بسم الله، والحمد لله، وبعد.. **مهم اتمنى تقرأوه للآخر.. بأم | 🎓كيمياء🎓تالتة ثانوي⚡zakir⚡

بسم الله، والحمد لله، وبعد..

**مهم اتمنى تقرأوه للآخر..

بأمر الله يوم الإثنين هيبقى يوم عرفة، وطبعًا كلكم عارفين فضل اليوم دا فمش هتكلم فيه كتير..
بس قبل ما أتكلم ف الموضوع المهم ال عوزاكم تاخدوا بالكم منه هنبه على أمرين

- يوم عرفة دا مش للتنظيف، ولا للأكل.. دا يوم للعبادة؛ لأنه الملك سبحانه وتعالى بيتجلى ف اليوم دا في النهار إلى السماء الدنيا

- أرجوكم أرجوكم.. بلاش نمسك الفون ف اليوم دا لأي سبب مهما كان
دا أكتر يوم يُرجى فيه العتق من النار
هو يوم واحد هات/ي آخرك لعلك تُعتق من النار
وهتاخد أي أكتر من إنك تُعتق!!

أنا جايه أكلمكم بقا مش عن فضل يوم عرفة ال صيامه بيكفر سنة قبله، وسنة بعده
ولا علشان هو يوم العتق، ويوم إجابة الدعاء إن شاء الله

هكلمكم عن الدعاء ف اليوم دا.
النبي ﷺ قال خير الدعاء دعاء يوم عرفة :)

مبدأيًا.. هتقسم الدعاء لأربع أقسام (مع التركيز على أكتر كام دعوة محتاجهم في حياتك.. سواء دين أو دنيا)

الدعاء هيتقسم كالآتي:
1- لنفسك : ودا بيشمل إنك هتدعي لنفسك دعوات ف دينك وآخرتك، ودعوات ف دنيتك
زي أي الدين والآخرة؟
(الهداية / العتق / صلاح حالك وقلبك/ الجنة/ حفظ القرآن/ حسن الخاتمة/ المغفرة... إلخ)

طيب والدنيا؟؟
"نخلي بالنا إنه دعوات الدنيا برضو نبتغي بها رضا الله"
(الزوج/ـة الصالح/ـة،، الذرية الصالحة، الصحبة، عليك دين.. مريض.. مكروب.. إلخ)

2- تاني قسم ف دعائك هيكون للأهل
وبيشمل :
- الوالدين (ودا من تمام البر بيهم.. ادعيلهم بالهداية،والعتق، والرضا وو..)

-اخواتك (بالأزواج الصالحين، الذرية، الرضا، المغفرة... إلخ)

-باقي عيلتك (أنا عارفه إنه ممكن يكون في خلاف بينك وبين عيلتك بس ادعيلهم لعل الله يتقبل دعائك ويصلح حالهم، واعتبره من صلة الرحم)

3- تالت قسم هتدعي لصاحبك
سواء صحاب سوشيال أو ع أرض الواقع
ادعيلهم بقا بخيري الدنيا والآخرة

4- رابع قسم هتدعي للمسلمين والمسلمات جميعا
ودا بيشمل جيرانك، والمكروبين، والمسحورين، والمُستضعفين ف كل مكان، والمعتقلين مش ننساهم طبعًا، والأموات.. إلخ
وادعي بصلاح حال الأمة الإسلامية.

هنبه على كام نقطة
- وأنت بتدعي ادعي دعاء المُضطر.. دعاء حد بيغرق بجد ومحتاج ربنا ينجيه

-مهما كان طلبك مستحيل ادعي ومتخليش الشيطان يضحك عليك

- تباكى في الدعاء لحد ما تبكي وتعيط بجد
أرِ الله ذلك وانكسارك وضعفك

- وأنت بتدعي لغيرك.. كأنك بتدعي لنفسك
ألح بالدعاء

- ادعي بقلب حاضر، ادعي وكلك يقين إنه ربنا هيستجيب لدعائك.

-افضل ادعي وألح وعيط وتذلل لله
انطرح على بابه، اطرق الباب لعله يُفتح لك من كثرة القرع

-لو هتطلب من حد بدعيلك ف لا تتواكل وتظن إنه الشخص دا ولي من أولياء الله دعاؤه بس ال هيجاب
رب أشعث أغبر لو أقسم على الله لأبره

- وأنت بتطلب من حد الدعاء.. خد نية إنه ينتفع بدعائه لك

- لما بتدعي لغيرك في ملك بيقول ولك بالمثل

cpd