2022-07-21 07:32:00
نصائح للستات من أجل حياة زوجية شبه هادئة
1- ناكل ايه بكره!!؟
في اللحظة دي الدنيا بتسود قدام الراجل وبيبدأ يدخل في حالة اكتئاب وبداية تخلف عقلي.. ويبدأ يفتكر الأسئلة التعجيزية في امتحانات الشفوي..
هو بياكل أي حاجة في أي وقت..
السؤال ده تسأليه بينك وبين نفسك وبصوت واطي وتعملي أي حاجة وهو هيطفح بمنتهى السعادة.
وهناك مكان محجوز في الجحيم لهؤلاء اللائي يسألن ازواجهن هناكل ايه بكره.
.
2- الحواس 5 ..
عند الراجل مابيشتغلوش مع بعض.. وأعطالهم كتير.. ومعظمهم شغال باتنين منهم بس.. حاسة التذوق وحاسة اللمس..
أما بقى انك غيرتي نوع البيرفيوم أو غيرتي قصة شعرك.. كل دي شكليات.
انك نضفتي الشقة أو غيرتي مكان الأنتريه أو مكان السجادة..
هو مش عارف ولا فاكر أماكن الحاجات دي أصلا!!..
لو غيرتي مكان التلاجة هياخد باله.
.
3- لما تلاقيه قاعد سرحان.. مش لازم يبقى بيفكر في واحدة تانية!.. هما بيسرحوا في اللاشئ.. .. بيريحوا دماغهم.
.
4- كلهم بلا استثناء عندهم زهايمر..
يعني لو عايزة طلبات فمش كفاية تقوليله هات كذا وانت جاي.. لا..
لازم تبعتيله رسالة على كل برامج التواصل علشان يفتكر.. وتبعتيله تاني وهو راجع من الشغل..
ولو تقدري بنظارة مكبرة أو بندقية قناصة تحددي الوقت اللي هيعدي فيه جنب السوبر ماركت وتقتليه قصدي وتكلميه يبقى زي الفل.
.
5- لما تحبيه يغيرلك لمبة أو يتصل بالسباك.. مش لازم كل اسبوع تقعدي تزني عليه.. في التأني السلامة والصبر مفتاح الفرج.
.
6- الكسل دي صفة وراثية سائدة في الصنف كله.. .
.
7- الرجالة نوعين بغض النظر عن أخلاقهم ومستواهم الثقافي نوع بيحب الأكل ونوع بيحب حاجة تانية.
.
8- الفانلة الداخلية في البيت مش عفانة.. ده الزي الرسمي للرجالة.. لو متضايقة هاتيله فانلات قطونيل ملونة.
.
9- اختاري الوقت المناسب للمناقشات.. يعني مش وهو راجع تعبان من الشغل.. ولا وهو بياكل فتسدي نفسه.. ولا قبل النوم فينام متنكد.. ولا أول ما يصحى قيقوم متعكنن..
مش عارف امتى الحقيقة !!
.
10- لو عندك راجل بيتكلم ويسمع (الإتنين) ده تحافظي عليه وإوعي تقولي لحد انه بيتكلم ويسمع.. الحاجات دي بتتنظر..
دي فصيلة نادرة وهيعملولهم محمية طبيعية قريب.
.
11- لو بيساعد بقى في البيت وبيقلع جزمته بره ويعلق هدومه ويعمل شاي ومبتسم وبيقول كلام حلو وبيلبيلك طلباتك وبيفسحك.. خاااافي !!.. ده غالبا عفريت أو كائن فضائي.. علشان النوعية دي انقرضت.
32 viewsالسهم (واثق) , 04:32
ا
