2023-04-27 16:00:58
يابا، لشنو الزرع جف وذبل، رغم أنه الموية فيّ؟
شان الأرض مليانة دم، والشجر حاشاه مابخون البشر ويشرب دمائهم، ولو مات عطش.
و لشنو السماء بتمطر غزير رغم أنه الدنيا صيف؟
في شان قلوب أماتنا الأتقطعت، ومالقت زولاً يخفف وجعتا، بكت السما قالت يمكن تواسيها في مِحنتها.
أحكي لي طيب عن زمان، كانوا الصُغار بيلعبوا في نُص الشوارع والمُدن، ولا متلنا بيدسوا تحت السراير والكنب؟
يابا، جاد الله المرق يوم الحرب، وأهله ماعرفولوا درِب، بيكون عايش ولا مات؟
مجدي العريس المات عشان خاطر الوطن، كيفن حبيبته بعده بتقدر تعيش؟
وحبوبة الماشيه لي بلد النبي وضربوها في نص المطار هسا الله بيحسبها مع الحجيج؟
ومُش قلت لي أنه الأيادي الله خلقَها لينا عشان العِناق؟
نان دا منو الاخترع السلاح وخلا الأيادي تشيلوا بدل نقالد بعض؟
يابا، خلك من دا كله وقولي، كيفن الكتلوا الصغار بينوموا كأنهم ماعملوا شي؟
ما بقطِّع قليبهم نواح الأمهات؟
ولابخافوا من حسبنت الأبهات؟
يابا، هسا البفوز بعد يملأ كل الواطة دم بيقول لي نفسه اِنتصر؟
ومن بين سؤالات سر الختم، أتذكرت مرة سؤالي لي أمجد أخوي.
يا زول كان الله شال أمانتهُ وسألوك، عمرك ودرتو وين بتقول شنو؟
جاوبني وكأنه كان راجي السؤال.
_في شيل جنازات الصُحاب.
ضحكتا زين رغم أني كُت موجوع شديد، وقلت له براك يا أخوي متشائم شديد، والبلد فيها من الخير كتير البنضيع شبابنا في.
والليلة واقف في نص البلد أشيل الفاتحة في روح
الصحاب
العيلة
والوطن الحزين.
وبالرغم من كل الحصل، ما وجعتني الحرب على قدر ما وجعني أنه في ساحة الحرب كنا أخوان ولدونا من رحم ذات الوطن.
1.2K views๏͈͈ مۣۗہصۣۗہطۣۗہفۣۗہى ๏͈͈͈͈, 13:00
خ
