيع والنتيجة دي مش بتاعتك انت دي بتاعة اللي خلقك ومكتوبالك واللي مكتوب ع الجبين تشوفه العين زي ما بيقولوا ،، يبقى تقلق ليه وأمرك في إيد رب رحيم أحن عليك من أمك، ده حتى يبقى عيب ف حقكم
طيب أنا ليه بقولكم متفكروش ف النتيجة وبكتب مخصوص ف النقطة دي
لأن بكل بساطة كتر التفكير فبها هيسببلكم قلق شديد وزي ما انتو عارفين القلق والخوف مش كويس أبداً ليكم،، كان فيه مدرس بيقولنا 70ف الميه من النجاح في تالته ثانوي هو عدم الخوف وعدم القلق وفعلا عنده حق،، لما تبقى داخل الامتحان مطمن ومبتفكرش ف حاجه وسايب أمرك كله لله طبيعي هتحل بكل بساطة ومن غير توتر وتقدر تفتكر المعلومات بسهولة ومن غير تعب وهتقدر تواصل مذاكرة لباقي امتحاناتك
بقول كفاية عشان مطولش عليكم ومتنسوش الصبر وحسن الظن بالله
وربنا يفرحكم يا دفعة
#عافر_حلمك_يستاهل
465 viewsedited 11:53
C
