الأهلي بيلعب كل يومين ماتش، وغير إنه بيلعب كتير ف وقت قليل فهو | اخبار الاهلى لحظه بلحظه
الأهلي بيلعب كل يومين ماتش، وغير إنه بيلعب كتير ف وقت قليل فهو جاي من فترة ضغوطات وبطولات ماتشات مهمة وجاب القارة من شرقها لغربها ولعيبتك بذلت جهد ١٠٠٪ و كولر حتى الآن ناجح بإمتياز سواء ع مستوى الأداء أو تحقيق البطولات.
- من فترة مش بعيدة ف إحدى استوديوهات التحليل قبل التوغل ف ماتشات أفريقيا اتقال ف حق أهلي كولر إنه كويس محلي نسبياً وغير جيد ع مستوى أفريقيا ولسه كولر ما قدمش أوراق إعتماده.
- أنا ف البداية تفهّمت الكلام ده بسبب تخبط نتايج الأهلي ف دور المجموعات وما قدمش أفضل حاجة، لكن استوقفتني جُملة محلياً كويس نسبياً.. وقتها بردو اتقال إن كولر لو ما كسبش أفريقيا يبقى هو لم يقدم أوراق إعتماده فعلاً وما يستحقش أكتر من كلمة كويس نسبياً كمحلي لكن لو كسب أفريقيا هنغير الجُملة وهيبقى نجح مع الفريق.
* ده كان تقييم الإعلام واستديوهات التحليل لمدربك اللي من بداية الدوري ما خسرش ولا ماتش وبيحقق ثلاثيات ف بطولات مختلفة وقدم أداء كويس ف كأس العالم ومحقق أول بطولاته المحلية ع حساب الزمالك و بيراميدز وخلاص بيحقق الدوري.
دي نظرة إعلامك لمدرب ناجح النجاح ده كله ع المستوى المحلي وكانوا شايفينه " حلو نسبياً " وقال إيه تقييمه ونجاحه يبقى من أفريقيا!
- ف حين إن فيه مدربين كانوا بيكسبوا ماتشات محلية ويطلعوا يتغنوا بيهم ويتقال ياريت المدربين يتعلموا منهم والعراب والعبقري البروفيسور... إلخ.
فا شتّان الفارق بين التقييم هنا والتقييم هنا والنجاح والأرقام هنا وهنا ومع ذلك خلل ف المعايير والمكاييل من إعلامك، وده بعينه اللي حصل مع موسيماني ونجحوا فيه وعرفوا يستغلوا أوقات التعثر و استخدموا زعل الجمهور قت التعثر ضد المدرب ونجحوا ف تطفيش موسيماني بالأسلوب ده.
تقييم إعلامك لمدربي الأهلي غير مِهني بالمرة، هم عايزين يستغلوا طموح جمهور الأهلي وحبه للمكاسب ويوصلوا النادي لمرحلة إنك كل فترة يبقى معاك مدرب مختلف وما تحافظش ع مدربينك وتبني بيهم لسنين قدام، هو هدفهم يخلوك زي باقي فرق الدوري.
* الفريق راجع من ضغوطات ماتشات صعبة وسفر ووقت قليل بين الماتش والتاني، وارد تتعثر تاني وتالت ورابع مافيش فريق هيفضل يحقق نتايج إيجابية وإعلامك مش هيعدي فرصة زي دي وهيكرروا اللي عملوه قبل كده.. لازم الجمهور يكون فاهم وواعي للي بيحصل وإن حتى وإن فريقك خسر ماتشات ف الدوري فأنت خلّصت البطولة، اطلع انتقد وده حقك بس اوعى تمشي ورا كلام أعلامك وتقع ف نفس الغلطة اللي حصلت قبل كده، لازم الإدارة هي كمان تحافظ ع المدرب بقدر الإمكان وما تسلّمش المدير تسليم أهالي زي ما حصل قبل كده.
تعثر إمبارح مش هيبقى آخر تعثر.. ياريت نفهم الموقف ونشوف المشهد صح لأن حتى إمبارح فيه ناس هاجمت المدير الفني بشكل مبالغ.
