بسم الله
يمكن كتير هتستغرب إنه ليه الناس اللي بتساعدهم أو بتقدم لهم معونات مادية أو معنوية بيتحولوا معاك فجأة!
ممكن واحد صاحبك تفضل تساعده في أموره الخاصة نفسه أو حتى في عمله وبعد كدا تلاقي ردود أفعال غريبة منه وتستغرب ليه بيعمل كدا!
بنفس الشكل لو حضرتك مميز ولك مكانة أو موضع مختلف عن المحيطين بك سواء كان ديني أو علمي أو عقلي وغيره، حتى ناس من الجيران أو العائلة ممكن تحس منهم بأفعال غريبة كلها محاولة لتشويهك والتقليل منك، وتبدأ تشك في نفسك إن أنت فيك حاجة غلط!
لكن الحقيقة إنك محاط بمجتمع قليل الدين، وبالتالي قليل الرضا والقناعة بما قسمه الله له، وبالتالي مش هيهدأ له بال ولا يرتاح أبدا طول ما أنت أحسن منه وأكثر ذكاء أو مهارة .. فالوضع الطبيعي إنه يفضل يقلل منك سواء أدامك أو من وراك، او يفضل يتعرض لك بالتشويه والسخرية ولصق تهم باطلة عشان بس يرضي ضميره ويريح نقصه..
وعشان كدا ما تزعلش لما تلاقي الأمر دا مكرر معاك، لأن تجرد الناس عن الدين يخليهم يعملوا كدا وأكتر.. واعرف إن العيب مش فيك أبدا، إنما في الشخص الناقص اللي عايز يشعر بالارتياح من التنقيص منك والتقليل عشان أنت أحسن منه مكانة أو علما أو مهارة أو غيره.
