2022-07-30 11:04:45
بتحكي
مرة جاتني صحبتي وبتبكي
الكلام دا كان زمان في الثانوي
المهم سألتها يابت مالك؟ بسم الله الرحمن الرحيم
إذا بي إتفاجاء إنو حبيبها خانها؟
قلت ليها بتبكي عشان ولد إنتي مجنونه ولا شنو؟
قالت لي أنا والله يا أبرار بحبو وهو زاتو كان بقول لي كدا وواعدني بحاجات كتيرة نعملها سوا!
والله أنا كمان اتأثرت معاها ياخ البنت دي الحصص كلها كانت بتبكي
قلت ليها هسي دي كلها غيرة عليهو إنتي متخلفه
ليه إنتو متزوجين ولا شيء
بقت تبكي زيادة وأنا بحاول أهدى فيها
منو في صحباتاكم ما جات وحكت ليكم عن حبيبها
منو في صحباتكم ما جات وقالت ليكم بقي ما بحبني وإتغير علي؟
منو في صحباتكم ما جات وحكت ليكم كيف إنهم عرفوا بعض أول مرة وفي عيد الحب(الكفار ) وما هو بعيد
جاب ليها شنو؟
يابنات إحنا لما نقول ليكم ربنا حرم العلاقات بين البنت والولد
مش عشان غيرانين منكم وما عندنا حبابيب لا والله
والله ربنا بحبكم وعالم بمصحلتكم وكيف قلب الأنثى ضغيف وبيتعلق بالطرف التاني بسرعه
كتير بنشوف من الاستشارات حبيبي قال حا يجي يعقد علي ووعدني لكن ما جا أو أمو جبرتو يتزوج بت خالتو
طيب وأنا الحبيتو أعمل شنو؟
كمية إنكسار كمية ألم لا يعلم بيها إلا الله
ياخ الله أمر أطهر وأعف النساء بشنو إنتي عارفه؟
{يا نساء النبي لستن كأحد من النساء إن اتقيتن (فلا تخضعن بالقول فيطمع الذي في قلبه مرض)} طيب يعملو شنو؟
{وقلن قولاً معروفاً }
فكيف بيك إنتِ؟ اتقى الله يا أختي اقطعي علاقتك بالولد المتواصلة معاهو دا
على فكرة ماف شي إسمو صديق بيست كراش كلها مسميات ما أنزل الله بها من سلطان
العلاقات بين البنت والولد خارج إطار الزواج حرام شرعاً وستظل حرام
والدليل قوله تعالى{ولا متخذات اخدان} النساء 25
و للرجال {ولا متخذي اخدان } المائدة 5
و90% الولد دا بقضي بيك وقت بس بغش عليك وممكن يحكي ليك حاجات كلها كذب عن حياتو عشان تصدقيهو ويقدر يصل لهدفو
أي والله عايزة تتأكدي؟
امشي ليهو وقولي ليهو أنا ما عايزة أغضب ربي وحا اقطع علاقتي بيك وحا استناك تجيني في البيت وهاك دا رقم ابوي
اديهو يومين ولما تتأكدي إنو شاف الرسالة اديهو يوم لو ما رد معناها كذاب احظريهو دا لو ما حظرك قبليهو
أما لو قال ليك علاقتنا دي ما فيها شي وأنا دايرك لي قدام
تاني رسلي ليهو رقم أبوك وقولي ليهو نفس الكلام الفوق
واحظريهو
إنتي غاليه والله وتستاهلي واحد يتعب عشان يقدر يصل ليك وما يقدر يتكلم معاك براك إلا يوم العقد ويشوفك في الحقيقة مش كل ساعه رسلي لي صورة ليك ولو ما رسلتيها حضرتو يزعل ياخ خليهو يطق الخايب الباطل
ومعاها الفرحة واللخبطة في الكلام تكوني ساكته وتقولي
الحمد لله الذي من على من فضله وأتاني به حلالاً طيباً
اتركيه لله أختي
مكتوب بكل حب والله
_
198 viewsRahma Omer, 08:04