2022-09-01 15:51:15
غزل لکی
شاعر: علی نظری
یَه مانگه گیریایه یا تو عینک دُویدیِت دایه؟!
نه هر مانگ، آسمانِت کُل وَ یِیهِو بِردی پا سایه
طِلا گیسین وُ نُخْره رُوی، دِیان چُوی قَن، زُوان چُوی تُوی
لِچیژِت هُو مِژی‌کَه گِ اَرَه قِلیان دَمِت دایه
تو نوروزین وُ هَف‌سینین وُ عیدین وُ وهار وُ گُل
بِخَن، تحویلْ سال اَر پا خَنین‌یَر دَم تو هوسایه
کَمه گوشه بُرُوی سیسی‌مَرِن کَه‌و بوش یَه چِیکه؟
کَمانی‌کَه وِرِه‌ی دل مِن، گِ تو تا گوش کیشایه
چِناره مِوْت: هر چُوی تو رنگین وُ راس وُ سربرزه
گُلَل پِرْک ئی خَنه بِردِن اَری گَپْ مِفت وُ بی‌پایه
پَتی کِردِن سَر ئی دوره، وَ دینِم دِت وِژه مِیتی
مِلَه جمهوریْ اسلامی نِمین تو، یا اروپایه؟!
دَسِم دُر کِرد اَرَه گیسِت، خُلیخاوی دُرِس کِردی
خدا هاواره دَس تو هُو کِفِر گیسِت نَکِریایه!
«بیا تا گل برافشانیم و می در ساغر اندازیم»
گل اَر نارِک تو چِنْیاسا، شِراو اَر دَم تو چِکْیایه
«اگر غم لشکر انگیزد که خون عاشقان ریزد»
سِپا خَم وَ امیدْ ایزد، وَ یاری عشق شِکیایه
«سخن‌دانی و خوش‌خوانی نمی‌ورزند در [این خاک]»
بِنیشیمی هَرّی کو دی، سَه آو وُ خاک بَریایه؟!
تو ئی مانگ وُ هُوَر وُ خاکه! جُواوِم بْیه، جُواوِت نْیا:
یَه مانگه گیریایه یا تو عینک دُویدیِت دایه؟
۲۸ اردیبهشت ۱۴۰۰
دکلمه با صدای شاعر
193 views12:51
ا
