شخص بيحكي عن آخر علاقة إله: أوّل مرة تقابلنا أنا وياها كان ب | رُوحْ _ ꜱᴏᴜʟ 💙🦋
شخص بيحكي عن آخر علاقة إله:
أوّل مرة تقابلنا أنا وياها كان بمعرض رسم، شفتها من بعيد ووقفت جنبها، عجبني أسلوبها وللأمانه كانت كثير حلوة لدرجة إنه الناس تركوا اللوحات وصاروا يصفنوا فيها، كانت متعلقة بالرّسم كثير وحلمها تعمل معرض بلوحاتها الخاصة، المهم تعرفنا على بعض وتقرّبنا كثير، ومشت الأيام وكثرت طلعاتنا وفجأه لقينا حالنا بنحب بعض، انبسطنا وعملنا أشياء مجنونة وكنّا غير عن أي ثنين مرتبطين، وبعد فترة من الجنون والمشاعر القوية
صارت علاقتنا مليانه مشاكِل، اهتمامي فيها صار يقِل، بطلت أشوفها البنت الحلوة والي ما في حد بقدر يوصلها، تغيرت نظرتي تجاها فجأة وصرت أدور على أسباب تبعدني عنها حتّى يصير عندي وقتي الخاص وارتاح لحالي، وبدون مقدمات بعدت واختفيت من حياتها بلا أي سبب.
اليوم وبعد سنه من انتهاء علاقتنا بلشت أحنّلها، صرت بدي ياها من جديد ورجعت تحلى بعيني، رحت لمعرض الرّسم يلي تقابلنا فيه أول مرّة وكنت عارف إني هلاقيها هناك، كانت واقفة عالباب ولابسة فستان احمر منقط، طالعه فيه مثل الوردة، وبس طلعت الدرج نزلّت راسي ووقفت قبالها ولسا بدي اقدم اعتذاري، قاطعتني وقالت وفّر عحالك واتركني احكي:
" شكرا الك، المعرض يلي أنت جاي عليه هاذ معرضي، اللوحات يلي جوا لوحاتي، كُنت سبب بإنك خليتني اشغل حالي بإشي غير فيك، حلمي تحقق وعرفت كيف اتجاوزك" فجأة ضحكت ورمّت آخر جملة وهي داخلة جوا القاعة " أنا تجاوزتك بسنة وكسبُت كلشي بدي ياه، إنت بدك سنين لتتجاوزني وراح تخسر كلشي معك، دخلك مين فينا لازم يعتذر؟ "
