2022-07-25 14:25:12
بتقول :
لما تجوزت اول فترة كانت جواتي رهبة من البيت الجديد ، ما كنت نام منيح ، كنت اخجل نام نومتي الطبيعية أو أني أكل قدامو على طبيعتي أو أدخل الحمام ..
تاني يوم زواج أهلو اجو لعنا ، قعدوا وكان المفروض أعمل أكل فدخلت جهزو ، لقيته دخل ورايي طلع العصير وصب الكاسات وحمل الصينية وطلع..
لما اختو اللي مسافرة حبت تدخل تشوف البيت من جوا ، قالها "ثواني" ودخل اتأكد أن البيت من جوا نضيف ، دخل غرفة النوم عدلها عالسريع لأنهم اجو الصبح بكير ..
ونضف أي شغلة شافها قدامو ، وبعدين طلع قالها " تفضلي "
كانت حرارتي بترتفع دايماً وأغلب الوقت عندي صداع "نصفي" ،
لما حس إني تعبت وبدأت أمسك راسي وأنا واقفة ب المطبخ دخل بعدني عن حرارة الغاز ووقف مكاني وقالي "دليني عالشغلة وأنا بعملها "
ما خجل من أمه يلي فاتت علينا فجأه ولقتني واقفة عم ساوي السلطة وهو اللي بيحمر الرز ، ضحك قدامها وقالها " ابنك صار ست بيت شاطر " ،
قالتله " ببيتنا ما كنت ترضى تنضف مكانك " ضحك بوشها وسألني " حطلك شوربة كمان ولا خلص "
تخانقنا مع بعض مرة وكنت مجهزه شنتايتي مشان روح عند بيت أهلي ، كنت قاعدة بأوضتي عم أبكي مسكرة الباب عليي .. دق الباب وكان أخوه ومرتو جايين لعنا ، فتحلن وقعد معن وبعدين دخل دق عليي وقالي طلعي سلمي علين وماتحسسين أنو نحن متخانقين أو زعلانين من بعض ..
مسحت دموعي وزبطت حالي وطلعت مبتسمة بوشن وقعدت معن ، قعد جنبي ومزح معي وكان بيوجهلي كلام كتير مشان رد عليه ، ويحط إيدو على كتفي ويبتسملي ..
تركني قاعدة معن ودخل فضى الشنتة ، واكتشفت بعدها أن هو اللي اتصل بأخوه ومرته وعزمن لعنا مشان يعرف يصالحني بالحجة هي لأني كنت مصممة أمشي ..
وحقيقي مافي أنجاز أكبر من أنك تختاري شخص #صح ، ماتهوني عليه ويعرف يعظمك قدام الناس ويحطلك أعذار
الله يبعت للجميع هيك شخص
#قصة_واقعية
@dreamhope2018
817 views11:25
ج
